Agni Purana · Chapter 31

:e ity ādimahāpurāṇe āgneye maṇḍalādivarṇanaṃ nāma triṃśo
'dhyāyaḥ
% Chapter {31}
:ś atha ekatriṃśo 'dhyāyaḥ
mārjanavidhānaṃ
agnir uvāca
rakṣāṃ svasya pareṣāñca vakṣye tāṃ mārjanāhvayāṃ /AP_31.001ab/
yayā vimucyate duḥkhaiḥ sukhañca prāpnuyānnaraḥ(2)

oṃ namaḥ paramārthāya puruṣāya mahātmane /AP_31.002ab/
arūpabahurūpāya vyāpine paramātmane

niṣkalmaṣāya śuddhāya dhyānayogaratāya ca /AP_31.003ab/
namaskṛtya pravakṣyāmi yat tatsidhyatu me vacaḥ

varāhāya nṛsiṃhāya vāmanāya mahāmune /AP_31.004ab/
namaskṛtya pravakṣyāmi yattatsidhyatu me vacaḥ

:n
1 mantrajaṃ phalamaśnute iti kha, cihnitapustakapāṭhaḥ
2 sukhaṃ brahmāpnuyānnaraḥ iti kha, cihnitapustakapāṭhaḥ
:p 87
trivikramāya rāmāya vaikuṇṭhāya narāya ca /AP_31.005ab/
namaskṛtya pravakṣyāmi yattat sidhyatu me vacaḥ

varāha narasiṃheśa vāmaneśa trivikrama /AP_31.006ab/
haragrīveśa sarveśa hṛṣīkeśa harāśubham

aparājitacakrādyaiś caturbhiḥ paramāyudhaiḥ /AP_31.007ab/
akhaṇḍitānubhāvaistvaṃ(1) sarvaduṣṭaharo bhava

harāmukasya duritaṃ sarvañca kuśalaṃ kuru /AP_31.008ab/
mṛtyubandhārtabhayadaṃ duritasya ca yat phalam

parābhidhyānasahitaiḥ prayuktañcābhicārakam /AP_31.009ab/
gadasparśamahārogaprayogaṃ jarayā jara

oṃ namo vāsudevāya namaḥ kṛṣṇāya khaḍgine /AP_31.010ab/
namaḥ puṣkaranetrāya keśavāyādicakriṇe

namaḥ kamalakiñjalkapītanirmalavāsase /AP_31.011ab/
mahāhararipuskandhasṛṣṭacakrāya cakriṇe

dṃṣṭroddhṛtakṣitibhṛte(2) trayīmūrtimate namaḥ /AP_31.012ab/
mahāyajñavarāhāya śeṣabhogāṅkaśāyine

taptahāṭakakeśāgrajvalatpāvakalocana /AP_31.013ab/
vajrādhikanakhasparśaṃ divyasiṃha namostu te

kāśyapāyātihrasvāya ṛgyajuḥsāmabhūṣita /AP_31.014ab/
tubhyaṃ vāmanarūpāyākramate gāṃ(3) namo namaḥ

varāhāśeṣaduṣṭāni sarvapāpaphalāni vai /AP_31.015ab/
marda marda mahādaṃṣṭra marda marda ca tatphalam

:n
1 akhaṇḍitātmabhāvaistvamiti kha, cihnitapustakapāṭhaḥ
2 daṃṣṭroddhṛtabhūmibhartre iti kha, cihnitapustakapāṭhaḥ
3 sṛjate gāmiti kha, cihnitapustakapāṭhaḥ
:p 88
narasiṃha karālākhya dantaprāntānalojjvala /AP_31.016ab/
bhañja bhañja ninādena duṣṭānyasyārtināśana

ṛgyajuḥsāmagarbhābhirvāgbhirvāmanarūpadhṛk /AP_31.017ab/
praśamaṃ sarvaduḥkhāni nayattvasya janārdanaḥ

aikāhikaṃ dvyāhikañca tathā tridivasaṃ jvaram /AP_31.018ab/
cāturthakantathātyugrantathaiva satatajvaram

doṣotthaṃ sannipātotthaṃ tathaivāgantukaṃ jvaram /AP_31.019ab/
śamaṃ nayāśu govinda cchindhi cchindhyasya vedanām(1)

netraduḥkhaṃ śiroduḥkhaṃ duḥkhañcodarasambhavam /AP_31.020ab/
antaḥśvāsamatiśvāsaṃ(2) paritāpaṃ savepathum

gudaghrāṇāṅghrirogāṃś ca kuṣṭharogāṃs tathā kṣayaṃ(3) /AP_31.021ab/
kāmalādīṃs tathā rogān pramehāṃścātidāruṇān

bhagandarātisārāṃś ca mukharogāṃś ca valgulīm /AP_31.022ab/
aśmarīṃ mūtrakṛcchrāṃś ca rogānanyāṃś ca dāruṇān

ye vātaprabhavā rogā ye ca pittasamudbhavāḥ /AP_31.023ab/
kaphodbhavāś ca ye kecit ye cānye sānnipātikāḥ

āgantukāś ca ye rogā lūtā visphoṭakādayaḥ /AP_31.024ab/
te sarve praśamaṃ yāntu vāsudevāpamārjitāḥ(5)

vilayaṃ yāntu te sarve viṣṇoruccāraṇena ca /AP_31.025ab/
kṣayaṃ gachhantu cāśeṣāste cakrābhihatā hareḥ

