Agni Purana · Chapter 281

:e ity āgneye mahāpurāṇe rasādilakṣaṇaṃ
nāmāśītyadhikadvisatatamo 'dhyāyaḥ ||
% chapter {281}
:ś athaikāśītyadhikadviśatatamo 'dhyāyaḥ
vṛkṣāyurvedaḥ
dhanvantarir uvāca
vṛkṣāyurvedamākhyāsye plakṣaścottarataḥ śubhaḥ /AP_281.001ab/
prāgvaṭo yāmyatastvāmra āpye 'śvatthaḥ karmeṇa tu

dakṣiṇāṃ diśamutpannāḥ samīpe kaṇṭakadrumāḥ /AP_281.002ab/
udyānaṃ gṛhavāse(1) syāt tilān vāpyatha puṣpitān

gṛhṇīyādropayedvṛkṣān dvijañcandraṃ prapūjya ca /AP_281.003ab/
dhruvāṇi pañca vāyavyaṃ hastaṃ prājeśavaiṣṇavaṃ

nakṣatrāṇi tathā mūlaṃ śasyante drumaropaṇe /AP_281.004ab/
praveśayennadīvāhān puṣkariṇyāntu(2) kārayet

:n
1 gṛhavāme iti ña..
2 puṣkariṇyāntviti pāṭho na samyak pratibhāti
:p 42
hastā maghā tathā maitramādyaṃ puṣyaṃ savāsavaṃ /AP_281.005ab/
jalāśayasamārambhe vāruṇañcottarātrayam

saṃpūjya varuṇaṃ viṣṇuṃ parjanyaṃ tat samācaret /AP_281.006ab/
ariṣṭāśokapunnāgaśirīṣāḥ sapriyaṅgavaḥ

aśokaḥ kadalī jambus tathā vakuladāḍimāḥ /AP_281.007ab/
sāyaṃ prātastu gharmartau śītakāle dināntare

varṣāratrau bhuvaḥ śoṣe sektavyā ropitā drumāḥ /AP_281.008ab/
uttamaṃ viṃśatirhastā madhyamaṃ ṣoḍaśāntaram

sthānāt sthānāntaraṃ kāryaṃ vṛkṣāṇāṃ dvādaśāvaraṃ /AP_281.009ab/
viphalāḥ syurghanā vṛkṣāḥ śastreṇādau hi śodhanam

viḍaṅgaghṛtapaṅkāktān secayecchītavāriṇā /AP_281.010ab/
phalanāśe kulathaiś ca māsair mudgair yavaistilaiḥ

ghṛtaśītapayaḥsekaḥ phalapuṣpāya sarvadā /AP_281.011ab/
āvikājaśakṛccūrṇam yavacūrṇaṃ tilāni ca

gomāṃsamudakañcaiva saptarātraṃ nidhāpayet /AP_281.012ab/
utsekaḥ sarvavṛkṣāṇāṃ phalapuṣpādivṛddhidaḥ

matsyāmbhasā tu sekena vṛddhirbhavati śākhinaḥ /AP_281.013ab/
viḍaṅgataṇḍulopetaṃ matsyaṃ māṃsaṃ hi dohadaṃ /AP_281.013cd/
sarveṣāmaviśeṣeṇa vṛkṣāṇāṃ rogamardanam