Ahorātravratacaityasevānuśaṃsāvadāna · Verses 141-161
yaḥ karoti dine tasminn ahorātravrataṃ tathā /
tatsahasraguṇaṃ puṇyam āpnuyāt sa pumān dhruvam
evaṃ rājann ahorātravratapuṇyaṃ mahattaram /
aprameyam asaṃkhyeyam iti buddhair nigadyate
na hi sa vidyate rājan sarvatra bhuvaneṣv api /
ahorātravratotpannaṃ puṇyaṃ yaḥ kurute 'nyathā
yasya śravaṇamātreṇa vimuktaḥ sarvapātakāt /
darśanāt puṇyam āpnoti tathānumodanād api
ye caranti mahārāja vratarājam idaṃ tathā /
teṣāṃ puṇyapramāṇāni saṃkhyātuṃ ko hi śaknuyāt
tatpuṇyasaptabhāgaikaṃ bhāgaṃ rājā samāpnuyāt /
tathaikaṃ sarvasattvāś ca tathaikaṃ sādhakā janāḥ
vratinas taccaturbhāgān sarvān te prāpnuvanti hi /
etatpuṇyānubhāvais tu sarvatra maṅgalaṃ sadā
sarve sattvāḥ sukhāḍhyāś ca bhavanti bodhicāriṇaḥ /
evaṃ vijñāya rājendra lokānāṃ hitasādhanam /
ahorātravrataṃ yūyaṃ kartum arhatha sarvathā
iti tena samākhyātaṃ dhīmatā vasubandhunā /
śrutvā sa indrapṛṣṭas tad vrataṃ kartuṃ samaicchata
atha sa bhūpatiḥ śrīmān indrapṛṣṭo narādhipaḥ /
sāñjalis taṃ punar natvā vasubandhuṃ tathārthayat
bhadanta sarvavic chāstar bhavadājñāṃ śirovahan /
ahorātravrataṃ kartum icchāmi sāṃprataṃ khalu
bhavāñ chāstā mahāvijñaḥ sarvasattvahitāśayaḥ /
sarvahitārthasiddhyai tad anujñāṃ pradadātu me
iti tena nṛpendreṇa prārthitaṃ sa mahāmatiḥ /
vasubandhuḥ samākarṇya taṃ bhūpam evam abravīt
sādhu sādhu mahārāja yady evaṃ tvaṃ samicchasi /
tat kuruṣva mahatpuṇyam ahorātravrataṃ mudā
tatkṛte te mahat puṇyaṃ sarvatrāpi bhavec chubham /
etatpuṇyavipākena saṃbodhiṃ prāpnuyā api
iti śāstrā samādiṣṭam indrapṛṣṭaḥ sa bhūpatiḥ /
śrutvā taṃ sāñjalir natvā punar evaṃ samabravīt
bhadanta kartum icchāmi puṇyakṣetre jinālayam /
kutra puṇyatamaṃ kṣetraṃ tat samādeṣṭum arhati /1151 //
iti tena narendreṇa pṛṣṭe sa sarvavit sudhīḥ /
vasubandhur narendraṃ taṃ punar evam upādiśat
śṛṇu sādho mahārāja yathā khyātaṃ munīśvaraiḥ /
tathāhaṃ te pravakṣyāmi śrutvaivaṃ kartum arhasi
vārāṇasīti vikhyātā sarvabhūmī mahattarī /
puṇyakṣetraṃ mahāpīṭhaṃ sarvabuddhaiḥ praśaṃsitam
tatra yat praṇidhānena prakṛtaṃ karma kāritam /
tat tatheha paratrāpi sidhyate nānyathā khalu
Original text: Ahorātravratacaityasevānuśaṃsāvadāna · Edition: R. Handurukande, Three Sanskrit Texts on Caitya Worship ḥ In Relation to the Ahorātravrata, Tokyo 2000 (Studia Philologica Buddhica, Monograph Series, 16). · Data entry Klaus Wille · GRETIL (Göttingen) · CC BY-NC-SA 4.0