Ahoratravratakathā · Verses 122-140

iti śrutvā guror vākyam indrapṛṣṭo mahāprabhuḥ //
tataḥ sattvahitārthāya vrataṃ kartuṃ samudyataḥ

vārāṇasīpuraṃ gatvā vasubandhuvaco yathā /
vihāraṃ ca pratiṣṭhāpya caityarājaṃ jinālayam /
saṃghabhojyaṃ tataḥ kṛtvā yayau svargaṃ janaiḥ sudhīḥ

tato bhikṣavo bhagavantam etad ūcuḥ /
bhagavan muniśārdūla punar vaktuṃ tvam arhasi /
kena kena purā nātha vratarājam idaṃ kṛtam

bhagavān āha /
purā svargeṣu śakreṇa ahorātravrataṃ kṛtam /
sa ṣaṭpāramitāṃ dhārya caityarājam apūjayat /
pradakṣiṇāṃ sadā kṛtvā yathāvidhi mahotsavaiḥ

pātāle ca purā vīro daityendro balavān abhūt /
nirghoṣadamano nāma devāsurapramardakaḥ

indraṃ svarge nirākṛtya pṛthivīm avadhāritam /
tenāsurasahāyena trailokyaṃ svavaśe kṛtam

pṛthivīmaṇḍalaṃ gatvā gato 'sau maghavatpurim /
indrapṛṣṭamahāsthāne devatāpratimāṃ sthitām /
pañcapradakṣiṇāṃ kṛtvā prajñāpārasthito 'bhavat

pātāleṣu punar gatvā so 'carat tad vratottamam /
nāginyo nāgarājāś ca pātāleṣv acaraṃs tathā

nāgaiḥ phaṇavibhūṣābhir devanāgendrakalpitam /
pūjitaṃ satataṃ bhaktyā caityarājaṃ vidhānataḥ

ṛṣayaś ca purā sapta jalāśrayapratiṣṭhitam /
pupūjuḥ jinadhātusthaṃ vidhibhiś ca viśāradāḥ

nāginyo viṣadarpāndhāḥ pūjyamānāñ jinālayam /
tāpitān kārayām āsur viṣāṅgāraiḥ pradāhanaiḥ

tatas taiḥ śāpitā evaṃ nāginyaḥ śambukāḥ khalu /
bhavadhvaṃ saptajanmāni punaś caityasya sevakāḥ

tataś cānte punaḥ prāpya mānuṣyaṃ puṇyabhāvataḥ /
eṣā sā nāyakā yā tu dharmadakṣaṃ patiṃ labhet

tatas ta vañcitāḥ sarvāḥ śambukā dharmamānasāḥ /
dhānyāṃ pradakṣiṇāṃ cakrur bhāvayantyo jinālayam

tataḥ puṇyānubhāvena devyaḥ saptakumārikāḥ /
bhūtā rājasutā dhanyāḥ prālabhan paramaṃ padam

tāsām ekā vratī nāmnā dharmadakṣapativratā /
tasyāḥ puṇyaprabhāvena dharmadakṣo 'labhad vratam

dharmadakṣo mahārājā yathāvidhi vrataṃ caran /
bhāryayā saha dharmātmā sukhāvatyāṃ mahīpatiḥ

ity evaṃ bhikṣavo jñātvā vratānāṃ vratam uttamam /
caityasevā sadā kāryā vratapuṇyapracāraṇaiḥ

caityavratasamaṃ puṇyaṃ nāsti satyaṃ tribhūvane /
tasmāc caityaḥ sadā vandyaḥ pūjanīyaḥ prayatnataḥ