અહોરાત્રવ્રતચૈત્યસેવાનુશંસાવદાન · શ્લોક 282-301

તત્ પરેદ્યુશ્ ચ સા માતા હત્વાપિ જીવિનો ઝષાન્ ।
દત્ત્વા તાન્ દારિકાસ્ તાશ્ ચ વિક્રયાયૈરયત્ પુરે

માત્રા તથા કૃતં મત્વા સર્વાસ્ તાઃ કન્યકા અપિ ।
તત્ કુકર્મ ઇતિ ધ્યાત્વા તસ્થુઃ પાપવિષાદિતાઃ

તથા સ્થિતાશ્ ચ તાઃ સર્વા દૃષ્ટ્વા સા જનની રુષા ।
બહુશઃ પરિભાષિત્વા પ્રતાડ્ય પ્રૈરયત્ પુરે

તતસ્ તા દારિકાઃ સર્વાસ્ તત્તાડનરુજાન્વિતાઃ ।
વિષણ્ણાસ્ તાઞ્ ઝષાન્ ધૃત્વા વિક્રેતું નિર્યયુઃ શનૈઃ

તતસ્ તા નિર્ગતાઃ સર્વાસ્ તન્માર્ગસરસીતટે ।
માતૃતાડનદુઃખાર્તા વિશ્રમ્ય ક્ષણમ્ આશ્રયન્

તત્ર તાઃ કન્યકાઃ સર્વાસ્ તત્પાપપરિશોધને ।
ત્રિરત્નસ્મરણં કૃત્વા તસ્થુર્ ધ્યાનસમાહિતાઃ

તત્પુણ્યપરિશુદ્ધાસ્ તા વાલુકાભિઃ પૃથક્ પૃથક્ ।
ચૈત્યં નિર્માય સત્કૃત્ય પ્રતિષ્ઠાપ્ય પ્રમોદિતાઃ

તત્રોત્પન્નાનિ પુષ્પાણિ ફલાનિ ચ સમન્તતઃ ।
આદાય તૈઃ ફલૈઃ પુષ્પૈઃ સ્વસ્વચૈત્યં સમર્ચયન્

તતસ્ તાઃ પ્રાઞ્જલિં ધૃત્વા કૃત્વા પ્રદક્ષિણાનિ ચ ।
અષ્ટાઙ્ગપ્રણતિં કૃત્વા તસ્થુર્ ધ્યાનસમાહિતાઃ

તદ્દિનાન્તે ઽપિ તાઃ સર્વા ગૃહે નૈવાગતા ઇતિ ।
માતા વિચિન્ત્ય ભર્તારં સહસા ચૈવમ્ અબ્રવીત્

સ્વામિંસ્ તા દારિકાઃ સર્વા અદ્યાપિ નાગતા ગૃહે ।
કુત્ર ગતા ઇતિ દ્રષ્ટું ગચ્છ ત્વં સહસાનય

એતત્ પત્ન્યોદિતં શ્રુત્વા સ ચણ્ડાલઃ પ્રકોપિતઃ ।
સહસા તત્સરસ્તીરે ગચ્છન્ સર્વા દદર્શ તાઃ

તત્ર તાશ્ ચૈત્યમ્ અભ્યર્ચ્ય સ્થિતાઃ સર્વા વિલોક્ય સઃ ।
પિતાતિકોપસંતપ્તઃ સહસા સંમુખો ઽચરત્

તત્ર તાઃ કન્યકાઃ સર્વા દૃષ્ટ્વા તં સંમુખાગતમ્ ।
ક્રોધસંતપ્તરક્તાક્ષં તસ્થુર્ ધ્યાનસમાહિતાઃ

તથા સ્થિતાઃ સ આલોક્ય સર્વાસ્ તાઃ સ્વાત્મજા અપિ ।
નિર્દયો બહુધા ભર્ત્સ્ય લગુડેનાપ્ય્ અતાડયત્

તથાતિતાડિતાઃ સર્વા અપિ તા ન વિચેરિરે ।
તત્પાપત્રસિતા એવ તસ્થુર્ ધ્યાનસમાહિતાઃ

તતઃ સ જનકઃ ક્રૂરઃ સંતાડ્ય પરિભાષ્ય ચ ।
સર્વા આદાય તાન્ મીનાન્ સહસા તત્પુરે ઽચરત્

તત્ર વિક્રીય તાન્ મીનાન્ અન્નમ્ આદાય સત્વરઃ ।
ગૃહે પત્ન્યાઃ પુરો ગત્વા તચ્ ચરિત્રં ન્યવેદયત્

તત્ર તત્તાડનોદ્ભૂતદુઃસહવેદનાતુરાઃ ।
ભુવ્ય્ આવર્ત્ય રુદન્ત્યસ્ તાઃ સર્વાસ્ તસ્થુર્ વિમૂર્છિતાઃ

તદન્તિકગિરેઃ સાનૌ નિષણ્ણઃ કરુણાનિધિઃ ।
પ્રત્યેકબુદ્ધ આત્મજ્ઞઃ શુશ્રાવ તદ્વિલાપિતમ્