Abhidharmadīpa · Verses 561-580

yuktārthacodanād duḥkhatrāṇāddoṣānuśāsanāt /
śāstramityucyate 'to 'nyajjñeyaṃ vātikabhāṣitam

pārasīkādimantrāṇāṃ viṣotsadabalaṃ kvacit /
dṛśyate na tu sarvasminnariṣṭādyanivartanāt

rāgādyairdūṣyate cittaṃ śraddhādyaiśca viśudhyate /
viprasyāpi yatastasmād guṇavāneva mucyate

śuddhaṃ caturvidhaṃ hānabhāgīyādi yathākramam /
nyūnatulyabalotkṛṣṭanirmalānuguṇaṃ hi tat

kleśasvoparimasthānanīrajaskānuvarti vā /
dve trīṇi trīṇi ca dve vā hānapakṣyādyanantaram

vyutkrāntakasamāpattirarhato 'kopyadharmaṇaḥ /
tatprayogo dvidhā bhūmirgatvāgamyajigīṣayā

dharmabhūmyutkrameṇāṣṭau śuddhakākhyādanāsravam /
śuddhakācca tṛtīyaṃ svaṃ niṣṭhā śuddhācca nirmalam

svordhvā evopajanyante dhyānārūpyabhavaḥ śubhāḥ /
bhavāgrasthastvagatyādau nirmalāmavalambate

bālādyadhyānasaṃprāptau laukikasyaiva bhāvanā /
ūṣmādivarjye cālabdhe dhyānāntarasamudbhave

vītarāgasya cālabdhe pūrvasāmantake tathā /
viraktasya tu pūrvasya nirmalasyaiva bhāvanā

nyāmamārgānvayajñāne śaikṣasyākṣavivardhane /
ānantaryāhvaye mārge dṛṅmārge dvādaśakṣaṇāḥ

bhavāgrasya ca vairāgye kṣayajñānavivarjite /
ākopyā ................................

āryasya kāmavairāgye carame muktivartmani /
jñānatraye trayākhye ca nyāme 'nāgamyavarjite

śaikṣasya rāgiṇaḥ pūrvatribhūmīndriyavardhane /
prayogamuktimārgeṣu kāmādyadhyānajasya ca

dvividhārhatvasaṃprāptau muktivartmani paścime /
viraktānāṃ ca śaikṣāṇāmavyagrānyatribhūjaye

bhāvanā dvividhasyāpi nobhayasya tu bhāvanām /
anāgamyāśraye nyāma tadbhāgīyodbhavādiṣu

dvitīyādiṣvanenaiva vidhinābhyuhya yuktitaḥ /
abhidharmanayajñāne jñeyānāgatabhāvanā

sāsvādaḥ svabhavālambaḥ śubhaṃ dhyānaṃ samantadṛk /
ārupyāḥ kuśalā maulā nādholokāvalambinaḥ

dhyānārūpyaiḥ prahīyante nirmalairmānaso malāḥ /
adhobhūmestu labhyante sāmantairapi śuddhakaiḥ

savitarkavicārādyāstrayaḥ proktāḥ samādhayaḥ /
dhyānāntare sa cārodhaḥ sadvayo 'nyatra nirdvayaḥ