અહોરાત્રવ્રતચૈત્યસેવાનુશંસાવદાન · શ્લોક 162-181

ઇતિ વિજ્ઞાય રાજેન્દ્ર તત્ર ગત્વા યથાવિધિ ।
પ્રતિષ્ઠાપ્ય તથા ચૈત્યમ્ અહોરાત્રવ્રતં ચરેઃ

તથા ચેત્ તે સદા ભદ્રમ્ ઇહામુત્ર ભવેદ્ ધ્રુવમ્ ।
ક્રમાદ્ બોધિચરીઃ પૂર્ય સંબુદ્ધપદમ્ આપ્સ્યસિ

ઇતિ તેન સમાદિષ્ટં ગુરુણા વસુબન્ધુના ।
શ્રુત્વા સ ભૂપતિઃ શ્રીમાંસ્ તથેતિ ચાન્વમોદત

તતઃ સ ઇન્દ્રપૃષ્ટસ્ તં વસુબન્ધું ગુરું પુરઃ ।
કૃત્વા તતઃ સમાગત્ય વારાણસીમ્ ઉપાચરત્

તત્ર પ્રાપ્ય સ ભૂમીન્દ્રો નિરીક્ષ્ય શુભભૂતલે ।
આદૌ ભૂશોધનં કૃત્વા વાસ્તુનાગં પરીક્ષ્ય ચ

વિહારં વિધિવત્ કૃત્વા તથા ચૈત્યં જિનાલયમ્ ।
ત્રિરત્નં ચ પ્રતિષ્ઠાપ્ય યથાવિધિ સદાભજત્

તત્ર તેન યથાદિષ્ટં ગુરુણા વસુબન્ધુના ।
તથા સ નરરાજેન્દ્રસ્ તદ્ વ્રતં કર્તુમ્ આરભત્

તતશ્ ચ વિધિવદ્ ધૃત્વા સભાર્યઃ સ નૃપાધિપઃ ।
અહોરાત્રવ્રતં કૃત્વા તચ્ ચૈત્યં વિધિનાર્ચયત્

તત્ સમાપ્ય પુનસ્ તત્ર દીપંકરં સસાંઘિકમ્ ।
સંનિમન્ત્ર્ય યથાર્હેન ભોજનેન સમાર્ચયત્

તતઃ સ પૃથિવીપાલશ્ ચિરં તચ્ ચૈત્યમ્ આદરાત્ ।
સેવિત્વા સત્સુખં ભુક્ત્વા યયૌ ચાન્તે જિનાલયમ્

ઇત્ય્ એવં તન્ મહત્ પુણ્યમ્ અહોરાત્રવ્રતોદ્ભવમ્ ।
અપ્રમેયમ્ અસંખ્યેયં સર્વબુદ્ધૈઃ પ્રચક્ષ્યતે

તથા યુષ્માભિર્ અપ્ય્ અત્ર તદ્ અહોરાત્રસંવરમ્ ।
ધૃત્વા ચૈત્યં સમભ્યર્ચ્ય સેવિતવ્યં સદાદરાત્

તથા વો મઙ્ગલં નિત્યમ્ ઇહામુત્ર ભવેદ્ ધ્રુવમ્ ।
ક્રમાદ્ બોધિં સમાસાદ્ય નિર્વૃતીપદમ્ આપ્સ્યથ

ઇત્ય્ આદિષ્ટં મુનીન્દ્રેણ શ્રુત્વા તે ભિક્ષવો મુદા ।
તથેત્ય્ અભ્યનુમોદિત્વા તદ્ વ્રતં કર્તુમ્ ઈષિરે

તતસ્ તે ભિક્ષવો ભૂયઃ શાસ્તારં તં મુનીશ્વરમ્ ।
કૃતાઞ્જલિપુટા નત્વા પપ્રચ્છુર્ એવમ્ આદરાત્

ભગવન્ ભવતાદિષ્ટમ્ ઇન્દ્રપૃષ્ટેન યત્ કૃતમ્ ।
તત્ સર્વં શ્રુતમ્ અસ્માભિઃ પુનઃ શ્રોતું સમિષ્યતે

કેન કેન તથા પૂર્વં કૃતમ્ એતદ્ વ્રતોત્તમમ્ ।
અહોરાત્રં મહત્પુણ્યં તત્ સમાદેષ્ટુમ્ અર્હતિ

ઇતિ તૈર્ ભિક્ષુભિઃ પૃષ્ટે ભગવાન્ સ મુનીશ્વરઃ ।
તાન્ ભિક્ષૂન્ સાંઘિકાન્ સર્વાન્ સમાલોક્યૈવમ્ અબ્રવીત્

શૃણુધ્વં ભિક્ષવઃ સર્વે તથાન્યૈશ્ ચ કૃતં પુરા ।
તત્ સર્વં કથયિષ્યામિ યુષ્માકં પરિબોધને

પુરા સ્વર્ગે તથેન્દ્રેણ પ્રતિષ્ઠાપ્ય જિનાલયમ્ ।
અહોરાત્રવ્રતં કૃત્વા વિધિવચ્ ચૈત્યમ્ આર્ચયત્