Ahorātravratacaityasevānuśaṃsāvadāna · Verses 302-321

tatra sa kṛpayā dṛṣṭyā vilokayan samantataḥ /
tāḥ sarvā vedanākrāntāḥ samaikṣata vimūrchitāḥ

tataḥ pratyekabuddhaḥ sa kāruṇyacoditaḥ kṛtī /
taddeśaṃ sahasopetya tasthau sudhākarotsṛjan

sarvās tās tatsudhāraśmiparispṛṣṭāḥ sukhānvitāḥ /
saṃprāptacetanāḥ sarvāḥ prādrākṣus taṃ yatīśvaram

tatas tās taṃ muniṃ dṛṣṭvā vismayākrāntamānasāḥ /
ko 'yaṃ munir iti dhyātvā sarvās tasthuḥ pramoditāḥ

tatas tāsāṃ pradhānā yā bhaginī sā vicakṣaṇā /
tāḥ sarvā bhaginīr dṛṣṭvā samāmantryaivam abravīt

dhanyā vayaṃ tad adya smo yad ayaṃ saugato muniḥ /
kṛpayāsmān samuddhartuṃ svayam eva samāgataḥ

yady ayaṃ nāgato buddhaḥ sudhāraśmir dayānidhiḥ /
nistrāṇā vayam atraiva sarvā mṛtyuṃ vrajemahi

dhanyo 'yaṃ sugato nāthaḥ sarvasattvānukampakaḥ /
ko hy asti trijagalloke buddhād anyo hitaṃkaraḥ

buddha eva jagacchāstā sarvabhadrārthasādhakaḥ /
durgatitrāyako nāthaḥ sadgater mārgadarśakaḥ

tad etasya vayaṃ sarvāḥ sarvadā śaraṇaṃ gatāḥ /
satkṛtya śraddhayā bhaktya yathāśakti bhajemahi

tato nūnaṃ vayaṃ sarvāḥ sarvapāpavimocitāḥ /
pariśuddhatrikāyā hi sadgatiṃ ca vrajemahi

etat tayā samākhyātaṃ śrutvā tāḥ paribodhitāḥ /
sarvā api munes tasya tathā bhaktuṃ samīṣire

tatas tāḥ kanyakāḥ sarvāḥ śraddhābhaktisamanvitāḥ /
yathāśakti munes tasya satkāraiḥ prābhajan mudā

tatas tāḥ śaraṇaṃ gatvā kṛtāñjalipuṭā mudā /
tridhā pradakṣiṇīkṛtya natvaivaṃ prārthayaṃs tathā

bhagavan nātha sarvajña bhavatāṃ sarvadā vayam /
śaraṇasthā yathādeśam icchāmaś carituṃ tathā

tad bhavān kṛpayā dṛṣṭyā paśyann asmān suduḥkhitāḥ /
sarvadāpi tathā sarvāḥ paritrātuṃ samarhati

nānyo no vidyate trātā nātho mitraṃ suhṛd guruḥ /
bhavān eva guruḥ śāstā saddharmadeśakaḥ prabhuḥ

tad asmān duḥkhinīḥ sarvāḥ saṃpaśyan karuṇādṛśā /
bodhimārge pratiṣṭhāpya sadaivaṃ trātum arhati

etat saṃprārthitaṃ tābhiḥ śrutvā so 'rhan mahāmatiḥ /
pratyekasugato jñātvā tāsāṃ karmavipākatām

tata ākāśa utplutya sthitvā vahnir ivojjvalan /
taccittasaṃvinodārthaṃ prātihāryam adarśayat