Ahorātravratacaityasevānuśaṃsāvadāna · Verses 162-181

iti vijñāya rājendra tatra gatvā yathāvidhi /
pratiṣṭhāpya tathā caityam ahorātravrataṃ careḥ

tathā cet te sadā bhadram ihāmutra bhaved dhruvam /
kramād bodhicarīḥ pūrya saṃbuddhapadam āpsyasi

iti tena samādiṣṭaṃ guruṇā vasubandhunā /
śrutvā sa bhūpatiḥ śrīmāṃs tatheti cānvamodata

tataḥ sa indrapṛṣṭas taṃ vasubandhuṃ guruṃ puraḥ /
kṛtvā tataḥ samāgatya vārāṇasīm upācarat

tatra prāpya sa bhūmīndro nirīkṣya śubhabhūtale /
ādau bhūśodhanaṃ kṛtvā vāstunāgaṃ parīkṣya ca

vihāraṃ vidhivat kṛtvā tathā caityaṃ jinālayam /
triratnaṃ ca pratiṣṭhāpya yathāvidhi sadābhajat

tatra tena yathādiṣṭaṃ guruṇā vasubandhunā /
tathā sa nararājendras tad vrataṃ kartum ārabhat

tataś ca vidhivad dhṛtvā sabhāryaḥ sa nṛpādhipaḥ /
ahorātravrataṃ kṛtvā tac caityaṃ vidhinārcayat

tat samāpya punas tatra dīpaṃkaraṃ sasāṃghikam /
saṃnimantrya yathārhena bhojanena samārcayat

tataḥ sa pṛthivīpālaś ciraṃ tac caityam ādarāt /
sevitvā satsukhaṃ bhuktvā yayau cānte jinālayam

ity evaṃ tan mahat puṇyam ahorātravratodbhavam /
aprameyam asaṃkhyeyaṃ sarvabuddhaiḥ pracakṣyate

tathā yuṣmābhir apy atra tad ahorātrasaṃvaram /
dhṛtvā caityaṃ samabhyarcya sevitavyaṃ sadādarāt

tathā vo maṅgalaṃ nityam ihāmutra bhaved dhruvam /
kramād bodhiṃ samāsādya nirvṛtīpadam āpsyatha

ity ādiṣṭaṃ munīndreṇa śrutvā te bhikṣavo mudā /
tathety abhyanumoditvā tad vrataṃ kartum īṣire

tatas te bhikṣavo bhūyaḥ śāstāraṃ taṃ munīśvaram /
kṛtāñjalipuṭā natvā papracchur evam ādarāt

bhagavan bhavatādiṣṭam indrapṛṣṭena yat kṛtam /
tat sarvaṃ śrutam asmābhiḥ punaḥ śrotuṃ samiṣyate

kena kena tathā pūrvaṃ kṛtam etad vratottamam /
ahorātraṃ mahatpuṇyaṃ tat samādeṣṭum arhati

iti tair bhikṣubhiḥ pṛṣṭe bhagavān sa munīśvaraḥ /
tān bhikṣūn sāṃghikān sarvān samālokyaivam abravīt

śṛṇudhvaṃ bhikṣavaḥ sarve tathānyaiś ca kṛtaṃ purā /
tat sarvaṃ kathayiṣyāmi yuṣmākaṃ paribodhane

purā svarge tathendreṇa pratiṣṭhāpya jinālayam /
ahorātravrataṃ kṛtvā vidhivac caityam ārcayat