અહોરાત્રવ્રતચૈત્યસેવાનુશંસાવદાન · શ્લોક 21-40

તદ્ અત્ર ભુવને ખ્યાતમ્ અહોરાત્રવ્રતં કદા ।
પ્રવર્તતે તદ્ આખ્યાહિ તદ્વિધિં ચ કથં પ્રભો

ઇતિ તેનાર્હતા પૃષ્ટે ભગવાન્ સ મુનીશ્વરઃ ।
તાં સભાં તં સુભૂતિં ચ સમાલોક્યૈવમ્ અબ્રવીત્

સાધુ શૃણુ સુભૂતે ત્વં સર્વસત્ત્વહિતાર્થભૃત્ ।
અહોરાત્રવ્રતં પુણ્યં વિધિં ચ કથ્યતે મયા

પુરા પૂર્વવિદેહે ઽભૂત્ ખ્યાતા ગન્ધવતી પુરી ।
તસ્યાં રાજા મહાવિજ્ઞ ઇન્દ્રપ્ષ્ટાભિધઃ પ્રભુઃ

સો ઽન્તઃપુરે સમાનીય વસુબન્ધું જિનાત્મજમ્ ।
સભાયાં સ્વાસને સ્થાપ્ય સત્કૃત્ય શ્રદ્ધયાર્ચયત્

તતઃ સ ભૂપતી રાજા ઉત્થાય સમુપાશ્રિતઃ ।
કૃતાઞ્જલિઃ પ્રણત્વૈનં પ્રાર્થયદ્ એવમ્ આદરાત્

ભદન્ત યદ્ ઇમે લોકા અસદ્ધર્માભિમાનિનઃ ।
તદ્ એષાં માનઘાતાય સદ્ધર્મં સમુપાદિશ

યચ્ છ્રુત્વૈવ ત્વ્ ઇમે સર્વે સદ્ધર્મપ્રતિબોધિતાઃ ।
સર્વપાપવિનિર્મુક્તા ભવેયુર્ બોધિલાભિનઃ

ઇતિ રાજ્ઞાર્થિતં શ્રુત્વા વસુબન્ધુઃ સ આત્મવિત્ ।
ઇન્દ્રપૃષ્ટં મહીન્દ્રં તં સમાલોક્યૈવમ્ અબ્રવીત્

શૃણુ સાધુ મહારાજા તવ પુણ્યપ્રવૃદ્ધયે ।
સર્વસત્ત્વહિતાર્થં તદ્ અહોરાત્રમહાવ્રતમ્

યથા મયા શ્રુતં પૂર્વં વિપશ્યિના પ્રભાષિતમ્ ।
મહત્પુણ્યાનુશંસા ચ તદ્વિધિશ્ ચ પ્રચક્ષ્યતે

સંસારે ઽત્ર મહત્ પુણ્યં પ્રાપ્તુમ્ ઇચ્છન્તિ યે નરાઃ ।
ચરિતવ્યમ્ અહોરાત્રવ્રતં તૈઃ શ્રદ્ધયા મુદા

ભક્ત્યા ચરન્તિ યે મર્ત્યા અહોરાત્રવ્રતં મુદા ।
તે સર્વે વિમલાત્માનઃ પરિશુદ્ધત્રિમણ્ડલાઃ

બોધિચિત્તં સમાસાદ્ય ચરિત્વા બોધિચારિકામ્ ।
સર્વસત્ત્વહિતં કૃત્વા પૂર્ય પારમિતાઃ ક્રમાત્

સર્વક્લેશગણાઞ્ જિત્વા સર્વમારગણાન્ અપિ ।
સમ્યગ્બોધિં સમાસાદ્ય ભવેયુઃ સુગતા ધ્રુવમ્

અતીતૈશ્ ચ જિનૈઃ સર્વૈઃ કૃત્વૈતદ્ વ્રતમ્ ઉત્તમમ્ ।
સર્વમારગણાઞ્ જિત્વા સંબોધિઃ સાધિતા ખલુ

વર્તમાનૈશ્ ચ સંબુદ્ધૈઃ સર્વૈર્ એતદ્ વ્રતં કૃતમ્ ।
એતત્પુણ્યાનુભાવૈર્ હિ સંબોધિઃ સાધિતા દ્રુતમ્

તથા ચાનાગતૈઃ સર્વૈઃ કૃત્વા ચૈતદ્ વ્રતં વરમ્ ।
એતત્પુણ્યવિપાકૈસ્ તુ પ્રાપ્સ્યતે બોધિર્ ઉત્તમા

તથાન્યે બોધિસત્ત્વાશ્ ચ સંબોધિવ્રતચારકાઃ ।
એતદ્ વ્રતવરં ધૃત્વા ચરન્તિ બોધિસંવરમ્

તથા સર્વે ઽમરેન્દ્રાશ્ ચ કૃત્વા ચૈતદ્ વ્રતં મુદા ।
દેવલોકાધિનાથાસ્ તે ભવન્તિ બોધિભાગિનઃ