અહોરાત્રવ્રતચૈત્યસેવાનુશંસાવદાન · શ્લોક 141-161

યઃ કરોતિ દિને તસ્મિન્ન્ અહોરાત્રવ્રતં તથા ।
તત્સહસ્રગુણં પુણ્યમ્ આપ્નુયાત્ સ પુમાન્ ધ્રુવમ્

એવં રાજન્ન્ અહોરાત્રવ્રતપુણ્યં મહત્તરમ્ ।
અપ્રમેયમ્ અસંખ્યેયમ્ ઇતિ બુદ્ધૈર્ નિગદ્યતે

ન હિ સ વિદ્યતે રાજન્ સર્વત્ર ભુવનેષ્વ્ અપિ ।
અહોરાત્રવ્રતોત્પન્નં પુણ્યં યઃ કુરુતે ઽન્યથા

યસ્ય શ્રવણમાત્રેણ વિમુક્તઃ સર્વપાતકાત્ ।
દર્શનાત્ પુણ્યમ્ આપ્નોતિ તથાનુમોદનાદ્ અપિ

યે ચરન્તિ મહારાજ વ્રતરાજમ્ ઇદં તથા ।
તેષાં પુણ્યપ્રમાણાનિ સંખ્યાતું કો હિ શક્નુયાત્

તત્પુણ્યસપ્તભાગૈકં ભાગં રાજા સમાપ્નુયાત્ ।
તથૈકં સર્વસત્ત્વાશ્ ચ તથૈકં સાધકા જનાઃ

વ્રતિનસ્ તચ્ચતુર્ભાગાન્ સર્વાન્ તે પ્રાપ્નુવન્તિ હિ ।
એતત્પુણ્યાનુભાવૈસ્ તુ સર્વત્ર મઙ્ગલં સદા

સર્વે સત્ત્વાઃ સુખાઢ્યાશ્ ચ ભવન્તિ બોધિચારિણઃ ।
એવં વિજ્ઞાય રાજેન્દ્ર લોકાનાં હિતસાધનમ્ ।
અહોરાત્રવ્રતં યૂયં કર્તુમ્ અર્હથ સર્વથા

ઇતિ તેન સમાખ્યાતં ધીમતા વસુબન્ધુના ।
શ્રુત્વા સ ઇન્દ્રપૃષ્ટસ્ તદ્ વ્રતં કર્તું સમૈચ્છત

અથ સ ભૂપતિઃ શ્રીમાન્ ઇન્દ્રપૃષ્ટો નરાધિપઃ ।
સાઞ્જલિસ્ તં પુનર્ નત્વા વસુબન્ધું તથાર્થયત્

ભદન્ત સર્વવિચ્ છાસ્તર્ ભવદાજ્ઞાં શિરોવહન્ ।
અહોરાત્રવ્રતં કર્તુમ્ ઇચ્છામિ સાંપ્રતં ખલુ

ભવાઞ્ છાસ્તા મહાવિજ્ઞઃ સર્વસત્ત્વહિતાશયઃ ।
સર્વહિતાર્થસિદ્ધ્યૈ તદ્ અનુજ્ઞાં પ્રદદાતુ મે

ઇતિ તેન નૃપેન્દ્રેણ પ્રાર્થિતં સ મહામતિઃ ।
વસુબન્ધુઃ સમાકર્ણ્ય તં ભૂપમ્ એવમ્ અબ્રવીત્

સાધુ સાધુ મહારાજ યદ્ય્ એવં ત્વં સમિચ્છસિ ।
તત્ કુરુષ્વ મહત્પુણ્યમ્ અહોરાત્રવ્રતં મુદા

તત્કૃતે તે મહત્ પુણ્યં સર્વત્રાપિ ભવેચ્ છુભમ્ ।
એતત્પુણ્યવિપાકેન સંબોધિં પ્રાપ્નુયા અપિ

ઇતિ શાસ્ત્રા સમાદિષ્ટમ્ ઇન્દ્રપૃષ્ટઃ સ ભૂપતિઃ ।
શ્રુત્વા તં સાઞ્જલિર્ નત્વા પુનર્ એવં સમબ્રવીત્

ભદન્ત કર્તુમ્ ઇચ્છામિ પુણ્યક્ષેત્રે જિનાલયમ્ ।
કુત્ર પુણ્યતમં ક્ષેત્રં તત્ સમાદેષ્ટુમ્ અર્હતિ ।1151 ॥
ઇતિ તેન નરેન્દ્રેણ પૃષ્ટે સ સર્વવિત્ સુધીઃ ।
વસુબન્ધુર્ નરેન્દ્રં તં પુનર્ એવમ્ ઉપાદિશત્

શૃણુ સાધો મહારાજ યથા ખ્યાતં મુનીશ્વરૈઃ ।
તથાહં તે પ્રવક્ષ્યામિ શ્રુત્વૈવં કર્તુમ્ અર્હસિ

વારાણસીતિ વિખ્યાતા સર્વભૂમી મહત્તરી ।
પુણ્યક્ષેત્રં મહાપીઠં સર્વબુદ્ધૈઃ પ્રશંસિતમ્

તત્ર યત્ પ્રણિધાનેન પ્રકૃતં કર્મ કારિતમ્ ।
તત્ તથેહ પરત્રાપિ સિધ્યતે નાન્યથા ખલુ