અહોરાત્રવ્રતચૈત્યસેવાનુશંસાવદાન · શ્લોક 202-221

અરે દુષ્ટાઃ સુપાપિન્યો યદ્ યુષ્માકં વિષાનલૈઃ ।
તાપિતાઃ સ્મસ્ તદપુણ્યૈર્ યૂયં ભવત શમ્બુકાઃ

ઇતિ તૈર્ ઋષિભિઃ સર્વૈઃ શાપિતાસ્ ત ભયાન્વિતાઃ ।
સર્વાન્ ઋષિવરાન્ નત્વા પ્રાર્થયન્ન્ એવમ્ આદરાત્

નમો વો ઽસ્તુ મહાવિજ્ઞાઃ ક્ષમધ્વં નો ઽપરાધતામ્ ।
તચ્છાપમોચનોપાયં સમુપદેષ્ટુમ્ અર્હથ

ઇતિ સંપ્રાર્થિતં તાભિર્ નિશમ્ય તે મહર્ષયઃ ।
કરુણાક્રાન્તચિત્તાસ્ તાઃ સમાલોક્યૈવમ્ અબ્રુવન્

શૃણુધ્વં શમ્બુકા યૂયમ્ ઉપાયં શાપમુક્તયે ।
અસ્માભિર્ દેશિતં શ્રુત્વા તથા ચરત સાદરમ્

ચૈત્યબિમ્બં સમાલમ્બ્ય તદ્ અનુસ્મૃત્ય ચેતસા ।
સદા પ્રદક્ષિણાં કૃત્વા ભ્રમિત્વા ભજતાદૃતાઃ

તદા તત્પુણ્યભાવેન સર્વપાપવિમોચિતાઃ ।
પરિશુદ્ધાશયા ભદ્રા ભવિષ્યથ નૃપાત્મજાઃ

તદાપિ હિ તથા યૂયં ચૈત્યસેવાસમાહિતાઃ ।
સદ્ધર્મસાધનં કૃત્વા પ્રયાસ્યથ જિનાલયમ્

ઇતિ તૈર્ ઋષિભિઃ સત્યં સમાદિષ્ટં નિશમ્ય તાઃ ।
શમ્બુકાસ્ તાન્ ઋષીન્ નત્વા તતો ઽગચ્છન્ નિજાલયમ્

તતસ્ તાઃ શમ્બુકાઃ સર્વાઃ શાલિક્ષેત્રમ્ ઉપાસૃતાઃ ।
ચૈત્યબિમ્બમ્ અનુસ્મૃત્ય પ્રવિચેરુઃ સમન્તતઃ

તત્ર વિચ્છિન્નશેષાંશં શાલિસ્તમ્બં વિલોક્ય તાઃ ।
ચૈત્યાકારં સમાલમ્બ્ય સંસ્મૃત્વા સુગતાલયમ્

સદા પ્રદક્ષિણીકૃત્ય પ્રણત્વા ચ મુહુર્ મુહુઃ ।
ચૈત્યાનુસ્મૃતિમ્ આધાય ભ્રમિત્વા સંપ્રભેજિરે

તત્ર તાઃ શમ્બુકાઃ સર્વાસ્ તત્પુણ્યપરિશોધિતાઃ ।
તચ્છાપપરિમુક્ત્યર્થં ચૈત્યં સ્મૃત્વા પ્રચેરિરે

કદા ચિત્ તત્ર મત્સ્યાર્થી ધીવરઃ ક્રૂરમાનસઃ ।
તત્સરસિ સ્થિતાન્ મીનાન્ સમાહર્તુમ્ ઉપાચરત્

તત્ર સ ધીવરો દૃષ્ટ્વા મીનાહરણલાલસઃ ।
તીરસ્થો જાલમ્ ઉત્ક્ષિપ્ય મીનાન્ આહર્તુમ્ ઉદ્યયૌ

તત્ર જાલે પ્રતિક્ષિપ્તે શમ્બુકા દૈવયોગતઃ ।
સર્વા અપિ પ્રવિષ્ટાસ્ તા ન તુ મત્સ્યો હિ કશ્ ચન

તતઃ સ જાલમ્ આકૃષ્ય પ્રવિસાર્ય વિલોકયન્ ।
દદર્શ શમ્બુકા એવ તત્ર મત્સ્યં ન કં ચન

અથ સો ઽપ્રાપ્તમત્સ્યસ્ તાઃ શમ્બુકા એવ લુબ્ધકઃ ।
આદાય પરિખિન્નાત્મા સ્વગૃહં શનકૈર્ યયૌ

તત્ર સ સ્વગૃહપ્રાપ્તો વિષન્નાસ્યો નિરાશિતઃ ।
પત્ન્યાઃ સુન્દરિકાયાસ્ તાઃ શમ્બુકાઃ પુરતો ઽર્પયત્

તતઃ સ ધીવરો ઽન્યત્ર મીનાન્ આહર્તુમ્ ઉદ્યતઃ ।
ભુક્ત્વાહારં યથાપ્રાપ્તં જાલમ્ આદાય નિર્યયૌ