અહોરાત્રવ્રતચૈત્યસેવાનુશંસાવદાન · શ્લોક 222-241

તતઃ સા ધીવરી દૃષ્ટ્વા શમ્બુકાસ્ તાઃ પુરો ઽર્પિતાઃ ।
બુભુક્ષિતાનુપશ્યન્તી નિઃશ્વસન્ત્ય્ એવમ્ આલપત્

હા કષ્ટં કિં કરોમ્ય્ અદ્ય ભોજ્યં કિં ચિન્ ન મે ગૃહે ।
કઃ ક્રીણીયાદ્ ઇમાઃ શુક્તીર્ જીવેયં કથમ્ અત્ર હિ

તદ્ ઇમાઃ શમ્બુકાઃ સર્વાઃ પક્ત્વા ભુઞ્જ્યામ્ ઇહાધુના ।
એતદાહારમાત્રેણ યાપયેયં ન ચાન્યથા

ઇતિ નિશ્ચિત્ય સા નારી સર્વાસ્ તાઃ શમ્બુકા અપિ ।
રસૈર્ યુતાઃ સ્વયં પક્ત્વા બુભુજે જીવિતાર્થિની

તતસ્ તાઃ શમ્બુકાઃ સર્વા દૈવયોગાનુચારિણઃ ।
તસ્યા એવોદરે યાતા બભૂવુર્ એકપિણ્ડિતાઃ

તતઃ સાપન્નસત્ત્વાભૂત્ પ્રવૃદ્ધગર્ભભારિણી ।
દિને દિને ઽભિરુષ્ટાઙ્ગી સ્વલ્પાહારરતા કૃશા

તતઃ સા સમયે ઽસૂત કન્યકા હ્ય્ અષ્ટ સુન્દરીઃ ।
એકનાડીસમુદ્ભૂતાઃ સમાકારાઃ શુભાંશિકાઃ

તત્ર સા જનની દૃષ્ટ્વા હ્ય્ અષ્ટ તાઃ સુન્દરીઃ શિશૂઃ ।
સમાકારાઃ સુભદ્રાઙ્ગીઃ પશ્યન્તી વિસ્મયં યયૌ

તતઃ સ જનકઃ શ્રુત્વા જાતા હ્ય્ અષ્ટ સુતા ઇતિ ।
વિસ્મિતઃ સહસોપેત્ય પશ્યંસ્ તસ્થૌ સુનિશ્ચલઃ

તતસ્ તા દારિકાઃ સર્વાસ્ તયા માત્રાભિપાલિતાઃ ।
પ્રવર્ધિતાઃ પ્રપુષ્ટાઙ્ગા રુરુચુઃ પઙ્કજા ઇવ

તતસ્ તાઃ કન્યકાઃ સર્વાઃ પૂર્વપુણ્યાનુભાવિકાઃ ।
પ્રીતિવિશ્રમ્ભસંબુદ્ધા ધર્માર્થાભિરતાશયાઃ

સ્વકુલવૃત્તિસંત્રસ્તા દયાર્દ્રાઃ કરુણાન્વિતાઃ ।
ત્રિરત્નદર્શનોત્સાહસમન્વિતાઃ પ્રચેરિરે

અથ માતા સમાહૂય તાઃ સર્વાઃ કન્યકા અપિ ।
મત્સ્યાનાં વિક્રયાર્થેન પ્રૈરયત્ પણ્યવીથિકામ્

તતસ્ તાઃ કન્યકાઃ સર્વા આદાય મત્સ્યભાજનમ્ ।
વિક્રેતું સંચરન્ત્યસ્ તત્પુરમાર્ગમ્ ઉપાચરન્

તત્ર તાઃ ક્રમતો ગત્વા માર્ગાદૂરસરિત્તટે ।
ક્ષણં વિશ્રમ્ય સર્વાસ્ તદ્ આલોક્યૈવ સમાશ્રયન્

તત્ર તાસાં પ્રધાન યા જ્યેષ્ઠા સા ભગિની સુધીઃ ।
તાઃ સર્વા ભગિનીર્ દૃષ્ટ્વા સમામન્ત્ર્યૈતદ્ અબ્રવીત્

ભગિન્યો યત્ પુરાસ્માભિઃ પાતકં દારુણં કૃતમ્ ।
તેનાત્ર સામ્પ્રતં જાતાશ્ ચણ્ડાલસ્ય કુલે વયમ્

ઇતિ સત્યં પરિજ્ઞાય વિરમ્ય પાપકર્મતઃ ।
ધર્માર્થસાધને રન્તુમ્ અર્હામહે વયં સદા

ઇહાપિ ચેત્ તથાસ્માભિઃ ક્રિયતે પાપસાધનમ્ ।
ભૂયો ઽપિ નરકે લગ્ના દુઃખં ભુક્ત્વા ચરેમહિ

કદા વયં તતો મુક્તાઃ સુખં લપ્સ્યામહે કથમ્ ।
સદૈવં દુર્ગતૌ જાતાઃ પાપેષ્વ્ એવ ચરેમહિ