Ahorātravratacaityasevānuśaṃsāvadāna · Verses 101-120

{B has the following additional verse here,
pañcāmṛtaiḥ pañcasugandhiratnair durvākṣataiḥ kūsumalājatoyaiḥ /
ye cārghadānaṃ vitaranti caitye te prāpnuvantīha mahānidhānam // Avc_100* //}
kurvanti caitye jalamaṇḍalaṃ ye supiṣṭavāsena tathā manuṣyāḥ /
te hemavarṇā nṛpavaṃśajātāḥ samṛddhimantaḥ subhagā bhavanti

sugandhadhūpaṃ jinacaityabimbe ye dhūpayanti pratimodayantaḥ /
sugandhadehāḥ surasaṃghavandyās te śuddhacittā manujā bhavanti

ye pañcagandhair anulepayanti saṃbuddhacaityaṃ manujāḥ prasannāḥ /
saugandhitāṅgā baladīptimantas te saṃbhavante paramārthalokāḥ

yajñopavītaṃ vararaṅgitaṃ ca sucīvarāṇi pradadanti caitye /
te divyavastrāvṛtasaumyadehāḥ sarvārthasaṃpadbharitā bhavanti

ye sarvapuṣpair varagandhavadbhir abhyarcayanti pratinamya caityam /
nairogiṇas te sucirāyuṣaḥ syuḥ saubhāgyavantaḥ suviśālavaṃśāḥ

ye cāpi caityaṃ parimaṇḍayanti sragbhiḥ supuṣpai racitābhir evam /
te bhāgyavantaḥ paribhūṣitāṅgā devā bhavanti prathitā nṛpāś ca

ye dīpamālā racayanti caitye te ratnasaṃpatparipūrṇakoṣāḥ /
netrābhirāmāḥ sudṛśo bhavanti te jñānadīpāhatamohajālāḥ

{A has two additional verses here
maitryā yaḥ saha kiṃkaraiḥ smararipuṃ nirjitya vajrāsane
kleśārīn api yo durantaviṣayān antaścarān durjanān /
skandhārātim api prasahya sugato mṛtyuṃ ca niḥsvo 'vaśaḥ
prāptaḥ sarvarasāgrabhogavaśitāṃ kṣīrodanāḍhaukanāt // Avc_107* //
sauvarṇaraupyavidhadhātujamṛnmayaṃ vā
śālyodanaiḥ suparipūrṇasupiṇḍapātram /
bhaktyā dadāti sugatālayacaityabimbe
syāt tasya puṇyam asamaṃ phalam aprameyam // Avc_107** //}
ye caityabimbe surasaṃ praṇītaṃ naivedyam agraṃ pradadanti bhogyam /
te lokaśreṣṭhā balakīrtiyuktā nṛpā bhavanti prathitānubhāvāḥ

ye cāpi caitye phalapattramūlaskandhādikaṃ vā pradadanti bhaktyā /
nīrogiṇas te susamṛddhimanto yatheṣṭabhogyāḥ sukhino bhavanti

bhaiṣajyam evaṃ pradadanti ye ca saṃbuddhacaitye manujāḥ prasannāḥ /
snigdhānanās te nṛpatīśvarāś ca sauvaṃavarṇā nirujo bhavanti

{B, which had vs. ii noted above here, adds another verse,
māhiṣyagorasavaraṃ ghṛtayā sametam
....................................................... ye /
tasmai dadanti satataṃ jinapuṃgavāya
te prāpnuvanty ............. sarājalakṣmīm // Avc_110* //}
tāmbūlapūgādirasāyanāni ye caityabimbe pariḍhaukayanti /
te bhūmipālāḥ subhagā bhavanti divyāṅganānetramanoharāsyāḥ

{A and B have the following additional verse here.
kāntāpāṇisarojapattravidhṛtāṃ sadvarṇagandhojjvalāṃ
svādusparśasukhāṃ surāsurapure yad devavṛndārakaiḥ /
bhāsvatkāñcanabhājaneṣu nihitām aśnanti divyāṃ sudhāṃ
tad buddhapramukhāryasaṃghaviṣaye nyastānnadānāt phalam // Avc_111* //}
ye caityabimbe pariśuddharaṅgān dhvajān vicitrān adhiropayanti /
mahīśvarās te jitaduṣṭasaṃghā dhanyā bhavanti prathitapratāpāḥ

uccair vitanvanti vitānam ārād ye caityabimbe manujāḥ prasannāḥ /
devādhipās te manujādhipāś ca dhanyā bhavanti prathitarddhimantaḥ

ye cāpi caitye manujā vicitrāḥ śuddhāḥ patākā avalambayanti /
te śrīsametā divi bhūtale ca nāthā bhavanti tridaśābhimānyāḥ

chattraṃ suvarṇaṃ maṇibhir vicitraṃ paṭṭaiś ca siktaiḥ kusumaiḥ kṛtaṃ ca /
ye caityabimbe manujāḥ prasannā māṅgalyavādyair adhirohayanti

te dharmapālāḥ śubhakīrtiyuktā lakṣmyālayāḥ śrīguṇasaukhyavantaḥ /
devādhirājā manujādhipāś ca saṃbodhicaryābhiratā bhavanti

saṃgītavādyaiḥ sumanojñaśabdaiḥ śaṅkhādimāṅgalyamahānurāvaiḥ /
vīṇādibhir vaṃśamanojñaghoṣair mahotsavaṃ ye vitaranti caitye

te divyakarṇāḥ sumanojñavākyāḥ saundaryarūpāḥ pariśuddhacittāḥ /
maharddhimantaḥ sugatābhibhaktā martyāmarendrāḥ satataṃ bhavanti

nṛtyaiḥ sulāsyaiḥ sumanojñabhāvair ye caityabimbaṃ sarasā bhajanti /
te pāpaduṣṭagraharogamuktāḥ puṇyā guṇārthānugatā bhavanti

ye cāpi duṣṭān abhikheṭayanto rakṣanti caityaṃ satataṃ manuṣyāḥ /
te bhāgyavanto nirujāḥ suvaṃśāḥ saukhyaṃ prabhuktvā prasaranti svargam