Ahorātravratacaityasevānuśaṃsāvadāna · Verses 121-140
sadūrvakundākṣatalājakādi prākṣipya caityaṃ praṇamanti ye ca /
vidyādhipās te susamṛddhimanto gacchanti cānte sugatālaye 'pi
ye vajramuktādiviśuddharatnaṃ hemādisaddravyavarāṣṭadhātūn /
ye caityabimbe sarasā manuṣyāḥ śraddhānuraktā upaḍhaukayanti
pūrṇendriyāḥ pūrṇamanorathās te nirnaṣṭaśokāḥ subhagāḥ suvaṃśaḥ /
dharmārthakāmāḥ suguṇābhirāmāḥ saṃbuddhamārgābhigatā bhavanti
ye śuddhacittāḥ stutibhiḥ sugītair bhajanti caityaṃ manujāḥ prasannāḥ /
dharmārthakāmābhimatarddhimanto bhavanti nāthā divi bhūtale te
ye 'ṣṭābhir aṅgaiḥ praṇamanti caityaṃ śraddhāprasannāḥ śaraṇaṃ prayātāḥ /
bhūpādhipās te varasaptaratnair yuktāḥ sudhīrāḥ kṛtino bhavanti
pradakṣiṇīkṛtya mudā prasannā ye caityabimbaṃ praṇatā bhramanti /
suvarṇavarṇāḥ suviśālavaṃśāḥ pūjyā nṛpāṇām api te bhavanti
śuddhāśmasaṃkṣārasugandhitoyaiś caityaṃ mudā ye 'bhyanulepayanti /
nīrogaśokāḥ susamṛddhimanto dīrghāyuṣas te subhagā bhavanti
caityāṅganaṃ ye pariśodhayanti nirmālyam uddhṛtya ca mārjayanti /
te hemavarṇāḥ pariśuddhacittā dharmābhiraktāḥ sudṛśo bhavanti
ālasyenāpi ca stūpe karoti yaḥ pradakṣiṇām /
pade pade suvarṇaikakarṣadānaphalaṃ labhet
gandhapuṣpādibhir viprair arcanīyaṃ jinālayam /
chattrāvarohaṇaṃ caitye kartavyaṃ kṣatriyair api
dhvajāvaropaṇaṃ vaiśyaiḥ kṛtyaṃ patākayā saha /
naivedyam eva śūdrais tu dātavyaṃ caityapuṃgave
anyair vihīnajātībhir nārcanīyo jinālayaḥ /
dhūpadīpādibhir naiva pūjanīyo na cānyathā
mūlaskandhapattraphalastambaśasyādibhis tathā /
dhānyādivrīhibhiś caivam auṣadhībhī rasāyanaiḥ
tathā vādyaiḥ sugītaiś ca nṛtyaiś cāpi mahotsavaiḥ /
hāhākāraiḥ samullāsair arcanīyo jinālayaḥ
carmakāraplavamlecchaniyogilubdhakādibhiḥ /
dūrāt pradakṣiṇīkṛtya vandya eva jinālayaḥ
evaṃ sarvais tathā lokair dvijādisarvajātibhiḥ /
svasvajātyarhapūjābhiḥ pūjanīyo jinālayaḥ
evaṃ caranti ye lokā ahorātravrataṃ mudā /
te sarvapāpanirmuktāḥ saṃprayāyur jinālayam
evaṃ matvā mahārāja māse māse sadāpi ca /
pūrṇamāsyām ahorātravrataṃ caritum arhasi
viśeṣād aśvinīmāse saṃpūrṇe candramaṇḍale /
aśvinībhe tathā puṣyayogayukte raver dine
etadyogasamāyukte mahāparvadine śubhe /
ahorātravrataṃ kuryād yathāvidhi samāhitaḥ
Original text: Ahorātravratacaityasevānuśaṃsāvadāna · Edition: R. Handurukande, Three Sanskrit Texts on Caitya Worship ḥ In Relation to the Ahorātravrata, Tokyo 2000 (Studia Philologica Buddhica, Monograph Series, 16). · Data entry Klaus Wille · GRETIL (Göttingen) · CC BY-NC-SA 4.0