Agni Purana · Chapter 337

:e ity āgneye mahāpurāṇe alaṅkāre kāvyādilakṣaṇaṃ nāma
ṣaṭtriṃśadadhikatriśatatamo 'dhyāyaḥ
:n
1 juṣṭamiti ja.. , ṭa.. ca
:p 202
% chapter {337}
:ś atha saptatriṃśadadhikatriśatatamo 'dhyāyaḥ
nāṭakanirūpaṇam
agnir uvāca
nāṭakaṃ saprakaraṇaṃ ḍima īhāmṛgo 'pi vā /AP_337.001ab/
jñeyaḥ samavakāraś ca bhavet prahasanantathā

vyāyogabhāṇavīthyaṅkatroṭakānyatha nāṭikā /AP_337.002ab/
saṭṭakaṃ śilpakaḥ karṇā eko durmallikā tathā

prasthānaṃ bhāṇikā bhāṇī goṣṭhī hallīśakāni ca /AP_337.003ab/
kāvyaṃ śrīgaditaṃ nāṭyarāsakaṃ rāsakaṃ tathā

ullāpyakaṃ preṅkṣaṇañca saptaviṃśatireva tat /AP_337.004ab/
sāmānyañca viśeṣaś ca lakṣaṇasya dvayī gatiḥ

sāmānyaṃ sarvaviṣayaṃ śeṣaḥ kvāpi pravartate /AP_337.005ab/
pūrvaraṅge nivṛtte dvau deśakālāvubhāvapi

rasabhāvavibhāvānubhāvā abhinayās tathā /AP_337.006ab/
aṅkaḥ sthitiś ca sāmānyaṃ sarvatraivopasarpaṇāt

viśeṣo 'vasare vācyaḥ sāmānyaṃ pūrvamucyate /AP_337.007ab/
trivargasādhanannāṭyamityāhuḥ karaṇañca yat

itikartavyatā tasya pūrvaraṅgo yathāvidhi /AP_337.008ab/
nāndīmukhāni dvātriṃśadaṅgāni pūrvaraṅgake

devatānāṃ namaskāro gurūṇāmapi ca stutiḥ /AP_337.009ab/
gobrāhmaṇanṛpādīnāmāśīrvādādi gīyate

nāndyante sūtradhāro 'sau rūpakeṣu nibadhyate /AP_337.010ab/
gurupūrvakramaṃ vaṃśapraśaṃsā pauruṣaṃ kaveḥ

:p 203
sambandhārthau ca kāvyasya pañcaitāneṣa nirdiśet /AP_337.011ab/
naṭī vidūṣako vāpi pāripārśvika eva vā

sahitāḥ sūtradhāreṇa saṃlāpaṃ yatra kurvate /AP_337.012ab/
citrair vākyaiḥ svakāryotthaiḥ prastutākṣepibhirmithaḥ

āmukhaṃ tattu vijñeyaṃ budhaiḥ prastāvanāpi sā /AP_337.013ab/
pravṛttakaṃ kathodghātaḥ prayogātiśayas tathā

āmukhasya trayo bhedā vījāṃśeṣūpajāyate /AP_337.014ab/
kālaṃ pravṛttamāśritya sūtradhṛgyatra varṇayet

tadāśrayaś ca pātrasya praveśastat pravṛttakaṃ /AP_337.015ab/
sūtradhārasya vākyaṃ vā yatra vākyārthameva vā

gṛhītvā praviśet pātraṃ kathodghātaḥ sa ucyate /AP_337.016ab/
prayogeṣu prayogantu sūtradhṛgyatra varṇayet

tataś ca praviśet pātraṃ prayogātiśayo hi saḥ /AP_337.017ab/
śarīraṃ nāṭakādīnāmitivṛttaṃ pracakṣate

siddhamutprekṣitañceti tasya bhedābubhau smṛtau /AP_337.018ab/
siddhamāgamadṛṣṭañca sṛṣṭamutprekṣitaṃ kaveḥ

vījaṃ vinduḥ patākā ca prakarī kāryameva ca /AP_337.019ab/
arthaprakṛtayaḥ pañca pañca ceṣṭā api kramāt

prārambhaś ca prayatnaś ca prāptiḥ sadbhāva eva ca /AP_337.020ab/
niyatā ca phalaprāptiḥ phalayogaś ca pañcamaḥ

mukhaṃ pratimukhaṃ garbho vimarṣaś ca tathaiva ca /AP_337.021ab/
tathā nirvahaṇañceti kramāt pañcaiva sandhayaḥ

alpamātraṃ samuddiṣṭaṃ bahudhā yat prasarpati /AP_337.022ab/
:p 204
phalāvasānaṃ yaccaiva vījaṃ tadabhidhīyate

yatra vījasamutpattirnānārtharasasambhavā /AP_337.023ab/
kāvye śarīrānugataṃ tanmukhaṃ parikīrtitaṃ

iṣṭasyārthasya racanā vṛttāntasyānupakṣayaḥ /AP_337.024ab/
rāgaprāptiḥ prayogasya guhyānāñcaiva gūhanam

āś caryavadabhikhyātaṃ prakāśānāṃ prakāśanam /AP_337.025ab/
aṅgahīnaṃ naro yadvanna śreṣṭhaṃ kāvyameva ca

deśakālau vinā kiñcinnetivṛttaṃ pravartate /AP_337.026ab/
atastayorupādānaniyamāt padamucyate

deśeṣu bhārataṃ varṣaṃ kāle kṛtayugatrayaṃ /AP_337.027ab/
narte tābhyāṃ prāṇabhṛtāṃ sukhaduḥkhodayaḥ kvacit /AP_337.027cd/
sarge sargādivārtā ca prasajjantī na duṣyati