અહોરાત્રવ્રતચૈત્યસેવાનુશંસાવદાન · શ્લોક 81-100

પ્રદક્ષિણાન્ય્ અતઃ કુર્યાત્ સંગીતૈશ્ ચ મહોત્સવમ્ ।
અષ્ટાઙ્ગપ્રણતિં કૃત્વા પ્રાર્થયેદ્ બોધિસંવરમ્ ।
તતઃ ક્ષમાર્થનાં કૃત્વા તન્મણ્ડલં વિસર્જયેત્

યથા પૂજા કૃતા તત્ર મણ્ડલે વિધિવત્ તથા ।
ચૈત્યબિમ્બં સમભ્યર્ચ્ય પ્રાર્થયેદ્ એવમ્ આદરાત્

તથા સર્વત્ર ચૈત્યેષુ કુર્યાત્ પૂજાદિકં મુદા ।
સંગીતિસહિતૈઃ સ્તોત્રૈઃ કુર્યાદ્ એવં મહોત્સવમ્

કૃત્વા પ્રદક્ષિણાન્ય્ એવ નિદ્રાલાસ્યં વિહાય ચ ।
મુદા જાગરણં કુર્વન્ન્ અહોરાત્રં વ્રતં ચરેત્

ચતુઃસંધ્યં તથા સ્નાત્વા ચૈત્યસેવાં સમાચરેત્ ।
દુષ્ટજાતિર્ ન ચ સ્પૃશ્યા સ્પર્શિતે સ્નાનમ્ આચરેત્

વિશ્રામં નૈવ કુર્યાચ્ ચ ખેદં ચિત્તેન વા વ્રતી ।
ચૈત્યધ્યાનસમાધાનો જપન્ સ્તોત્રં પઠંશ્ ચરેત્

નૃત્યગીતમહોત્સાહૈર્ નાનાવાદ્યૈઃ સનૃત્યકૈઃ ।
હાહાકારૈઃ સમુલ્લાસૈઃ પ્રચારયેન્ મહોત્સવમ્

એવં પૂર્ણમ્ અહોરાત્રમ્ અવિશ્રાન્તં વ્રતં ચરેત્ ।
તતઃ પ્રાતસ્ તથા સ્નાત્વા મણ્ડલં ચૈત્યમ્ અર્ચયેત્

તતશ્ છત્રં પતાકાશ્ ચ સિન્દૂરપાત્રયા સહ ।
સલાજાક્ષતપુષ્પાંશ્ ચ પ્રારોહયેત્ મહોત્સવૈઃ

યજ્ઞં કુર્યાત્ તથા વજ્રી બલિં દદ્યાદ્ યથાવિધિ ।
અભિષેકં તતો દત્ત્વા પઞ્ચસૂત્રઘટં ક્રમાત્

સાશીર્વાદં વ્રતિભ્યો ઽપિ દદ્યાદ્ વજ્રી સમાહિતઃ ।
તતઃ ક્ષમાર્થનાં કૃત્વા મણ્ડલં તદ્ વિસર્જયેત્

તતસ્ તે વ્રતિનઃ સર્વે વજ્રાચાર્યં ગુરું યતીન્ ।
અભ્યર્ચ્ય દક્ષિણાં દત્ત્વા તોષયેયુઃ પ્રણમ્ય ચ

તતસ્ તદ્રજ આદાય તીર્થે નાગાન્ સમર્ચ્ય ચ ।
પ્રવાહયેત્ તતો ગેહં પ્રાયાયાન્ મઙ્ગલોત્સવૈઃ

તત્ર તન્મણ્ડલસ્થાનં તીર્થામ્બુનાભિષિઞ્ચયેત્ ।
તતસ્ તે વ્રતિનઃ સર્વે કુર્યુસ્ તદ્વ્રતપાલણમ્

તતસ્ તન્મણ્ડલસ્થાને વજ્રાચાર્યો યથાવિધિ ।
કુમારીં પૂજયિત્વા તાં દેવીં ભોજ્યૈઃ પ્રતોષયેત્

ગણચક્રં તતો ઽભ્યર્ચ્ય ભોજનૈઃ સંપ્રતોષયેત્ ।
વ્રતિનઃ સાધકાંશ્ ચાપિ જનાન્ સર્વાંશ્ ચ તોષયેત્

એવં ચરન્તિ યે મર્ત્યા અહોરાત્રવ્રતં મુદા ।
તે ભવન્તિ મહાસત્ત્વા બોધિસત્ત્વાઃ શુભાશયાઃ

દુર્ગતિં તે ન ગચ્છન્તિ સદા ગચ્છન્તિ સદ્ગતિમ્ ।
ભુક્ત્વા ધર્મસુખોત્સાહં સંપ્રયાન્તિ જિનાલયમ્

એવં વિપશ્યિના શાસ્ત્રા સમાખ્યાતં શ્રુતં મયા ।
ભૂયઃ શૃણુ મહારાજ તત્ફલાનિ વિશેષતઃ

પઞ્ચામૃતૈઃ પઞ્ચસુગન્ધિતોયૈર્ યે સ્નાપયન્તીહ જિનેન્દ્રચૈત્યમ્ ।
મન્દાકિનીદિવ્યસુગન્ધિતોયે સ્નાત્વામરૈસ્ તે સતતં રમન્તે