Agni Purana · Chapter 255

:e ity āgneye mahāpurāṇe divyāni pramāṇāni nāma
catuḥpañcāśadadhikadviśatatamo 'dhyāyaḥ ||
% Chapter {255}
:ś atha pañcapañcāśadadhikadviśatatamo 'dhyāyaḥ
dāyavibhāgakathanam
agnir uvāca
vibhāgañcet pitā kuryādicchayā vibhajet sutān /AP_255.001ab/
jyeṣṭhaṃ vā śreṣṭhabhāgena sarve vā syuḥ samāṃśinaḥ

yadi dadyāt samānaṃśān kāryāḥ patnyaḥ samāṃśikāḥ /AP_255.002ab/
na dattaṃ strīdhanaṃ yāsāṃ bhartrā vā śvaśurena vā

śaktasthānīhamānasya kiñciddatvā pṛthak kriyā /AP_255.003ab/
nyūnādhikavibhaktānāṃ dharmyaś ca pitṛnā kṛtaḥ

vibhajeyuḥ sutāḥ pitrorūrdhvamṛkthamṛṇaṃ samam /AP_255.004ab/
māturduhitaraḥ śeṣamṛṇāttābhya ṛte 'nnayaḥ

pitṛdravyāvināśena yadanyat svayamarjayet /AP_255.005ab/
maitramaudvāhikañcaiva dāyādānānna tadbhavet

sāmānyārthasamutthāne vibhāgastu samaḥ smṛtaḥ /AP_255.006ab/
:p 421
anekapitṛkāṇāntu pitṛto bhāgakalpanā

bhūryāpitā mahopāttā nibandho dravyameva vā /AP_255.007ab/
tatra syāt sadṛśaṃ svāmyaṃ pituḥ putrasya cobhayoḥ

vibhakteṣu suto jātaḥ savarṇāyāṃ vibhāgabhāk /AP_255.008ab/
dṛśyādvā tadvibhāgaḥ syādāyavyayaviśodhitāt

kramādabhyāgataṃ dravyaṃ hṛtamabhyuddharecca yaḥ /AP_255.009ab/
dāyādebhyo na taddadyādvidyayā labdhameva ca

pitṛbhyāṃ yasya yaddattaṃ tattasyaiva dhanaṃ bhavet /AP_255.010ab/
piturūrdhvaṃ vibhajatāṃ mātāpyaṃśaṃ samaṃ haret

asaṃskṛtāstu saṃskāryā bhrātṛbhiḥ pūrvasaṃskṛtaiḥ /AP_255.011ab/
bhāginyaś ca nijādaṃśāddatvāṃśantu turīyakaṃ

catuḥstridvyekabhāgāḥ syurvarṇaśo brāhmaṇātmajāḥ /AP_255.012ab/
kṣatrajāstridvyekabhāgā viḍjāstu dvyekabhāginaḥ

anyonyāpahṛtaṃ dravyaṃ vibhakte yattu dṛśyate /AP_255.013ab/
tat punaste samair aṃśair vibhajeranniti sthitiḥ

aputreṇa parakṣetre niyogotpāditaḥ sutaḥ /AP_255.014ab/
ubhayorapyasāvṛkthī piṇḍadātā ca dharmataḥ

auraso dharmapatnījastatsamaḥ putrikāsutaḥ /AP_255.015ab/
kṣetrajaḥ kṣetrajātastu sagotreṇetareṇa vā

gṛhe pracchanna utpanno gūḍhajastu sutaḥ smṛtaḥ /AP_255.016ab/
kānīnaḥ kanyakājāto mātāmahasuto mataḥ

kṣatāyāmakṣatāyāṃ vā jātaḥ paunarbhavaḥ sutaḥ /AP_255.017ab/
dadyānmātā pitā vā yaṃ sa putrī dattako bhavet

:p 422
krītaś ca tābhyāṃ vikrītaḥ kṛtrimaḥ syāt svyaṃ kṛtaḥ /AP_255.018ab/
dattātmā tu svayaṃ datto garbhe vittaḥ sahoḍhajaḥ

utsṛṣṭo gṛhyate yastu sopaviddho bhavet sutaḥ /AP_255.019ab/
piṇḍado 'ṃśaharaś caiṣāṃ pūrvābhāve paraḥ paraḥ

sajātīyeṣvayaṃ proktastanayeṣu mayā vidhiḥ /AP_255.020ab/
jāto 'pi dāsyāṃ śūdrasya kāmato 'ṃśaharo bhavet

mṛte pitari kuryustaṃ bhrātarastvardhabhāgikaṃ /AP_255.021ab/
abhrātṛko haret sarvaṃ duhitṝṇāṃ sutādṛte

patnī duhitaraś caiva pitaro bhrātaras tathā /AP_255.022ab/
tatsuto gotrajo bandhuḥ śiṣyaḥ sabrahmacāriṇaḥ

eṣāmabhāve pūvasya dhanabhāguttarottaraḥ /AP_255.023ab/
svaryātsya hy aputrasya sarvavarṇeṣvayaṃ vidhiḥ

vānaprasthayatibrahmacāriṇāmṛkthabhāginaḥ /AP_255.024ab/
krameṇācāryasacchiṣyadharmabhrātrekatīrthinaḥ

saṃsṛṣṭinastu saṃsṛṣṭī sodarasya tu sodaraḥ /AP_255.025ab/
dadyāccāpahereccāṃśaṃ jātasya ca mṛtasya ca

anyodaryastu saṃsṛṣṭī nānyodaryadhanaṃ haret /AP_255.026ab/
asaṃsṛṣtyapi cādadyātsodaryo nānyamānṛjaḥ

patitastatsutaḥ klīvaḥ paṅgurunmattako jaḍaḥ /AP_255.027ab/
andho 'cikitsyarogādyā bhartavyāstu niraṃśakāḥ

aurasāḥ kṣetrajāstveṣāṃ nirdoṣā bhāgahāriṇaḥ /AP_255.028ab/
sutāś caiṣāṃ prabhartavyā yāvadvai bhartṛsātkṛtāḥ

aputrā yoṣitaś caiṣāṃ bhartavyāḥ sādhuvṛttayaḥ /AP_255.029ab/
:p 423
nirvāsyā vyabhicāriṇyaḥ pratikūlāstathaiva ca

pitṛmātṛpatibhrātṛdattamadhyagnyupāgataṃ /AP_255.030ab/
ādhivedanikuñcaiva strīdhanaṃ parikīrtitaṃ

bandhudattaṃ tathā śulkamanvādheyakameva ca /AP_255.031ab/
aprajāyāmatītāyāṃ bāndhavāstadavāpnuyuḥ

aprajāstrīdhanaṃ bhratturbrāhmyādiṣu caturṣvapi /AP_255.032ab/
duhitṛṇāṃ prasūtā cecchreṣe tu pitṛgāmi tat

datvā kanyāṃ haran daṇḍyo vyayaṃ dadyācca sodayam /AP_255.033ab/
mṛtāyāṃ dattamādadyāt pariśodhyobhayavyayam

durbhikṣe dharmakārye ca vyādhau saṃpratirodhake /AP_255.034ab/
gṛhītaṃ strīdhanaṃ bhartā na striye dātumarhati

adhivittastriyai dadyādadhivedanikaṃ samam /AP_255.035ab/
na dattaṃ srīdhanaṃ yasyai datte tvardhaṃ prakīrtitam

vibhāganihnave jñātibandhusākṣyabhilekhitaiḥ /AP_255.036ab/
vibhāgabhāvanā jñeyā gṛhakṣetraiś ca yautikaiḥ