Ahorātravratacaityasevānuśaṃsāvadāna · Verses 81-100

pradakṣiṇāny ataḥ kuryāt saṃgītaiś ca mahotsavam /
aṣṭāṅgapraṇatiṃ kṛtvā prārthayed bodhisaṃvaram /
tataḥ kṣamārthanāṃ kṛtvā tanmaṇḍalaṃ visarjayet

yathā pūjā kṛtā tatra maṇḍale vidhivat tathā /
caityabimbaṃ samabhyarcya prārthayed evam ādarāt

tathā sarvatra caityeṣu kuryāt pūjādikaṃ mudā /
saṃgītisahitaiḥ stotraiḥ kuryād evaṃ mahotsavam

kṛtvā pradakṣiṇāny eva nidrālāsyaṃ vihāya ca /
mudā jāgaraṇaṃ kurvann ahorātraṃ vrataṃ caret

catuḥsaṃdhyaṃ tathā snātvā caityasevāṃ samācaret /
duṣṭajātir na ca spṛśyā sparśite snānam ācaret

viśrāmaṃ naiva kuryāc ca khedaṃ cittena vā vratī /
caityadhyānasamādhāno japan stotraṃ paṭhaṃś caret

nṛtyagītamahotsāhair nānāvādyaiḥ sanṛtyakaiḥ /
hāhākāraiḥ samullāsaiḥ pracārayen mahotsavam

evaṃ pūrṇam ahorātram aviśrāntaṃ vrataṃ caret /
tataḥ prātas tathā snātvā maṇḍalaṃ caityam arcayet

tataś chatraṃ patākāś ca sindūrapātrayā saha /
salājākṣatapuṣpāṃś ca prārohayet mahotsavaiḥ

yajñaṃ kuryāt tathā vajrī baliṃ dadyād yathāvidhi /
abhiṣekaṃ tato dattvā pañcasūtraghaṭaṃ kramāt

sāśīrvādaṃ vratibhyo 'pi dadyād vajrī samāhitaḥ /
tataḥ kṣamārthanāṃ kṛtvā maṇḍalaṃ tad visarjayet

tatas te vratinaḥ sarve vajrācāryaṃ guruṃ yatīn /
abhyarcya dakṣiṇāṃ dattvā toṣayeyuḥ praṇamya ca

tatas tadraja ādāya tīrthe nāgān samarcya ca /
pravāhayet tato gehaṃ prāyāyān maṅgalotsavaiḥ

tatra tanmaṇḍalasthānaṃ tīrthāmbunābhiṣiñcayet /
tatas te vratinaḥ sarve kuryus tadvratapālaṇam

tatas tanmaṇḍalasthāne vajrācāryo yathāvidhi /
kumārīṃ pūjayitvā tāṃ devīṃ bhojyaiḥ pratoṣayet

gaṇacakraṃ tato 'bhyarcya bhojanaiḥ saṃpratoṣayet /
vratinaḥ sādhakāṃś cāpi janān sarvāṃś ca toṣayet

evaṃ caranti ye martyā ahorātravrataṃ mudā /
te bhavanti mahāsattvā bodhisattvāḥ śubhāśayāḥ

durgatiṃ te na gacchanti sadā gacchanti sadgatim /
bhuktvā dharmasukhotsāhaṃ saṃprayānti jinālayam

evaṃ vipaśyinā śāstrā samākhyātaṃ śrutaṃ mayā /
bhūyaḥ śṛṇu mahārāja tatphalāni viśeṣataḥ

pañcāmṛtaiḥ pañcasugandhitoyair ye snāpayantīha jinendracaityam /
mandākinīdivyasugandhitoye snātvāmarais te satataṃ ramante