Abhijñānaśakuntala · Chapter 3

kā kathā bāṇasaṃdhāne jyāśabdenaiva dūrataḥ /
huṃkāreṇeva dhanuṣaḥ sa hi vighnān apohati //

jāne tapaso vīryaṃ sā bālā paravatīti me viditam /
alam asmi tato hṛdayaṃ tathāpi nedaṃ nivartayitum //

tava kusumaśaratvaṃ śītaraśmitvam indor dvayam idam ayathārthaṃ dṛśyate madvidheṣu /
visṛjati himagarbhair agnim indur mayūkhais tvam api kusumabāṇān vajrasārīkaroṣi //

adya api nūnaṃ harakopavahninas tvayi jvalaty aurva ivāmburāśau /
tvam anyathā manmatha madvidhānāṃ bhasmāvaśeṣaḥ katham ittham uṣṇaḥ //

aniśam api makaraketur manaor rujam āvahann abhimato me /
yadi madirāyatanayanāṃ tām adhikṛtya praharatīti //

śakyam aravindasurabhiḥ kaṇavāhī mālinītaraṅgāṇām /
aṅgair anaṅgataptair aviralam āliṅgituṃ pavanaḥ //

abnyunnatā purastād avagāḍhā jaghanagauravāt paścāt /
dvāre 'sya pāṇḍusikate padapaṅktir dṛśyate 'bhinavā //

stananyastośīraṃ praśithilamṛṇālaikavalayam priyāyāḥ sābādhaṃ kim api kamanīyaṃ vapur idam /
samas tāpaḥ kāmaṃ manasijanidāghaprasarayor na tu grīṣmasyaivaṃ subhagam aparādhaṃ yuvatiṣu //

kṣāmakṣāmakapolam ānanam uraḥ kāṭhinyam uktastanam madhyaḥ klāntataraḥ prakāmavinatāv aṃsau chaviḥ pāṇḍurā /
śocyā ca priyadarśanā ca madanakliṣṭeyam ālakṣyate patrāṇām iva śoṣaṇena marutā spṛṣṭā latā mādhavī //

pṛṣṭā janena samaduḥkhasukhena bālā neyaṃ na vakṣyati manogatam ādhihetum /
dṛṣṭo vivṛtya bahuśo 'py anayā satṛṣṇam atrāntare śravaṇakātaratāṃ gato 'smi //

smara eva tāpahetur nirvāpayitā sa eva me jātaḥ /
divasa ivābhraśyāmas tapātyaye jīvalokasya //

idam aśiśirair antastāpād vivarṇam aṇīkṛtam niśi niśi bhujanyastāpāṅgaprasāribhir aśrubhiḥ /
alabhilulitajyāghātāṅkaṃ muhur maṇibandhanāt kanakavalayaṃ srastaṃ srastaṃ mayā pratisāryate //

ayaṃ sa te tiṣṭhati saṃgamotsuko viśaṅkase bhīru yato 'vadhīraṇām /
labheta vā prārthayitā na vā śriyam śriyā durāpaḥ katham īpsito bhavet //

unnamitaikabhrūlatam ānanam asyāḥ padāni racayantyāḥ /
kaṇṭakitena prathayati may anurāgaṃ kapolena //

tava na jāne hṛdayaṃ mama punaḥ kāmo divā api rātrāv api /
nirghṛṇa tapati balīyas tvayi vṛttamanorathāyā aṅgāni //

tapati tanugātri madanas tvām aniśaṃ māṃ punar dahaty eva /
glapayati yathā śaśāṅkaṃ na tathā hi kumudvatīṃ divasaḥ //

saṃdaṣṭasukumaśayanāny āśuktāntabisabhaṅgasurabhīṇi /
guruparitāpāni na te gātrāṇy upacāram arhanti //

idam ananyaparāyaṇam anyathā hṛdayasaṃnihite hṛdayaṃ mama /
yadi samarthayase madirekṣaṇe madanabāṇahato 'smi hataḥ punaḥ //

parigrahabahutve 'pi dve pratiṣṭhe kulasya me /
samudrarasanā corvī sakhī ca yuvayor iyam //

kiṃ śītalaiḥ klamavinodibhir ārdravātān sañcārayāmi nalinīdalatālavṛntaiḥ /
aṅke nidhāya karabhoru yathāsukhaṃ te saṃvāhayāmi caraṇāv uta padmatāṃrau //

utsṛjya kusumaśayanaṃ nalinīdalakalpitastanāvaraṇam /
katham ātape gamiṣyasi paribādhāpelavair aṅgaiḥ //

gāndharveṇa vivāhena bahvyo rājarṣikanyakāḥ /
śrūyante pariṇītās tāḥ pitṛbhiś cābhinanditāḥ //

aparikṣatakomalasya yāvat kusumasyeva navasya ṣaṭpadena /
adharasya pipāsatā mayā te sadayaṃ sundari gṛhyate raso 'sya //

muhur aṅgulisaṃvṛtādharauṣṭhaṃ pratiṣedhākṣaraviklavābhirāmam /
mukham aṃsavivarti pakṣmalākṣyāḥ katham apy unnamitaṃ na cumbitaṃ tu //

tasyāḥ puṣpamayī śarīralulitā śayyā śilāyām iyam klānto manmathalekha eṣa nalinīpatre nakhair arpitaḥ /
hastād bhraṣṭam idaṃ bisābharaṇam ity āsajyamānekṣaṇo nirgantuṃ sahasā na vetasagṛhāc chaknomi śūnyād api //

sāyaṃtane sadanakarmaṇi saṃpravṛtte vediṃ hutāśanavatīṃ paritaḥ prayastāḥ /
chāyāś caranti bahudhā bhayam ādadhānāḥ saṃdhyāpayodakapiśāḥ piśitāśanānām //