Ahorātravratacaityasevānuśaṃsāvadāna · Verses 21-40

tad atra bhuvane khyātam ahorātravrataṃ kadā /
pravartate tad ākhyāhi tadvidhiṃ ca kathaṃ prabho

iti tenārhatā pṛṣṭe bhagavān sa munīśvaraḥ /
tāṃ sabhāṃ taṃ subhūtiṃ ca samālokyaivam abravīt

sādhu śṛṇu subhūte tvaṃ sarvasattvahitārthabhṛt /
ahorātravrataṃ puṇyaṃ vidhiṃ ca kathyate mayā

purā pūrvavidehe 'bhūt khyātā gandhavatī purī /
tasyāṃ rājā mahāvijña indrapṣṭābhidhaḥ prabhuḥ

so 'ntaḥpure samānīya vasubandhuṃ jinātmajam /
sabhāyāṃ svāsane sthāpya satkṛtya śraddhayārcayat

tataḥ sa bhūpatī rājā utthāya samupāśritaḥ /
kṛtāñjaliḥ praṇatvainaṃ prārthayad evam ādarāt

bhadanta yad ime lokā asaddharmābhimāninaḥ /
tad eṣāṃ mānaghātāya saddharmaṃ samupādiśa

yac chrutvaiva tv ime sarve saddharmapratibodhitāḥ /
sarvapāpavinirmuktā bhaveyur bodhilābhinaḥ

iti rājñārthitaṃ śrutvā vasubandhuḥ sa ātmavit /
indrapṛṣṭaṃ mahīndraṃ taṃ samālokyaivam abravīt

śṛṇu sādhu mahārājā tava puṇyapravṛddhaye /
sarvasattvahitārthaṃ tad ahorātramahāvratam

yathā mayā śrutaṃ pūrvaṃ vipaśyinā prabhāṣitam /
mahatpuṇyānuśaṃsā ca tadvidhiś ca pracakṣyate

saṃsāre 'tra mahat puṇyaṃ prāptum icchanti ye narāḥ /
caritavyam ahorātravrataṃ taiḥ śraddhayā mudā

bhaktyā caranti ye martyā ahorātravrataṃ mudā /
te sarve vimalātmānaḥ pariśuddhatrimaṇḍalāḥ

bodhicittaṃ samāsādya caritvā bodhicārikām /
sarvasattvahitaṃ kṛtvā pūrya pāramitāḥ kramāt

sarvakleśagaṇāñ jitvā sarvamāragaṇān api /
samyagbodhiṃ samāsādya bhaveyuḥ sugatā dhruvam

atītaiś ca jinaiḥ sarvaiḥ kṛtvaitad vratam uttamam /
sarvamāragaṇāñ jitvā saṃbodhiḥ sādhitā khalu

vartamānaiś ca saṃbuddhaiḥ sarvair etad vrataṃ kṛtam /
etatpuṇyānubhāvair hi saṃbodhiḥ sādhitā drutam

tathā cānāgataiḥ sarvaiḥ kṛtvā caitad vrataṃ varam /
etatpuṇyavipākais tu prāpsyate bodhir uttamā

tathānye bodhisattvāś ca saṃbodhivratacārakāḥ /
etad vratavaraṃ dhṛtvā caranti bodhisaṃvaram

tathā sarve 'marendrāś ca kṛtvā caitad vrataṃ mudā /
devalokādhināthās te bhavanti bodhibhāginaḥ