Ahorātravratacaityasevānuśaṃsāvadāna · Verses 342-356

svāminn icchāmy ahaṃ kartuṃ caityabimbārcanaṃ sadā /
ahorātravrataṃ cāpi tad anujñāṃ pradehi me

iti tayā subhāvinyā bhāryayā prārthitaṃ mudā /
śrutvā sa nṛpatir dṛṣṭvā tāṃ bhāryām evam abravīt

bhadre sādhuḥ samicchā te yat tvayāhaṃ prabodhitaḥ /
ahaṃ cāpi cariṣyāmi tathāhorātrasadvratam

ity uktvā sa mahīpālo dharmadakṣaḥ pramoditaḥ /
bhāryayā sahasaicchat tad ahorātravrataṃ varam

tataḥ sa nṛpatiś caityaṃ pratiṣṭhāpya yathāvidhi /
ahorātravrataṃ kṛtvā sabhāryas taṃ samārcayat

evaṃ tayā subhāvinyā bhāryayā saha sarvadā /
dharmadakṣo narendro 'sau caityasevārato 'bhavat

tatas tau dampatī cāpi yāvajjīvaṃ jinārcanam /
kṛtvā saukhyaṃ prabhuktvānte saṃjagmāte jinālayam

evaṃ matvātra yūyaṃ ca śraddhayā sadvrataṃ mudā /
ahorātravrataṃ dhṛtvā bhajata caityam ādarāt

evaṃ kṛte hi vo bhadram ihāmutra sadā bhavet /
kramād bodhipadaṃ prāpya gamiṣyatha jinālayam

iti śāstrā munīndreṇa samādiṣṭaṃ niśamya te /
bhikṣavo 'pi tathā caityaṃ vrataṃ dhṛtvā prabhejire

evaṃ me guruṇākhyātaṃ śrutaṃ mayā narādhipa /
sarvalokahitārthāya tavāpi ca pracakṣyate

tathā tvaṃ ca mahārāja saṃbodhipadalabdhaye /
ahorātravrataṃ dhṛtvā caityasevārato bhava

etatpuṇyānubhāvais te sarvatra mangalaṃ bhavet /
sarvadā satsukhaṃ bhuktvā yāyāś cānte jinālayam

{E adds the following between vss. 354 and 355.
punas ca maharaja
dharmaṃ vinā na mokṣaṃ ca dānaṃ vinā na bhuktavān /
śrotuṃ vinā na satjñānaṃ tasmād dharmādikaṃ cara //
saptajanmakṛtaṃ pāpaṃ tenaiva naśyate khalu /
kukṣetre ca kugotre ca jananaṃ na bhaviṣyati // Avc_354* //}
iti tenopaguptena śāstrākhyātaṃ niśamya saḥ /
aśokaḥ saprajālokas tatheti prābhyanandata

ye cedaṃ śuddhacittā jinavarakathitaṃ caityasevānubhāvam /
śṛṇvanti śrāvayanti pramuditahṛdayāḥ śraddhayābhiprasannāḥ /
te sarvakleśamuktā jinaguṇaniratāḥ prāptasaṃbodhicittāḥ /
śuddhātmānaḥ sudhīrāḥ sakalaśubhakarā buddhaloke prayānti