Ahorātravratacaityasevānuśaṃsāvadāna · Verses 61-80

svayaṃbhūcaityabhūkṣetre vihāre sugatāśrame /
puṇyakṣetre nadītīre saṃgame saritāṃ tathā

tīrthe samudratīre ca hradatīre sarastaṭe /
udyāne parvate 'raṇye vivikte vana-āśrame

caityālaye śubhe sthāne prāsāde mandire gṛhe /
evam anyatra bhūdeśe śuddhasthāne manorame

eteṣu pariśuddheṣu yatrepsite viśodhite /
dharmaśālāṃ vidhāyādau mṛdgomayair vilepayet

caturdhvajān pratiṣṭhāpya vitanuyād vitānakam /
puṣpamālādibhiś citrair duṣyaiḥ paṭṭaiś ca maṇḍayet

{E adds a verse in the margin as follows:
gokśīraiḥ paṃcaratnaiś ca śilācūrṇair vilepayet /
digmālā digpratāpaiś (sic) ca lambayec ca jinālayaṃ // Avc_65* //}
tatra vajrī śubhācāraḥ pariśuddhatrimaṇḍalaḥ /
maṇḍalaṃ vartayed ramyaṃ dharmadhātor yathāvidhi

tatas tan maṇḍalaṃ vajrī pratiṣṭhāpya yathāvidhi /
vratināṃ saṃgrahaṃ kṛtvā vratārambhaṃ prakārayet

śuklapakṣe trayodaśyāṃ bhojanānte dinātyaye /
dantādidhāvanaṃ kṛtvā mukhādiṃ pariśodhayet

caturdaśyāṃ prabhāte ca tīrthe snātvā vratī sudhīḥ /
śucivastrāvṛto bhadraśīlaḥ śraddhāsamanvitaḥ

madhyāhne maṇḍalaṃ caityaṃ pañcabhir upahārakaiḥ /
yathāvidhi samabhyarcya praṇāmaṃ saṃprakārayet

tato yāme tṛīye 'hnaḥ kārayed vratapālaṇam /
nirāmiṣair viśuddhānnaiḥ snānaṃ ca kārayet tataḥ

/
tato rātrimukhe caityaṃ maṇḍalaṃ ca samarcayet /
dīpamālāḥ samujjvālya dharmaṃ ca śrāvayed vratīn

pūrṇamāsyāṃ prabhāte tu snātvā śuddhāmbarāvṛtāḥ /
śodhitapañcagavyena kuryuś cāṅgaviśodhanam

tato dattvārgham ādau te sūryāya vratinas tathā /
gurave ca pradāyārghaṃ sthitvā svasvāsane kramāt

pūjāṅgāni ca sarvāṇi śodhayeyur yathāvidhi /
tatrādau vratisaṃghaḥ sa vajrasattvaṃ samarcayet

tato ratnatrayaṃ caiva saṃpūjayed yathāvidhi /
teṣāṃ ca śaraṇaṃ gatvā praṇamed racitāñjaliḥ

trisamādhiṃ tataḥ kṛtvā dhyātvātmani jineśvaram /
āvāhayet puraḥ śrīmaddharmadhātuṃ maheśvaram

tatpādārghaṃ tato dadyāt tataś cācamanārghakam /
prokṣaṇārghaṃ tato dattvā maṇḍale saṃniveśayet

tataḥ pūjopahārais taṃ maṇḍalaṃ sagaṇaṃ mudā /
yathāvidhi samabhyarcya taddhṛnmantraṃ sudhīr japet

{E adds here:
tataḥ stotraṃ paṭhet /
dharmadhātumayaṃ caityaṃ sarvākārasvarūpiṇam /
ālayaṃ sarvabuddhānāṃ vāgīśvaraṃ namāmy aham //
jinajasakaladhātuṃ puṇyakṣetre kṛtārtham /
praviṇajanasukhārthaṃ sevitārthaṃ pradattam //
praṇamataṃ munirājaṃ aṃjaliṣṭhaṃ pradhānam /
jitasakalabhayārthaṃ lokanāthaṃ maheśam //}
tataḥ stotraṃ paṭhitvā tu toṣayed racitāñjaliḥ /
pāpānāṃ deśanāṃ kuryāt thatā puṇyānumodanām