अहोरात्रव्रतचैत्यसेवानुशंसावदान · श्लोक 121-140

सदूर्वकुन्दाक्षतलाजकादि प्राक्षिप्य चैत्यं प्रणमन्ति ये च ।
विद्याधिपास् ते सुसमृद्धिमन्तो गच्छन्ति चान्ते सुगतालये ऽपि

ये वज्रमुक्तादिविशुद्धरत्नं हेमादिसद्द्रव्यवराष्टधातून् ।
ये चैत्यबिम्बे सरसा मनुष्याः श्रद्धानुरक्ता उपढौकयन्ति

पूर्णेन्द्रियाः पूर्णमनोरथास् ते निर्नष्टशोकाः सुभगाः सुवंशः ।
धर्मार्थकामाः सुगुणाभिरामाः संबुद्धमार्गाभिगता भवन्ति

ये शुद्धचित्ताः स्तुतिभिः सुगीतैर् भजन्ति चैत्यं मनुजाः प्रसन्नाः ।
धर्मार्थकामाभिमतर्द्धिमन्तो भवन्ति नाथा दिवि भूतले ते

ये ऽष्टाभिर् अङ्गैः प्रणमन्ति चैत्यं श्रद्धाप्रसन्नाः शरणं प्रयाताः ।
भूपाधिपास् ते वरसप्तरत्नैर् युक्ताः सुधीराः कृतिनो भवन्ति

प्रदक्षिणीकृत्य मुदा प्रसन्ना ये चैत्यबिम्बं प्रणता भ्रमन्ति ।
सुवर्णवर्णाः सुविशालवंशाः पूज्या नृपाणाम् अपि ते भवन्ति

शुद्धाश्मसंक्षारसुगन्धितोयैश् चैत्यं मुदा ये ऽभ्यनुलेपयन्ति ।
नीरोगशोकाः सुसमृद्धिमन्तो दीर्घायुषस् ते सुभगा भवन्ति

चैत्याङ्गनं ये परिशोधयन्ति निर्माल्यम् उद्धृत्य च मार्जयन्ति ।
ते हेमवर्णाः परिशुद्धचित्ता धर्माभिरक्ताः सुदृशो भवन्ति

आलस्येनापि च स्तूपे करोति यः प्रदक्षिणाम् ।
पदे पदे सुवर्णैककर्षदानफलं लभेत्

गन्धपुष्पादिभिर् विप्रैर् अर्चनीयं जिनालयम् ।
छत्त्रावरोहणं चैत्ये कर्तव्यं क्षत्रियैर् अपि

ध्वजावरोपणं वैश्यैः कृत्यं पताकया सह ।
नैवेद्यम् एव शूद्रैस् तु दातव्यं चैत्यपुंगवे

अन्यैर् विहीनजातीभिर् नार्चनीयो जिनालयः ।
धूपदीपादिभिर् नैव पूजनीयो न चान्यथा

मूलस्कन्धपत्त्रफलस्तम्बशस्यादिभिस् तथा ।
धान्यादिव्रीहिभिश् चैवम् औषधीभी रसायनैः

तथा वाद्यैः सुगीतैश् च नृत्यैश् चापि महोत्सवैः ।
हाहाकारैः समुल्लासैर् अर्चनीयो जिनालयः

चर्मकारप्लवम्लेच्छनियोगिलुब्धकादिभिः ।
दूरात् प्रदक्षिणीकृत्य वन्द्य एव जिनालयः

एवं सर्वैस् तथा लोकैर् द्विजादिसर्वजातिभिः ।
स्वस्वजात्यर्हपूजाभिः पूजनीयो जिनालयः

एवं चरन्ति ये लोका अहोरात्रव्रतं मुदा ।
ते सर्वपापनिर्मुक्ताः संप्रयायुर् जिनालयम्

एवं मत्वा महाराज मासे मासे सदापि च ।
पूर्णमास्याम् अहोरात्रव्रतं चरितुम् अर्हसि

विशेषाद् अश्विनीमासे संपूर्णे चन्द्रमण्डले ।
अश्विनीभे तथा पुष्ययोगयुक्ते रवेर् दिने

एतद्योगसमायुक्ते महापर्वदिने शुभे ।
अहोरात्रव्रतं कुर्याद् यथाविधि समाहितः