Ahorātravratacaityasevānuśaṃsāvadāna · Verses 182-201

etatpuṇyānubhāvaiḥ sa sarvapāramitāḥ kramāt /
pūrayitvā mahāsattvo bodhisattvo 'bhavat sudhīḥ

{E adds:
tato 'nyaḥ devarājo 'bhut kālena samayena sa /
devarājasukhaṃ bhuktvā caraty asmin yathecchayā // Avc_182* //}
pātāle ca mahāvīro daityendro 'bhūn maharddhimān /
nirghoṣadamano nāma devalokabhayaṃkaraḥ

tena jitvā balenāpi trailokyaṃ svavaśīkṛtam /
sarve 'pi lokapālāś ca parājitya vaśīkṛtāḥ

tadā sa pṛthivīṃ gatvā vārāṇasīm upācarat /
indrapṛṣṭavihārasthaṃ caityaṃ dṛṣṭvānvamodata

tataḥ pradakṣiṇīkṛtya taṃ caityaṃ vidhinārcayat /
kṛtāñjalipuṭo bhutvā prārthayad evam ānataḥ

yāvajjīvaṃ sukhaṃ bhuktvā saṃsthāpya svavaśe jagat /
saṃbuddhaśaraṇaṃ gatvā prānte yāyāṃ jinālayam

ity evaṃ praṇidhiṃ dhṛtvā natvā taṃ ca jinālayam /
tata eva yayau svargaṃ daityendraḥ sa maharddhikaḥ

tatrāpi caityam ālokya śakreṇa sthāpitaṃ purā /
natvā pradakṣiṇīkṛtya vidhinā ca samārcayat

tathaiva praṇidhiṃ kṛtvā natvā ca sāñjalir mudā /
tataś ca sa samāgatya pātāle svaṃ gṛhaṃ yayau

{E has the following addition after 190 b on folio 13.
etatpuṇyānubhāvena daityendro 'sau maharddhikaḥ /
śakrāsanaṃ tadā tatra labdhavān vigrahair balaiḥ // Avc_190* //
tadāsa devarājendraḥ saṃjñātvāho tam āgatam /
idānīṃ kiṃprakāreṇa vijayiṣyāmi dānavaṃ /
mamāśrameṣu nirghoṣadamano nāmāsau sthitaḥ // Avc_190** //
iti dhyātvā sa śakraḥ bhuvane trāyastriṃśake /
prāktanair devarājendraiḥ pūjārthaṃ caityaṃ sthāpitaḥ // Avc_190*** //
tasmin caitye ahorātravrataṃ kuryāṃ yathāvidhiḥ /
tadupāyena dharmeṇa vijayiṣye suradviṣaṃ // Avc_190**** //
śrutaṃ mayāsti saddharmaṃ tad eṣo 'pi ca tadvrataiḥ /
svarge surasahāyena gato 'sau maghavaṃuiīṃ // Avc_190***** //
tadanantare ca devendraḥ mahārheṇa vratārcanaṃ /
atīva susamudāyena kṛtavāñ ca jinālaye // Avc_190****** //
tadanantare 'pi nirghoṣadamano 'suranirjitaḥ /
vinā yuddhena nirjityāsuraṃ bhūmyavatāritaḥ // Avc_190******* //}
tatra sa daityarājendro yathāvidhi jinālayam /
mahac caityaṃ pratiṣṭhāpya satkṛtya vidhinārcayat

tataś cāpi sa daityendro yathāvidhi samārabhan /
ahorātravrataṃ dhṛtvā tac caityaṃ samapūjayat

tatraivaṃ praṇidhiṃ kṛtvā so 'surendro mahāmatiḥ /
sarvadā vidhinābhyarcya bheje nityaṃ mahotsavaiḥ

tathā sa suciraṃ bhuktvā yāvajjīvaṃ mahāsukham /
tac caityaṃ śaraṇaṃ kṛtvā yayau tathā jinālayam

tathānye nāgarājāś ca tac caityaṃ samupāśritāḥ /
ahorātravrataṃ dhṛtvā satkṛtya vidhinārcayan

tathā sarve 'pi te nāgā yāvajjīvaṃ mahat sukham /
bhuktvā puṇyānubhāvaiś ca prānte yayur jinālayam

tathābhūn magadhe deśe caityagarbhaṃ mahat saraḥ /
śuddhāmbupūritaṃ padmakumudādipraśobhitam

tatrarṣayaḥ saromadhye pratiṣṭhite jinālaye /
ahorātravrataṃ dhṛtvā satkṛtya vidhinārcayan

tathā tair ṛṣibhiś caityaṃ pūjitaṃ tatsaraḥsthitāḥ /
nāgakanyāḥ samīkṣyāṣṭau tadantikam upāśrayan

tatra ta ṛsayas tāsāṃ saviṣaśvāsavāyubhiḥ /
prahatā viṣasaṃdigdhāḥ kṣaṇamātraṃ mumūrchire

tatas ta ṛṣayaḥ sarve kṣaṇāt prāptasucetanāḥ /
dṛṣṭvā tāḥ samupāsīnā nāgakanyā ruṣāśapan