Ahorātravratacaityasevānuśaṃsāvadāna · Verses 262-281

tatrāsan daivayogāt te mīnāḥ sarve sajīvitāḥ /
tān sarvāñ jīvitān dṛṣṭvā sarvās tā vismayaṃ yayuḥ

tatra tāḥ kanyakāḥ sarvāḥ samālokya parasparam /
katham adyātra kuryāma ity uktvaivāvatasthire

tatra tāsāṃ pradhānā sā kanyā śuddhāśayā sudhīḥ /
tāḥ sarvā bhaginīr dṛṣṭvā samāśvāsyaivam abravīt

bhaginyo yad ime mīnāḥ sarve 'pi jīvinaḥ khalu /
tat kathaṃ jīvino 'py atra vikrīṇīmahi sāṃpratam

tasmāt sarvān imān matsyān prakṣiptvātra sarijjale /
triratnasmaraṇaṃ kṛtvā tiṣṭhemātraikavāsaram

yadi gṛhe gamiṣyāmo riktahastā vinā paṇam /
mātā ruṣṭā parikruśya sarvā nas tāḍayet khalu

yac cāpy adya gṛhe kiṃ cid bhojyaṃ na vidyate kva cit /
tat kiṃ mātānnam aśnīyād bubhukṣitā caret krudhā

asmabhyaṃ cāpi kiṃ dadyād annaṃ pānaṃ ca kopitā /
paribhāṣya muhur bālā api niṣkāsayed gṛhāt

tad adya kiṃ gṛhe gatvā sarvā apīha saṃgatāḥ /
triratnasmaraṇaṃ kṛtva tiṣṭhemahi dināntataḥ

etat tayoditaṃ śrutvā sarvās tā dārikā api /
tatheti saṃmataṃ kṛtvā sarvān mīnāñ jale 'kṣipan

tatra tāḥ kanyakāḥ sarvaḥ sarittaṭasamāśritāḥ /
triratnasmaraṇaṃ kṛtvā dhyātvā tasthuḥ samāhitāḥ

kena cit kathitaṃ tāsām etadvṛttiṃ niśamya sā /
mātā krodhāgnisaṃtaptā vegāt tatra ruṣācarat

tatra tā dārikāḥ sarvās tathā sthitā nirīkṣya sā /
jananī sahasopetya paribhāṣyaivam abravīt

are re durbhagā bālāḥ kim evam iha saṃsthitāḥ /
pradoṣe 'pi gṛhe kena hetunā na samāgatāḥ

kim etān sakalān mīnān avikrīya vimuñcatha /
kiṃ cid annaṃ gṛhe nāsti tat kiṃ bhokṣyāmahe 'dhunā

kasyopadeśam ākarṇya kuladharmanirādarāḥ /
pitror api vaco 'śrutvā krīḍathaivaṃ tad ucyatām

evam ukte tayā mātrā sarvās tāḥ kanyakā api /
adhomukhasthitāḥ kiṃ cid api nocur viṣāditāḥ

tathā sthitāḥ svaputrīs tā dṛṣṭvā sā jananī ruṣā /
sahasā samupākramya laguḍenābhyatāḍayat

tataḥ sā jananī dṛṣṭvā sarvās tās trasitānanāḥ /
bodhayitvā prayatnena nināya svagṛhe niśi

tatra tāḥ kanyakāḥ sarvāḥ svagṛhe saṃsthitāḥ niśi /
abhuktvaikāntam āśritya tasthuḥ smṛtvā munīśvaram