Agni Purana · Chapter 345

:e ity āgneye mahāpurāṇe alaṅkāre śabdarthālaṅkāranirūpaṇaṃ
nāma catuś catvāriṃśadadhikatriśatatamo 'dhyāyaḥ ||
% chapter {345}
:ś atha pañcacatvāriṃśadadhikatriśatatamo 'dhyāyaḥ
kāvyaguṇavivekaḥ
agnir uvāca
alaṃkṛtamapi prītyai na kāvyaṃ nirguṇaṃ bhavet /AP_345.001ab/
vapuṣyalalite strīṇāṃ hāro bhārāyate paraṃ

na ca vācyaṃ guṇo doṣo bhāva eva bhaviṣyati /AP_345.002ab/
guṇāḥ śleṣādayo doṣā gūḍārthādyāḥ pṛthakkṛtāḥ

yaḥ kāvye mahatīṃ chāyāmanugṛhṇātyasau guṇaiḥ /AP_345.003ab/
sambhavatyeṣa sāmānyo vaiśeṣika iti dvidhā

sarvasādhāraṇībhūtaḥ sāmanya iti manyate /AP_345.004ab/
śabdamarthamubhau prāptaḥ sāmānyo bhavati tridhā

śabdamāśrayate kāvyaṃ śarīraṃ yaḥ sa tadguṇaḥ /AP_345.005ab/
:p 229
śloṣo lālityāgāmbhīryasaukumāryamudāratā

satyeva yaugikī ceti guṇāḥ śabdasya saptadhā /AP_345.006ab/
suśliṣṭasanniveśatvaṃ śabdānāṃ śleṣa ucyate

guṇādeśādinā pūrvaṃ padasambaddhamakṣaraṃ /AP_345.007ab/
yatrasandhīyate naiva tallālityamudāhṛtaṃ

viśiṣṭalakṣaṇollekhalekhyamuttānaśabdakam /AP_345.008ab/
gāmbhīryaṃ kathayantyāryāstadevānyeṣu śabdatāṃ

aniṣṭhurākṣaraprāyaśabdatā sukumāratā /AP_345.009ab/
uttānapadataudaryayutaślāghyair viśeṣaṇaiḥ

ojaḥ samāsabhūyastvametatpadyādijīvitaṃ /AP_345.010ab/
ābrahma stambhaparyantamojasaikena pauruṣaṃ

ucyamānasya śabdena yena kenāpi vastunaḥ /AP_345.011ab/
utkarṣamāvahannartho guṇa ity abhidhīyate

mādhuryaṃ sambidhānañca komalatvamudāratā /AP_345.012ab/
prauḍhiḥ sāmayikatvañca tadbhedāḥ ṣaṭcakāśati

krodherṣyākāragāmbhīryātmādhuryaṃ dhairyagāhitā /AP_345.013ab/
sambidhānaṃ parikaraḥ syādapekṣitasiddhaye

yatkāṭhinyādinirmuktasanniveśaviśiṣṭatā /AP_345.014ab/
tiraskṛtyaiva mṛdutā bhāti komalateti sā

lakṣyate sthūlalakṣatvapravṛtteryatra lakṣaṇam /AP_345.015ab/
guṇasya tadudāratvamāśayasyātisauṣṭhavaṃ

abhipretaṃ prati yato nirvāhasyopapādikāḥ /AP_345.016ab/
yuktayo hetugarbhiṇyaḥ prauḍhāprauḍhirudāhṛtā

:p 230
svatantrasyānyatantrasya vāhyāntaḥsamayogataḥ /AP_345.017ab/
tatra vyutpattirarthasya yā sāmayikateti sā

śabdārthavupakurvāṇo nāmnobhayaguṇaḥ smṛtaḥ /AP_345.018ab/
tasya prasādaḥ saubhāgyaṃ yathāsaṅkhyaṃ praśastatā

pāko rāga iti prājñaiḥ ṣaṭprapañcavipañcitāḥ /AP_345.019ab/
suprasiddharthapadatā prasāda iti gīyate

utkarṣavān guṇaḥ kaścidyasminnukte pratīyate /AP_345.020ab/
tatsaubhāgyamudāratvaṃ pravadanti manīṣiṇaḥ

yathāsaṅkhyamanuddeśaḥ sāmanyamatidiśyate /AP_345.021ab/
samaye varṇanīyasya dāruṇasyāpi vastunaḥ

adāruṇena śabdena prāśastyamupavarṇanaṃ /AP_345.022ab/
uccaiḥ pariṇatiḥ kāpi pāka ity abhidhīyate

mṛdvīkānārikelāmbupākabhedāccaturvidhaḥ /AP_345.023ab/
ādāvante ca saurasyaṃ mṛdvīkāpāka eva saḥ

kāvyecchayā viśeṣo yaḥ sarāga iti gīyate /AP_345.024ab/
abhyāsopahitaḥ kāntiṃ sahajāmapi vartate

hāridraś caiva kausumbho nīlī rāgaś ca sa tridhā /AP_345.025ab/
vaiśeṣikaḥ parijñeyo yaḥ svalakṣaṇagocaraḥ