Agni Purana · Chapter 381

:e ity āgneye mahāpurāṇe gītāsāro nāmāśītyadhikatriśatatamo
'dhyāyaḥ ||
% chapter {381}
:ś athaikāśītyadhikatriśatatamo 'dhyāyaḥ
yamagītā
agnir uvāca
yamagītāṃ pravakṣyāmi uktā yā nāciketase /AP_381.001ab/
paṭhatāṃ śṛṇvatāṃ bhuktyai muktyai mokṣārthināṃ satāṃ

yama uvāca
āsanaṃ śayanaṃ yānaparidhānagṛhādikam /AP_381.002ab/
vāñchatyaho 'timohena susthiraṃ svayamasthiraḥ

bhogeṣu śaktiḥ satataṃ tathaivātmāvalokanaṃ /AP_381.003ab/
śreyaḥ paraṃ manuṣyānāṃ kapilodgītameva hi

sarvatra samadarśitvaṃ nirmasatvamasaṅgatā /AP_381.004ab/
śreyaḥ param manuṣyānāṃ gītaṃ pañcaśikhena hi

āgarbhajanmabālyādivayo 'vasthādivedanaṃ /AP_381.005ab/
śreyaḥ paraṃ manuṣyāṇām gaṅgāviṣṇupragītakaṃ

ādhyātmikādiduḥkhānāmādyantādipratikriyā /AP_381.006ab/
śreyaḥ paraṃ manṣyāṇāṃ janakodgītameva ca

abhinnayorbhedakaraḥ pratyayo yaḥ parātmanaḥ /AP_381.007ab/
tacchāntiparamaṃ śreyo brahmodgītamudāhṛtaṃ

:p 351
kartavyamiti yatkarma ṛgyajuḥsāmasaṃjñitaṃ /AP_381.008ab/
kurute śreyase saṅgān jaigīṣavyeṇa gīyate

hāniḥ sarvavidhitsānāmātmanaḥ sukhahaitukī /AP_381.009ab/
śreyaḥ paraṃ manuṣyāṇāṃ devalodgītamīritaṃ

kāmatyāgāttu vijñānaṃ sukhaṃ brahma paraṃ padaṃ /AP_381.010ab/
kāmināṃ na hi vijñānaṃ sanakodgītameva tat

pravṛttañca nivṛttañca kāryaṃ karmaparo 'bravīt /AP_381.011ab/
śreyasāṃ śreya etaddhi naiṣkarmyaṃ brahma taddhariḥ

pumāṃścādhigatajñāno bhedaṃ nāpnoti sattamaḥ /AP_381.012ab/
brahmaṇā viṣṇusaṃjñena parameṇāvyayena ca

jñānaṃ vijñānamāstikyaṃ saubhāgyaṃ rūpamuttamam /AP_381.013ab/
tapasā labhyate sarvaṃ manasā yadyadicchati

nāsti viṣṇusamandhyeyaṃ tapo nānaśanātparaṃ /AP_381.014ab/
nāstyārogyasamaṃ dhanyaṃ nāsti gaṅgāsamā sarit

na so 'sti bāndhavaḥ kaścidviṣṇuṃ muktvā jagadguruṃ /AP_381.015ab/
adhaścordhaṃ hariścāgre dehendriyamanomukhe

ityevaṃ saṃsmaran prāṇān yastyajetsa harirbhavet /AP_381.016ab/
yattad brahma yataḥ sarvaṃ yatsarvaṃ tasya saṃsthitam

agrāhyakamanirdeśyaṃ supratiṣṭhañca yatparaṃ /AP_381.017ab/
parāparasvarūpeṇa viṣṇuḥ sarvahṛdi sthitaḥ

yajñeśaṃ yajñapuruṣaṃ kecidicchanti tatparaṃ /AP_381.018ab/
kecidviṣṇuṃ haraṃ kecit kecid brahmāṇamīśvaraṃ

indrādināmabhiḥ kecit sūryaṃ somañca kālakam /AP_381.019ab/
:p 352
brahmādistambhaparyantaṃ jagadviṣṇuṃ vadanti ca

sa viṣṇuḥ paramaṃ brahma yato nāvartate punaḥ /AP_381.020ab/
suvarṇādimahādānapuṇyatīrthāvagāhanaiḥ

dhyānair vrataiḥ pūjayā ca dharmaśrutyā tadāpnuyāt /AP_381.021ab/
ātmānaṃ rathinaṃ viddhi śarīraṃ rathameva tu

buddhintu sārathiṃ viddhi manaḥ pragrahameva ca /AP_381.022ab/
indrayāṇi hayānāhurviṣayāṃśceṣugocarān

ātmendriyamanoyuktaṃ bhoktetyāhurmanīṣiṇaḥ /AP_381.023ab/
yastvavijñānavān bhavatyayuktena manasā sadā

na satpadamavāpnoti saṃsārañcādhigacchati /AP_381.024ab/
yastu vijñānavān bhavati yuktena manasā sadā

sa tatpadamavāpnoti yasmādbhūyo na jāyate /AP_381.025ab/
vijñānasārathiryastu manaḥpragrahavānnaraḥ

so 'dhvānaṃ paramāpnoti tadviṣṇoḥ paramaṃ padam /AP_381.026ab/
indriyebhyaḥ parā hy arthā arthebhyaś ca paraṃ manaḥ

manasastu parā buddhiḥ buddherātmā mahān paraḥ /AP_381.027ab/
mahataḥ paramavyaktamavyaktātpuruṣaḥ paraḥ

puruṣānna paraṃ kiñcit sā kāṣṭhā sā parā gatiḥ /AP_381.028ab/
eṣu sarveṣu bhūteṣu gūḍhātmā na prakāśate

dṛśyate tvagryayā budhyā sūkṣmayā sūkṣmadarśibhiḥ /AP_381.029ab/
yacchedvāṅmanasī prājñaḥ tadyacchejjñānamātmani

jñānamātmani mahati niyacchecchānta ātmani /AP_381.030ab/
jñātvā brahmātmanoryogaṃ yamādyair brahma sadbhavet

:p 353
ahiṃsā satyamasteyaṃ brahmacaryāparigrahau /AP_381.031ab/
yamāś ca niyamāḥ pañca śaucaṃ santoṣasattapaḥ

svādhyāyeśvarapūjā ca āsanaṃ padmakādikaṃ /AP_381.032ab/
prāṇāyāmo vāyujayaḥ pratyāhāraḥ svanigrahaḥ

śubhe hy ekatra viṣaye cetaso yat pradhāraṇaṃ /AP_381.033ab/
niś calatvāttu dhīmadbhirdhāraṇā dvija kathyate

paunaḥpunyena tatraiva viṣayeṣveva dhāraṇā /AP_381.034ab/
dhyānaṃ smṛtaṃ samādhistu ahaṃ brahmātmasaṃsthitiḥ

ghaṭadhvaṃsādyathākāśamabhinnaṃ nabhasā bhavet /AP_381.035ab/
mukto jīvo brahmaṇaivaṃ sadbrahma brahma vai bhavet

ātmānaṃ manyate brahma jīvo jñānena nānyathā /AP_381.036ab/
jīvo hy ajñānatatkāryamuktaḥ syādajarāmaraḥ

agnir uvāca
vaśiṣṭha yamagītoktā paṭhatāṃ bhuktimuktidā /AP_381.037ab/
ātyantiko layaḥ prokto vedāntabrahmadhīmayaḥ