:n
1 chinda chindāsya vedanāmiti ga, cihnitapustakapāṭhaḥ
2 aniśvāsamatiśvāsamiti ga, cihnitapustakapāṭhaḥ
3 tathaiva ca iti ga, cihnitapustakapāṭhaḥ
4 ye rogāḥ pittasambhavā iti ga, cihnitapustakapāṭhaḥ
5 vāsudevaparājitā iti kha, cihnitapustakapāṭhaḥ
:p 89
acyutānantagovindanāmoccāraṇabhīṣitāḥ /AP_31.026ab/
naśyanti sakalā rogāḥ satyaṃ satyaṃ vadāmyaham

sthāvaraṃ jaṅgamaṃ vāpi kṛtrimaṃ cāpi yadviṣam /AP_31.027ab/
dantodbhavaṃ nakhabhavamākāśaprabhavaṃ viṣam

lūtādiprabhavaṃ yacca viṣamanyattu duḥkhadaṃ /AP_31.028ab/
śamaṃ nayatu tat sarvaṃ kīrtitosya janārdanaḥ

grahān pretagrahāṃścāpi tathā vai ḍākinīgrahān(1) /AP_31.029ab/
vetālāṃś ca piśācāṃś ca gandharvān yakṣarākṣasān(2)

śakunīpūtanādyāṃś ca tathā vaināyakān grahān /AP_31.030ab/
mukhamaṇḍīṃ tathā krūrāṃ revatīṃ vṛddharevatīm

vṛddhakākhyān grahāṃścogrāṃs tathā mātṛgrahānapi /AP_31.031ab/
bālasya viṣṇoś caritaṃ hantu bālagrahānimān

vṛddhāś ca ye grahāḥ kecidye ca bālagrahāḥ kvacit /AP_31.032ab/
narasiṃhasya te dṛṣṭyā dagdhā ye cāpi yauvane

sadā(3) karālavadano narasiṃho mahābalaḥ /AP_31.033ab/
grahānaśeṣānniḥśeṣān karotu jagato hitaḥ

narasiṃha mahāsiṃha jvālāmālojjvalānana /AP_31.034ab/
grahānaśeṣān sarveśa khāda khādāgnilocana

ye rogā ye mahotpātā yadviṣaṃ ye mahāgrahāḥ /AP_31.035ab/
yāni ca krūrabhṛtāni grahapīḍāś ca dāruṇāḥ

śastrakṣateṣu ye doṣā jvālāgardabhakādayaḥ /AP_31.036ab/
tāni sarvāṇi sarvātmā paramātmā janārdanaḥ

:n
1 tathā vetālikān grahāniti gha, cihnitapustakapāṭhaḥ
2 gandharvān rāksasānapi iti kha, cihnitapustakapāṭhaḥ
3 śaṭā iti kha, ṅa, cihnitapustakadvayapāṭhaḥ
:p 90
kiñcidrūpaṃ samāsyāya vāsudevāsya nāśaya //37

kṣiptvā sudarśanañ cakraṃ jvālāmālātibhīṣaṇam /AP_31.038ab/
sarvaduṣṭopaśamanaṃ kuru devavarācyuta

sudarśana mahājvāla cchindhi cchindhi mahārava(1) /AP_31.039ab/
sarvaduṣṭāni rakṣāṃsi kṣayaṃ yāntu vibhīṣaṇa

prācyāṃ pratīcyāṃ ca diśi dakṣiṇottaratas tathā /AP_31.040ab/
rakṣāṅkarotu sarvātmā narasiṃhaḥ sugarjitaḥ(2)

divi bhuvyantarīkṣe ca pṛṣṭhataḥ pārśvatogrataḥ /AP_31.041ab/
rakṣāṅkarotu bhagavān bahurūpī janārdanaḥ

yathā viṣṇurjagatsarvaṃ sadevāsuramānuṣaṃ /AP_31.042ab/
tena satyena duṣṭāni śamamasya vrajantu vai(3)

yathā viṣṇau smṛte sadyaḥ saṅkṣayaṃ yānti pātakāḥ /AP_31.043ab/
satyena tena sakalaṃ duṣṭamasya praśāmyatu

paramātmā yathā viṣṇurvedānteṣu ca gīyate /AP_31.044ab/
tena satyena sakalaṃ duṣṭamasya praśāmyatu

yathā yajñeśvaro viṣṇurdeveṣvapi hi gīyate /AP_31.045ab/
satyena tena sakalaṃ yanmayoktaṃ tathāstu tat

śāntirastu śivañcāstu duṣṭamasya praśāmyatu /AP_31.046ab/
vāsudevaśarīrotthaiḥ kuśair nirmathitaṃ mayā(4)

apamārjatu govindo naro nārāyaṇas tathā /AP_31.047ab/
tathāstu sarvaduḥkhānāṃ praśamo japanāddhareḥ

:n
1 mahābala iti kha, cihnitapustakapāṭhaḥ
2 svargarjitair iti ga, ṅa, cihnitapustakadvayapāṭhaḥ
3 prayāntu vai iti ga, cihnitapustakapāṭhaḥ
4 kuśair nirṇāśitamiti kha, ga, cihnitapustakadvayapāṭhaḥ
:p 91
apamārjanakaṃ śastraṃ sarvarogādivāraṇam /AP_31.048ab/
ayaṃ hariḥ kuśo viṣṇurhatā rogā mayā tava