અહોરાત્રવ્રતચૈત્યસેવાનુશંસાવદાન · શ્લોક 262-281

તત્રાસન્ દૈવયોગાત્ તે મીનાઃ સર્વે સજીવિતાઃ ।
તાન્ સર્વાઞ્ જીવિતાન્ દૃષ્ટ્વા સર્વાસ્ તા વિસ્મયં યયુઃ

તત્ર તાઃ કન્યકાઃ સર્વાઃ સમાલોક્ય પરસ્પરમ્ ।
કથમ્ અદ્યાત્ર કુર્યામ ઇત્ય્ ઉક્ત્વૈવાવતસ્થિરે

તત્ર તાસાં પ્રધાના સા કન્યા શુદ્ધાશયા સુધીઃ ।
તાઃ સર્વા ભગિનીર્ દૃષ્ટ્વા સમાશ્વાસ્યૈવમ્ અબ્રવીત્

ભગિન્યો યદ્ ઇમે મીનાઃ સર્વે ઽપિ જીવિનઃ ખલુ ।
તત્ કથં જીવિનો ઽપ્ય્ અત્ર વિક્રીણીમહિ સાંપ્રતમ્

તસ્માત્ સર્વાન્ ઇમાન્ મત્સ્યાન્ પ્રક્ષિપ્ત્વાત્ર સરિજ્જલે ।
ત્રિરત્નસ્મરણં કૃત્વા તિષ્ઠેમાત્રૈકવાસરમ્

યદિ ગૃહે ગમિષ્યામો રિક્તહસ્તા વિના પણમ્ ।
માતા રુષ્ટા પરિક્રુશ્ય સર્વા નસ્ તાડયેત્ ખલુ

યચ્ ચાપ્ય્ અદ્ય ગૃહે કિં ચિદ્ ભોજ્યં ન વિદ્યતે ક્વ ચિત્ ।
તત્ કિં માતાન્નમ્ અશ્નીયાદ્ બુભુક્ષિતા ચરેત્ ક્રુધા

અસ્મભ્યં ચાપિ કિં દદ્યાદ્ અન્નં પાનં ચ કોપિતા ।
પરિભાષ્ય મુહુર્ બાલા અપિ નિષ્કાસયેદ્ ગૃહાત્

તદ્ અદ્ય કિં ગૃહે ગત્વા સર્વા અપીહ સંગતાઃ ।
ત્રિરત્નસ્મરણં કૃત્વ તિષ્ઠેમહિ દિનાન્તતઃ

એતત્ તયોદિતં શ્રુત્વા સર્વાસ્ તા દારિકા અપિ ।
તથેતિ સંમતં કૃત્વા સર્વાન્ મીનાઞ્ જલે ઽક્ષિપન્

તત્ર તાઃ કન્યકાઃ સર્વઃ સરિત્તટસમાશ્રિતાઃ ।
ત્રિરત્નસ્મરણં કૃત્વા ધ્યાત્વા તસ્થુઃ સમાહિતાઃ

કેન ચિત્ કથિતં તાસામ્ એતદ્વૃત્તિં નિશમ્ય સા ।
માતા ક્રોધાગ્નિસંતપ્તા વેગાત્ તત્ર રુષાચરત્

તત્ર તા દારિકાઃ સર્વાસ્ તથા સ્થિતા નિરીક્ષ્ય સા ।
જનની સહસોપેત્ય પરિભાષ્યૈવમ્ અબ્રવીત્

અરે રે દુર્ભગા બાલાઃ કિમ્ એવમ્ ઇહ સંસ્થિતાઃ ।
પ્રદોષે ઽપિ ગૃહે કેન હેતુના ન સમાગતાઃ

કિમ્ એતાન્ સકલાન્ મીનાન્ અવિક્રીય વિમુઞ્ચથ ।
કિં ચિદ્ અન્નં ગૃહે નાસ્તિ તત્ કિં ભોક્ષ્યામહે ઽધુના

કસ્યોપદેશમ્ આકર્ણ્ય કુલધર્મનિરાદરાઃ ।
પિત્રોર્ અપિ વચો ઽશ્રુત્વા ક્રીડથૈવં તદ્ ઉચ્યતામ્

એવમ્ ઉક્તે તયા માત્રા સર્વાસ્ તાઃ કન્યકા અપિ ।
અધોમુખસ્થિતાઃ કિં ચિદ્ અપિ નોચુર્ વિષાદિતાઃ

તથા સ્થિતાઃ સ્વપુત્રીસ્ તા દૃષ્ટ્વા સા જનની રુષા ।
સહસા સમુપાક્રમ્ય લગુડેનાભ્યતાડયત્

તતઃ સા જનની દૃષ્ટ્વા સર્વાસ્ તાસ્ ત્રસિતાનનાઃ ।
બોધયિત્વા પ્રયત્નેન નિનાય સ્વગૃહે નિશિ

તત્ર તાઃ કન્યકાઃ સર્વાઃ સ્વગૃહે સંસ્થિતાઃ નિશિ ।
અભુક્ત્વૈકાન્તમ્ આશ્રિત્ય તસ્થુઃ સ્મૃત્વા મુનીશ્વરમ્