Ahorātravratacaityasevānuśaṃsāvadāna · Verses 202-221

are duṣṭāḥ supāpinyo yad yuṣmākaṃ viṣānalaiḥ /
tāpitāḥ smas tadapuṇyair yūyaṃ bhavata śambukāḥ

iti tair ṛṣibhiḥ sarvaiḥ śāpitās ta bhayānvitāḥ /
sarvān ṛṣivarān natvā prārthayann evam ādarāt

namo vo 'stu mahāvijñāḥ kṣamadhvaṃ no 'parādhatām /
tacchāpamocanopāyaṃ samupadeṣṭum arhatha

iti saṃprārthitaṃ tābhir niśamya te maharṣayaḥ /
karuṇākrāntacittās tāḥ samālokyaivam abruvan

śṛṇudhvaṃ śambukā yūyam upāyaṃ śāpamuktaye /
asmābhir deśitaṃ śrutvā tathā carata sādaram

caityabimbaṃ samālambya tad anusmṛtya cetasā /
sadā pradakṣiṇāṃ kṛtvā bhramitvā bhajatādṛtāḥ

tadā tatpuṇyabhāvena sarvapāpavimocitāḥ /
pariśuddhāśayā bhadrā bhaviṣyatha nṛpātmajāḥ

tadāpi hi tathā yūyaṃ caityasevāsamāhitāḥ /
saddharmasādhanaṃ kṛtvā prayāsyatha jinālayam

iti tair ṛṣibhiḥ satyaṃ samādiṣṭaṃ niśamya tāḥ /
śambukās tān ṛṣīn natvā tato 'gacchan nijālayam

tatas tāḥ śambukāḥ sarvāḥ śālikṣetram upāsṛtāḥ /
caityabimbam anusmṛtya praviceruḥ samantataḥ

tatra vicchinnaśeṣāṃśaṃ śālistambaṃ vilokya tāḥ /
caityākāraṃ samālambya saṃsmṛtvā sugatālayam

sadā pradakṣiṇīkṛtya praṇatvā ca muhur muhuḥ /
caityānusmṛtim ādhāya bhramitvā saṃprabhejire

tatra tāḥ śambukāḥ sarvās tatpuṇyapariśodhitāḥ /
tacchāpaparimuktyarthaṃ caityaṃ smṛtvā pracerire

kadā cit tatra matsyārthī dhīvaraḥ krūramānasaḥ /
tatsarasi sthitān mīnān samāhartum upācarat

tatra sa dhīvaro dṛṣṭvā mīnāharaṇalālasaḥ /
tīrastho jālam utkṣipya mīnān āhartum udyayau

tatra jāle pratikṣipte śambukā daivayogataḥ /
sarvā api praviṣṭās tā na tu matsyo hi kaś cana

tataḥ sa jālam ākṛṣya pravisārya vilokayan /
dadarśa śambukā eva tatra matsyaṃ na kaṃ cana

atha so 'prāptamatsyas tāḥ śambukā eva lubdhakaḥ /
ādāya parikhinnātmā svagṛhaṃ śanakair yayau

tatra sa svagṛhaprāpto viṣannāsyo nirāśitaḥ /
patnyāḥ sundarikāyās tāḥ śambukāḥ purato 'rpayat

tataḥ sa dhīvaro 'nyatra mīnān āhartum udyataḥ /
bhuktvāhāraṃ yathāprāptaṃ jālam ādāya niryayau