Agni Purana · Chapter 225

:e ity āgneye mahāpurāṇe rājadharmo nāma
caturviṃśatyadhikadviśatatamo 'dhyāyaḥ ||
% Chapter {225}
:ś atha pañcaviṃśatyadhikadviśatatamo 'dhyāyaḥ
rājadharmāḥ
puṣkara uvāca
svayameva karma daivākhyaṃ viddhi dehāntarārjitaṃ /AP_225.001ab/
tasmāt pauruṣameveha śreṣṭhamāhurmanīṣiṇaḥ

:p 320
pratikūlaṃ tathā daivaṃ pauruṣeṇa vihanyate /AP_225.002ab/
sāttvikāt karmaṇaḥ pūrvāt siddhiḥ syātpauruṣaṃ vinā

pauruṣaṃ daivasampattyā kāle phalati bhārgava /AP_225.003ab/
daivaṃ puruṣakāraś ca dvayaṃ puṃsaḥ phalāvahaṃ

kṛṣervṛṣṭisamāyogāt kāle syuḥ phalasiddhayaḥ /AP_225.004ab/
sadharmaṃ pauruṣaṃ kuryānnālaso na ca daivavān

sāmādibhirupāyaistu sarve siddhyantyupakramāḥ /AP_225.005ab/
sāma copapradānañca bhedadaṇḍau tathāparau

māyopekṣendrajālañca upāyāḥ sapta tāñchṛṇu /AP_225.006ab/
dvividhaṃ kathitaṃ sāma tathyañcātathyameva ca

tatrāpyatathyaṃ sādhūnāmākrośāyaiva jāyate /AP_225.007ab/
mahākulīnā hy ṛjavo dharmanityā jitendriyāḥ

sāmasādhyā atathyaiś ca gṛhyante rākṣasā api /AP_225.008ab/
tathā taduprakārāṇāṃ kṛtānāñcaiva varṇanaṃ

parasparantu ye dviṣṭāḥ kruddhabhītāvamānitāḥ /AP_225.009ab/
teṣānbhedaṃ prayuñjīta paramaṃ darśayedbhayaṃ(1)

ātmīyān darśayedāśāṃ yena doṣeṇa bibhyati /AP_225.010ab/
parāstenaiva te bhedyā rakṣyo vai jñātibhedakaḥ

sāmantakoṣo vāhyastu mantrāmātyātmajādikaḥ(2) /AP_225.011ab/
antaḥkoṣañcopaśāmya kurvan śatroś ca taṃ jayet

upāyaśreṣṭhaṃ dānaṃ syāddānādubhayalokabhāk /AP_225.012ab/
na so 'sti nāma dānena vaśago yo na jāyate

:n
1 parasmādarśayedbhayamiti ña..
2 mantrāmātyānujādika iti ña..
:p 321
dānavāneva śaknoti saṃhatān bhedituṃ parān /AP_225.013ab/
trayāsādhyaṃ sādhayettaṃ daṇḍena ca kṛtena ca

daṇḍe sarvaṃ sthitaṃ daṇḍo nāśayedduṣpraṇīkṛtaḥ /AP_225.014ab/
adaṇḍyān daṇḍayannaśyeddaṇḍyānrājāpyadaṇḍayan

daivadaityoraganarāḥ siddhā bhūtāḥ patatriṇaḥ /AP_225.015ab/
utkrameyuḥ svamaryādāṃ yadi daṇḍān na pālayet

yasmādadāntān damayatyadaṇḍyāndaṇḍayatyapi /AP_225.016ab/
damanāddaṇḍanāccaiva tasmāddaṇḍa vidurbudhāḥ

tejasā dur nirīkṣyo hi rājā bhāskaravattataḥ /AP_225.017ab/
lokaprasādaṃ gaccheta darśanāccandravattataḥ

jagadvyāpnoti vai cārair ato rājā samīraṇaḥ /AP_225.018ab/
doṣanigrahakāritvādrājā vaivasvataḥ prabhuḥ

yadā dahati durbuddhiṃ tadā bhavati pāvakaḥ /AP_225.019ab/
yadā dānaṃ dvijātibhyo dadyāt tasmāddhaneśvaraḥ

dhanadhārāpravarṣitvāddevādau varuṇaḥ smṛtaḥ /AP_225.020ab/
kṣamayā dhārayaṃllekān pārthivaḥ pārthivo bhavet

utsāhamantraśaktyādyai rakṣedyasmāddharistataḥ