અહોરાત્રવ્રતચૈત્યસેવાનુશંસાવદાન · શ્લોક 121-140

સદૂર્વકુન્દાક્ષતલાજકાદિ પ્રાક્ષિપ્ય ચૈત્યં પ્રણમન્તિ યે ચ ।
વિદ્યાધિપાસ્ તે સુસમૃદ્ધિમન્તો ગચ્છન્તિ ચાન્તે સુગતાલયે ઽપિ

યે વજ્રમુક્તાદિવિશુદ્ધરત્નં હેમાદિસદ્દ્રવ્યવરાષ્ટધાતૂન્ ।
યે ચૈત્યબિમ્બે સરસા મનુષ્યાઃ શ્રદ્ધાનુરક્તા ઉપઢૌકયન્તિ

પૂર્ણેન્દ્રિયાઃ પૂર્ણમનોરથાસ્ તે નિર્નષ્ટશોકાઃ સુભગાઃ સુવંશઃ ।
ધર્માર્થકામાઃ સુગુણાભિરામાઃ સંબુદ્ધમાર્ગાભિગતા ભવન્તિ

યે શુદ્ધચિત્તાઃ સ્તુતિભિઃ સુગીતૈર્ ભજન્તિ ચૈત્યં મનુજાઃ પ્રસન્નાઃ ।
ધર્માર્થકામાભિમતર્દ્ધિમન્તો ભવન્તિ નાથા દિવિ ભૂતલે તે

યે ઽષ્ટાભિર્ અઙ્ગૈઃ પ્રણમન્તિ ચૈત્યં શ્રદ્ધાપ્રસન્નાઃ શરણં પ્રયાતાઃ ।
ભૂપાધિપાસ્ તે વરસપ્તરત્નૈર્ યુક્તાઃ સુધીરાઃ કૃતિનો ભવન્તિ

પ્રદક્ષિણીકૃત્ય મુદા પ્રસન્ના યે ચૈત્યબિમ્બં પ્રણતા ભ્રમન્તિ ।
સુવર્ણવર્ણાઃ સુવિશાલવંશાઃ પૂજ્યા નૃપાણામ્ અપિ તે ભવન્તિ

શુદ્ધાશ્મસંક્ષારસુગન્ધિતોયૈશ્ ચૈત્યં મુદા યે ઽભ્યનુલેપયન્તિ ।
નીરોગશોકાઃ સુસમૃદ્ધિમન્તો દીર્ઘાયુષસ્ તે સુભગા ભવન્તિ

ચૈત્યાઙ્ગનં યે પરિશોધયન્તિ નિર્માલ્યમ્ ઉદ્ધૃત્ય ચ માર્જયન્તિ ।
તે હેમવર્ણાઃ પરિશુદ્ધચિત્તા ધર્માભિરક્તાઃ સુદૃશો ભવન્તિ

આલસ્યેનાપિ ચ સ્તૂપે કરોતિ યઃ પ્રદક્ષિણામ્ ।
પદે પદે સુવર્ણૈકકર્ષદાનફલં લભેત્

ગન્ધપુષ્પાદિભિર્ વિપ્રૈર્ અર્ચનીયં જિનાલયમ્ ।
છત્ત્રાવરોહણં ચૈત્યે કર્તવ્યં ક્ષત્રિયૈર્ અપિ

ધ્વજાવરોપણં વૈશ્યૈઃ કૃત્યં પતાકયા સહ ।
નૈવેદ્યમ્ એવ શૂદ્રૈસ્ તુ દાતવ્યં ચૈત્યપુંગવે

અન્યૈર્ વિહીનજાતીભિર્ નાર્ચનીયો જિનાલયઃ ।
ધૂપદીપાદિભિર્ નૈવ પૂજનીયો ન ચાન્યથા

મૂલસ્કન્ધપત્ત્રફલસ્તમ્બશસ્યાદિભિસ્ તથા ।
ધાન્યાદિવ્રીહિભિશ્ ચૈવમ્ ઔષધીભી રસાયનૈઃ

તથા વાદ્યૈઃ સુગીતૈશ્ ચ નૃત્યૈશ્ ચાપિ મહોત્સવૈઃ ।
હાહાકારૈઃ સમુલ્લાસૈર્ અર્ચનીયો જિનાલયઃ

ચર્મકારપ્લવમ્લેચ્છનિયોગિલુબ્ધકાદિભિઃ ।
દૂરાત્ પ્રદક્ષિણીકૃત્ય વન્દ્ય એવ જિનાલયઃ

એવં સર્વૈસ્ તથા લોકૈર્ દ્વિજાદિસર્વજાતિભિઃ ।
સ્વસ્વજાત્યર્હપૂજાભિઃ પૂજનીયો જિનાલયઃ

એવં ચરન્તિ યે લોકા અહોરાત્રવ્રતં મુદા ।
તે સર્વપાપનિર્મુક્તાઃ સંપ્રયાયુર્ જિનાલયમ્

એવં મત્વા મહારાજ માસે માસે સદાપિ ચ ।
પૂર્ણમાસ્યામ્ અહોરાત્રવ્રતં ચરિતુમ્ અર્હસિ

વિશેષાદ્ અશ્વિનીમાસે સંપૂર્ણે ચન્દ્રમણ્ડલે ।
અશ્વિનીભે તથા પુષ્યયોગયુક્તે રવેર્ દિને

એતદ્યોગસમાયુક્તે મહાપર્વદિને શુભે ।
અહોરાત્રવ્રતં કુર્યાદ્ યથાવિધિ સમાહિતઃ