Ahorātravratacaityasevānuśaṃsāvadāna · Verses 222-241

tataḥ sā dhīvarī dṛṣṭvā śambukās tāḥ puro 'rpitāḥ /
bubhukṣitānupaśyantī niḥśvasanty evam ālapat

hā kaṣṭaṃ kiṃ karomy adya bhojyaṃ kiṃ cin na me gṛhe /
kaḥ krīṇīyād imāḥ śuktīr jīveyaṃ katham atra hi

tad imāḥ śambukāḥ sarvāḥ paktvā bhuñjyām ihādhunā /
etadāhāramātreṇa yāpayeyaṃ na cānyathā

iti niścitya sā nārī sarvās tāḥ śambukā api /
rasair yutāḥ svayaṃ paktvā bubhuje jīvitārthinī

tatas tāḥ śambukāḥ sarvā daivayogānucāriṇaḥ /
tasyā evodare yātā babhūvur ekapiṇḍitāḥ

tataḥ sāpannasattvābhūt pravṛddhagarbhabhāriṇī /
dine dine 'bhiruṣṭāṅgī svalpāhāraratā kṛśā

tataḥ sā samaye 'sūta kanyakā hy aṣṭa sundarīḥ /
ekanāḍīsamudbhūtāḥ samākārāḥ śubhāṃśikāḥ

tatra sā jananī dṛṣṭvā hy aṣṭa tāḥ sundarīḥ śiśūḥ /
samākārāḥ subhadrāṅgīḥ paśyantī vismayaṃ yayau

tataḥ sa janakaḥ śrutvā jātā hy aṣṭa sutā iti /
vismitaḥ sahasopetya paśyaṃs tasthau suniścalaḥ

tatas tā dārikāḥ sarvās tayā mātrābhipālitāḥ /
pravardhitāḥ prapuṣṭāṅgā rurucuḥ paṅkajā iva

tatas tāḥ kanyakāḥ sarvāḥ pūrvapuṇyānubhāvikāḥ /
prītiviśrambhasaṃbuddhā dharmārthābhiratāśayāḥ

svakulavṛttisaṃtrastā dayārdrāḥ karuṇānvitāḥ /
triratnadarśanotsāhasamanvitāḥ pracerire

atha mātā samāhūya tāḥ sarvāḥ kanyakā api /
matsyānāṃ vikrayārthena prairayat paṇyavīthikām

tatas tāḥ kanyakāḥ sarvā ādāya matsyabhājanam /
vikretuṃ saṃcarantyas tatpuramārgam upācaran

tatra tāḥ kramato gatvā mārgādūrasarittaṭe /
kṣaṇaṃ viśramya sarvās tad ālokyaiva samāśrayan

tatra tāsāṃ pradhāna yā jyeṣṭhā sā bhaginī sudhīḥ /
tāḥ sarvā bhaginīr dṛṣṭvā samāmantryaitad abravīt

bhaginyo yat purāsmābhiḥ pātakaṃ dāruṇaṃ kṛtam /
tenātra sāmprataṃ jātāś caṇḍālasya kule vayam

iti satyaṃ parijñāya viramya pāpakarmataḥ /
dharmārthasādhane rantum arhāmahe vayaṃ sadā

ihāpi cet tathāsmābhiḥ kriyate pāpasādhanam /
bhūyo 'pi narake lagnā duḥkhaṃ bhuktvā caremahi

kadā vayaṃ tato muktāḥ sukhaṃ lapsyāmahe katham /
sadaivaṃ durgatau jātāḥ pāpeṣv eva caremahi