Ahorātravratacaityasevānuśaṃsāvadāna · Verses 1-20

Ahorātravratacaityasevānuśaṃsāvadāna
oṃ namo ratnatrayāya /
śrīmad ratnatrayaṃ natvā tridhātubhuvanādhipam /
ahorātravratakathāṃ vakṣye gurūpadeśataḥ

kukkuṭārāmam āsīnam upaguptaṃ yatīśvaram /
kṛtāñjalipuṭo 'śokaḥ prārthayad evam ādarāt

{A different verse in BCDE as follows:
athāśoko mahīpāla upaguptaṃ yatiṃ ca tam /
kṛtāñjalipuṭo natvā prārthayad evam ādarāt // Avc_2* //}
bhadanta śrotum icchāmi caityavratavidhiṃ punaḥ /
ahorātravratasyāpi vidhiṃ puṇyāni sadguro

tad bhavān sadguruḥ śāstā lokapuṇyapravṛddhaye /
ahorātravratasyātra vidhim ādeṣṭum arhati

iti tena narendreṇa prārthitaṃ sa sudhīr yatiḥ /
śrutvā taṃ nṛpam ālokya punar evam upādiśat

śṛṇu sādhu mahārāja yathā me guruṇoditam /
tathāhaṃ te pravakṣyāmi śrutvā caivaṃ samācara

purā sa bhagavāñ chāstā śākyasiṃho jagadguruḥ /
śrāvakair bhikṣubhiḥ sārdhaṃ cailakaiś cāpy upāsakaiḥ

bhikṣuṇībhiḥ suśīlābhir bodhisattvagaṇair api /
vihāre jetakāraṇye vyaharat saugatāśrame

tadā sa bhagavān buddho lokānāṃ puṇyavṛddhaye /
sabhāmadhye samāsīno dharmam ādeṣṭum ārabhat

tadā sarve 'marendrādilokapālā maharddhikāḥ /
tat saddharmāmṛtaṃ pātuṃ śraddhayā samupāgatāḥ

brahmādibrāhmaṇāś cāpi maharṣayas tapasvinaḥ /
catvāraś ca mahārājāḥ sasainyaparicārakāḥ

daityendrā nāgarājāś ca yakṣagandharvakinnarāḥ /
siddhā vidyādharāḥ sādhyā grahāś ca vasavas tathā

rākṣasāś ca mahāvirā garuḍāś ca mahoragāḥ /
yogino yatayaś cāpi rājānaḥ kṣātriyā api

amātyā mantriṇaś cāpi vaiśyā rājakumārakāḥ /
śreṣṭhino dhaninaḥ śūdrāḥ sārthavāhā māhājanāḥ

vaṇijaḥ śilpinaś cāpi paurā janapadās tathā /
grāmyāḥ kārvaṭikāś cāpi tathānyadeśavāsinaḥ

sarve te samupāgatya buddhaṃ taṃ śṛīghanaṃ mudā /
satkṛtya śraddhayābhyarcya kṛtvā pradakṣiṇāny api

kṛtāñjalipuṭā natvā niṛīkṣya saṃpramoditāḥ /
tat saddharmāmṛtaṃ pātum upatasthuḥ samāhitāḥ

tadāsanāt samutthāya subhūtiḥ sthaviro yatiḥ /
udvahann uttarāsaṅgaṃ jānubhyāṃ bhuvi saṃsthitaḥ

kṛtāñjalipuṭo natvā bhagavantaṃ jagadgurum /
śrīghanaṃ taṃ samālokya prārthayad evam ādarāt

bhagavan nātha sarvajña vijānīyād bhavān guruḥ /
sarvalokā ime śāstur dharmaṃ śrotuṃ samāsthitāḥ