Ahorātravratacaityasevānuśaṃsāvadāna · Verses 322-341

tasyaitat prātihāryaṃ tāḥ sarvā dṛṣṭvā savismayāḥ /
suprasannamukhāmbhojāḥ sulabdhabodhimānasāḥ

tatra pradakṣiṇīkṛtya kṛtāñjalipuṭā mudā /
aṣṭāṅgapraṇatiṃ kṛtvā bodhipraṇidhim ādadhuḥ

yad asmābhir muner asya satkṛtiḥ prakṛtā mudā /
etatpuṇyavipākena labdhvā ca janma sadgatau

svaparātmahitaṃ kṛtvā sarvatrāpi śubhāni ca /
īdṛkpratyekasaṃbodhiṃ labdhvā vrajema nirvṛtim

evaṃ tāḥ kanyakāḥ sarvāḥ praṇidhāya prasāditāḥ /
tam eva sugataṃ natvā tasthur dhyānasamāhitāḥ

evaṃ hṛdbhāvitaṃ tāsāṃ matvā sa sugatas tataḥ /
ākāśāt sahasopetya tā evaṃ samupādiśat

bhaginyaḥ saṃprasīdadhvaṃ yad itaḥ saptame 'hani /
sarvā yūyaṃ subhāvinyaḥ samaṃ kālaṃ gamiṣyatha

tato rājakule janma vārāṇasyāṃ śubhāṃśikāḥ /
labdhvā yūyaṃ samācārāḥ sarvāḥ śubhe cariṣyatha

tatra yūyaṃ samālokya saṃsāraṃ kleśasaṃkulam /
sarvān parigrahāṃs tyaktvā tapovane ramiṣyatha

tatrāpi ca triratnāni smṛtvā sadā samāhitāḥ /
pratyekāṃ bodhim āsādya nirvṛtipadam āpsyatha

etan matvā bhaginyo 'tra sarvā yūyaṃ samāhitāḥ /
triratnabhajanaṃ kṛtvā carata sarvadā śubhe

etad evam upādiśya sa pratyekajinas tataḥ /
bhāsayan khaṃ samutplutya svāśramaṃ sahasā yayau

tam ākāśagataṃ dṛṣṭvā sarvās tāḥ kanyakā mudā /
praṇatvā suprasādinyaś cireṇa svālaye 'caran

tatra tāś caityam abhyarcya sthitāḥ saptadine mṛtāḥ /
vārāṇasyāṃ kṛke rajñaḥ sutā āsan samānikāḥ

tāsaṃ yā bhaginī jyeṣṭhā vratīti pratiśrutā /
dvitīyā dharmavatī khyātā tṛtīyā śubhamañjarī

caturthī dhīmatī nāmnā pañcamī netramañjarī /
ṣaṣṭhī ca śrimatī khyātā saptamī ca madaṃjahā

aṣṭamī ratnamālākhyā ity etā aṣṭakanyakāḥ /
sujātā nṛpateḥ putryaḥ samācārāḥ samāśayāḥ

{E adds the following after vs. 338 and continues from 339
tatra tāḥ dharmavatyādi saptakanyā śubhecarāḥ /
kleśavyākulasaṃsāram ity ālokya parigrahān /
svān svān sarvān parityaktvā sarvāḥ tapovanaṃ yayuḥ // Avc_338* //
tatrāpi ca triratnāni sadā smṛtvā samāhitāḥ /
pratyekāṃ bodhim āsādya nirvṛtiṃ tāḥ samāyayuḥ // Avc_338** //
tāsaṃ jyeṣṭhā svasā yā tat vrataṃ pratijanma pracārikā /
etatpuṇyānubhāvena sā kanyā ratisaṃnibhā // Avc_338*** //
dharmaśīlā vratī nāmnī dharmapattane pure vare /}
tāsāṃ jyeṣṭhā pradhānā yā sā kanyā ratisaṃnibhā /
dharmadakṣasya bhūpasya bhāryābhūd dharmacāriṇī

tadāpi sā vratī kanyā caityasevānurāgiṇī /
saṃbodhicaraṇārāgā saṃbuddhaguṇabhāvinī

tatra sā kanyakā sādhvī kartuṃ caityārcanaṃ mudā /
dharmadakṣaṃ patiṃ natvā prārthayad evam ādarāt