અહોરાત્રવ્રતચૈત્યસેવાનુશંસાવદાન · શ્લોક 41-60

એવં સર્વે મહાસત્ત્વા ઋષયો મુનયો ઽપિ ચ ।
એતદ્ વ્રતવરં કૃત્વા ભવન્તિ બ્રહ્મચારિણઃ

એવં યે યે નરાશ્ ચાપિ ચરન્ત્ય્ એતદ્ વ્રતં મુદા ।
તે તે સર્વે ઽપિ તત્પુણ્યૈર્ ભવન્તિ બોધિભાગિનઃ

યે ચાપ્ય્ એતદ્ વ્રતં દૃષ્ટ્વા શ્રુત્વાપિ ચાનુમોદિતાઃ ।
પ્રસીદન્તિ તથા તે ઽપિ તત્પુણ્યં પ્રાપ્નુવન્તિ હિ

એતત્પુણ્યાનુભાવેન નૈવ ગચ્છન્તિ દુર્ગતિમ્ ।
સર્વદા સશુભં સૌખ્યં ભુક્ત્વા યાન્તિ જિનાલયમ્

તસ્માત્ સર્વપ્રયત્નેન સદ્ધર્મસુખવાઞ્છિભિઃ ।
અહોરાત્રવ્રતં ભક્ત્યા ચરિતવ્યં નરૈઃ સદા

અહોરાત્રવ્રતોત્પન્નપુણ્યસંખ્યા ન વિદ્યતે ।
અપ્રમેયમ્ અસંખ્યેયમ્ ઇતિ બુદ્ધૈઃ પ્રકથ્યતે

સર્વૈર્ અપિ મુનીન્દ્રૈસ્ તત્ સંખ્યાં કર્તું ન શક્યતે ।
મયાત્ર શક્યમ્ એકેન તત્પુણ્યં ગણિતું કથમ્

યસ્ય પુણ્યાનુભાવેન મહાન્તિ પાતકાન્ય્ અપિ ।
નિર્દહ્ય પરિશુદ્ધાત્મા તત્ક્ષણાદ્ યાતિ સદ્ગતિમ્

યથાભિલષિતં કાર્યં સાધયિત્વા હ્ય્ અવિઘ્નતઃ ।
સર્વદા સત્સુખં ભુક્ત્વા સંયાન્ત્ય્ અન્તે જિનાલયમ્

ઇતિ મત્વા મહત્પુણ્યમ્ અહોરાત્રવ્રતં વરમ્ ।
ધર્માર્થકામમોક્ષાપ્ત્યૈ ચરિતવ્યં સદા નરૈઃ

તથા ચેત્ તે મહત્પુણ્યમ્ ઇહામુત્ર શુભં સદા ।
ક્રમાદ્ બોધિવ્રતં પ્રાપ્ય બોધિસત્ત્વો ભવેદ્ ધ્રુવમ્

ક્રમાત્ ક્લેશાન્ વિનિર્જિત્ય સંસારસુખનન્દિનઃ ।
જિત્વા મારગણાન્ સર્વાન્ સંબુદ્ધપદમ્ આપ્નુયાઃ

ઇતિ તેન સમાખ્યાતં ધીમતા વસુબન્ધુના ।
શ્રુત્વૈવં સુમહત્ પુણ્યમ્ ઇન્દ્રપૃષ્ટો મુમોદ સઃ

તતઃ સ ઇન્દ્રપૃષ્ટાખ્યો મહારાજો ઽનુમોદિતઃ ।
અહોરાત્રવ્રતં કર્તું ચારયિતું સમૈચ્છત

તતઃ સ નૃપ ઉત્થાય સાઞ્જલિઃ સમુપાચરન્ ।
વસુબન્ધું તમ્ આનત્વા પ્રાર્થયદ્ એવમ્ આદરાત્

ભદન્ત ભવતાદિષ્ટમ્ અહોરાત્રવ્રતોદ્ભવમ્ ।
મહત્ પુણ્યં નિશમ્યાહં કર્તુમ્ ઇચ્છામિ સાંપ્રતમ્

તસ્માત્ તદ્વિધિમ્ આદેષ્ટુમ્ અર્હસિ મે જગદ્ધિતે ।
સર્વથાહં ચરિષ્યામિ ચરિષ્યન્તિ પ્રજા અપિ

તદ્ અત્ર સર્વસત્ત્વાનાં હિતાય પુણ્યસિદ્ધયે ।
અહોરાત્રવ્રતસ્યૈવં વિધિમ્ આદેષ્ટુમ્ અર્હસિ

ઇતિ તેન નરેન્દ્રેણ પ્રાર્થિતં સ મહામતિઃ ।
વસુબન્ધુર્ નિશમ્યૈવં ઇન્દ્રપૃષ્ટં તમ્ અબ્રવીત્

શૃણુ રાજન્ યથાખ્યાતં મુનીન્દ્રેણ વિપશ્યિના ।
તથાહં તે પ્રવક્ષ્યામિ વ્રતરાજવિધિં ક્રમાત્