Ahorātravratacaityasevānuśaṃsāvadāna · Verses 41-60

evaṃ sarve mahāsattvā ṛṣayo munayo 'pi ca /
etad vratavaraṃ kṛtvā bhavanti brahmacāriṇaḥ

evaṃ ye ye narāś cāpi caranty etad vrataṃ mudā /
te te sarve 'pi tatpuṇyair bhavanti bodhibhāginaḥ

ye cāpy etad vrataṃ dṛṣṭvā śrutvāpi cānumoditāḥ /
prasīdanti tathā te 'pi tatpuṇyaṃ prāpnuvanti hi

etatpuṇyānubhāvena naiva gacchanti durgatim /
sarvadā saśubhaṃ saukhyaṃ bhuktvā yānti jinālayam

tasmāt sarvaprayatnena saddharmasukhavāñchibhiḥ /
ahorātravrataṃ bhaktyā caritavyaṃ naraiḥ sadā

ahorātravratotpannapuṇyasaṃkhyā na vidyate /
aprameyam asaṃkhyeyam iti buddhaiḥ prakathyate

sarvair api munīndrais tat saṃkhyāṃ kartuṃ na śakyate /
mayātra śakyam ekena tatpuṇyaṃ gaṇituṃ katham

yasya puṇyānubhāvena mahānti pātakāny api /
nirdahya pariśuddhātmā tatkṣaṇād yāti sadgatim

yathābhilaṣitaṃ kāryaṃ sādhayitvā hy avighnataḥ /
sarvadā satsukhaṃ bhuktvā saṃyānty ante jinālayam

iti matvā mahatpuṇyam ahorātravrataṃ varam /
dharmārthakāmamokṣāptyai caritavyaṃ sadā naraiḥ

tathā cet te mahatpuṇyam ihāmutra śubhaṃ sadā /
kramād bodhivrataṃ prāpya bodhisattvo bhaved dhruvam

kramāt kleśān vinirjitya saṃsārasukhanandinaḥ /
jitvā māragaṇān sarvān saṃbuddhapadam āpnuyāḥ

iti tena samākhyātaṃ dhīmatā vasubandhunā /
śrutvaivaṃ sumahat puṇyam indrapṛṣṭo mumoda saḥ

tataḥ sa indrapṛṣṭākhyo mahārājo 'numoditaḥ /
ahorātravrataṃ kartuṃ cārayituṃ samaicchata

tataḥ sa nṛpa utthāya sāñjaliḥ samupācaran /
vasubandhuṃ tam ānatvā prārthayad evam ādarāt

bhadanta bhavatādiṣṭam ahorātravratodbhavam /
mahat puṇyaṃ niśamyāhaṃ kartum icchāmi sāṃpratam

tasmāt tadvidhim ādeṣṭum arhasi me jagaddhite /
sarvathāhaṃ cariṣyāmi cariṣyanti prajā api

tad atra sarvasattvānāṃ hitāya puṇyasiddhaye /
ahorātravratasyaivaṃ vidhim ādeṣṭum arhasi

iti tena narendreṇa prārthitaṃ sa mahāmatiḥ /
vasubandhur niśamyaivaṃ indrapṛṣṭaṃ tam abravīt

śṛṇu rājan yathākhyātaṃ munīndreṇa vipaśyinā /
tathāhaṃ te pravakṣyāmi vratarājavidhiṃ kramāt