અહોરાત્રવ્રતચૈત્યસેવાનુશંસાવદાન · શ્લોક 302-321

તત્ર સ કૃપયા દૃષ્ટ્યા વિલોકયન્ સમન્તતઃ ।
તાઃ સર્વા વેદનાક્રાન્તાઃ સમૈક્ષત વિમૂર્છિતાઃ

તતઃ પ્રત્યેકબુદ્ધઃ સ કારુણ્યચોદિતઃ કૃતી ।
તદ્દેશં સહસોપેત્ય તસ્થૌ સુધાકરોત્સૃજન્

સર્વાસ્ તાસ્ તત્સુધારશ્મિપરિસ્પૃષ્ટાઃ સુખાન્વિતાઃ ।
સંપ્રાપ્તચેતનાઃ સર્વાઃ પ્રાદ્રાક્ષુસ્ તં યતીશ્વરમ્

તતસ્ તાસ્ તં મુનિં દૃષ્ટ્વા વિસ્મયાક્રાન્તમાનસાઃ ।
કો ઽયં મુનિર્ ઇતિ ધ્યાત્વા સર્વાસ્ તસ્થુઃ પ્રમોદિતાઃ

તતસ્ તાસાં પ્રધાના યા ભગિની સા વિચક્ષણા ।
તાઃ સર્વા ભગિનીર્ દૃષ્ટ્વા સમામન્ત્ર્યૈવમ્ અબ્રવીત્

ધન્યા વયં તદ્ અદ્ય સ્મો યદ્ અયં સૌગતો મુનિઃ ।
કૃપયાસ્માન્ સમુદ્ધર્તું સ્વયમ્ એવ સમાગતઃ

યદ્ય્ અયં નાગતો બુદ્ધઃ સુધારશ્મિર્ દયાનિધિઃ ।
નિસ્ત્રાણા વયમ્ અત્રૈવ સર્વા મૃત્યું વ્રજેમહિ

ધન્યો ઽયં સુગતો નાથઃ સર્વસત્ત્વાનુકમ્પકઃ ।
કો હ્ય્ અસ્તિ ત્રિજગલ્લોકે બુદ્ધાદ્ અન્યો હિતંકરઃ

બુદ્ધ એવ જગચ્છાસ્તા સર્વભદ્રાર્થસાધકઃ ।
દુર્ગતિત્રાયકો નાથઃ સદ્ગતેર્ માર્ગદર્શકઃ

તદ્ એતસ્ય વયં સર્વાઃ સર્વદા શરણં ગતાઃ ।
સત્કૃત્ય શ્રદ્ધયા ભક્ત્ય યથાશક્તિ ભજેમહિ

તતો નૂનં વયં સર્વાઃ સર્વપાપવિમોચિતાઃ ।
પરિશુદ્ધત્રિકાયા હિ સદ્ગતિં ચ વ્રજેમહિ

એતત્ તયા સમાખ્યાતં શ્રુત્વા તાઃ પરિબોધિતાઃ ।
સર્વા અપિ મુનેસ્ તસ્ય તથા ભક્તું સમીષિરે

તતસ્ તાઃ કન્યકાઃ સર્વાઃ શ્રદ્ધાભક્તિસમન્વિતાઃ ।
યથાશક્તિ મુનેસ્ તસ્ય સત્કારૈઃ પ્રાભજન્ મુદા

તતસ્ તાઃ શરણં ગત્વા કૃતાઞ્જલિપુટા મુદા ।
ત્રિધા પ્રદક્ષિણીકૃત્ય નત્વૈવં પ્રાર્થયંસ્ તથા

ભગવન્ નાથ સર્વજ્ઞ ભવતાં સર્વદા વયમ્ ।
શરણસ્થા યથાદેશમ્ ઇચ્છામશ્ ચરિતું તથા

તદ્ ભવાન્ કૃપયા દૃષ્ટ્યા પશ્યન્ન્ અસ્માન્ સુદુઃખિતાઃ ।
સર્વદાપિ તથા સર્વાઃ પરિત્રાતું સમર્હતિ

નાન્યો નો વિદ્યતે ત્રાતા નાથો મિત્રં સુહૃદ્ ગુરુઃ ।
ભવાન્ એવ ગુરુઃ શાસ્તા સદ્ધર્મદેશકઃ પ્રભુઃ

તદ્ અસ્માન્ દુઃખિનીઃ સર્વાઃ સંપશ્યન્ કરુણાદૃશા ।
બોધિમાર્ગે પ્રતિષ્ઠાપ્ય સદૈવં ત્રાતુમ્ અર્હતિ

એતત્ સંપ્રાર્થિતં તાભિઃ શ્રુત્વા સો ઽર્હન્ મહામતિઃ ।
પ્રત્યેકસુગતો જ્ઞાત્વા તાસાં કર્મવિપાકતામ્

તત આકાશ ઉત્પ્લુત્ય સ્થિત્વા વહ્નિર્ ઇવોજ્જ્વલન્ ।
તચ્ચિત્તસંવિનોદાર્થં પ્રાતિહાર્યમ્ અદર્શયત્