Ahorātravratacaityasevānuśaṃsāvadāna · Verses 282-301

tat paredyuś ca sā mātā hatvāpi jīvino jhaṣān /
dattvā tān dārikās tāś ca vikrayāyairayat pure

mātrā tathā kṛtaṃ matvā sarvās tāḥ kanyakā api /
tat kukarma iti dhyātvā tasthuḥ pāpaviṣāditāḥ

tathā sthitāś ca tāḥ sarvā dṛṣṭvā sā jananī ruṣā /
bahuśaḥ paribhāṣitvā pratāḍya prairayat pure

tatas tā dārikāḥ sarvās tattāḍanarujānvitāḥ /
viṣaṇṇās tāñ jhaṣān dhṛtvā vikretuṃ niryayuḥ śanaiḥ

tatas tā nirgatāḥ sarvās tanmārgasarasītaṭe /
mātṛtāḍanaduḥkhārtā viśramya kṣaṇam āśrayan

tatra tāḥ kanyakāḥ sarvās tatpāpapariśodhane /
triratnasmaraṇaṃ kṛtvā tasthur dhyānasamāhitāḥ

tatpuṇyapariśuddhās tā vālukābhiḥ pṛthak pṛthak /
caityaṃ nirmāya satkṛtya pratiṣṭhāpya pramoditāḥ

tatrotpannāni puṣpāṇi phalāni ca samantataḥ /
ādāya taiḥ phalaiḥ puṣpaiḥ svasvacaityaṃ samarcayan

tatas tāḥ prāñjaliṃ dhṛtvā kṛtvā pradakṣiṇāni ca /
aṣṭāṅgapraṇatiṃ kṛtvā tasthur dhyānasamāhitāḥ

taddinānte 'pi tāḥ sarvā gṛhe naivāgatā iti /
mātā vicintya bhartāraṃ sahasā caivam abravīt

svāmiṃs tā dārikāḥ sarvā adyāpi nāgatā gṛhe /
kutra gatā iti draṣṭuṃ gaccha tvaṃ sahasānaya

etat patnyoditaṃ śrutvā sa caṇḍālaḥ prakopitaḥ /
sahasā tatsarastīre gacchan sarvā dadarśa tāḥ

tatra tāś caityam abhyarcya sthitāḥ sarvā vilokya saḥ /
pitātikopasaṃtaptaḥ sahasā saṃmukho 'carat

tatra tāḥ kanyakāḥ sarvā dṛṣṭvā taṃ saṃmukhāgatam /
krodhasaṃtaptaraktākṣaṃ tasthur dhyānasamāhitāḥ

tathā sthitāḥ sa ālokya sarvās tāḥ svātmajā api /
nirdayo bahudhā bhartsya laguḍenāpy atāḍayat

tathātitāḍitāḥ sarvā api tā na vicerire /
tatpāpatrasitā eva tasthur dhyānasamāhitāḥ

tataḥ sa janakaḥ krūraḥ saṃtāḍya paribhāṣya ca /
sarvā ādāya tān mīnān sahasā tatpure 'carat

tatra vikrīya tān mīnān annam ādāya satvaraḥ /
gṛhe patnyāḥ puro gatvā tac caritraṃ nyavedayat

tatra tattāḍanodbhūtaduḥsahavedanāturāḥ /
bhuvy āvartya rudantyas tāḥ sarvās tasthur vimūrchitāḥ

tadantikagireḥ sānau niṣaṇṇaḥ karuṇānidhiḥ /
pratyekabuddha ātmajñaḥ śuśrāva tadvilāpitam