Abhidharmadīpa · Verses 581-597

sāsravānāsravaścānya ekādaśabhuvastrayaḥ /
āryākāramatidyotāḥ śūnyatādyaḥ samādhayaḥ

daśāpraṇihitākārāḥ śūnyatāyā dvayaṃ matam /
animitto 'mṛtākāraiścaturbhiḥ saṃpravartate

vimukterdviprakārāyāḥ prāptaye nirmalāḥ punaḥ /
vimokṣasu(mu ?)khaśabdena ta evāviṣkṛtāstrayaḥ

trayo 'parasamādhyākhyā śūnyatāśūnyatādayaḥ /
dvayamālambate 'śaikṣaṃ śūnyato 'nityatastathā

kṣayamapratisaṃkhyākhyamantyo gṛhṇāti śāntataḥ /
ekādaśabhuvaḥ sarve sāsravā nṛṣvakopinaḥ

samādhibhāvanādhyānaṃ sukhāya prathamaṃ śubham /
darśanāyākṣyabhijñoktā prajñābhedāya yātnikāḥ

yo 'ntyo vajropame dhyāne sarvakleśakṣayāya sā /
sūtraṃ caitatsamākhyātaṃ buddhenātmopanāyikam

caturṇāmapramāṇānāṃ maitryadveṣastathā kṛpā /
muditā prītirekeṣāmupekṣālobha iṣyate

vyāpādasya vihiṃsāyā aratestṛḍdviṣastathā /
pratipakṣo 'yamākhyāto damanārthaṃ svacetasaḥ

sukhādhāne sukhā maitrī duḥkhanāśonmukhī kṛpā /
muditā modanānimnā sattvā ebhyeva paścimā

draṣṭavyā vṛttireteṣāṃ ākāraiḥ sukhitādi bhiḥ /
ebhyastvanyatamenāpi brahmasāyujyamaśnute

nṛṣu kāmāvalambīni dhyānayormuditāhvayoḥ /
ṣaḍbhaumāni tadanyāni kecidicchanti saptasu

vimokṣāḥ kathitā aṣṭau teṣāṃ dvāvaśubhātmakau /
tāvādyadhyānayorantye tṛtīyo 'lobhalakṣaṇaḥ

catvāraḥ kuśalārūpā vimokṣākhyā samāhitāḥ /
nirodhākhyasamāpattirvimokṣaḥ kathito 'ṣṭamaḥ

tasyāstu saṃmukhībhāvaḥ sūkṣmasūkṣmādanantaram /
vyutthānacittamapyasyāḥ svaṃ śuddhaṃ nirmalaṃ tvadhaḥ

kāmāvacaradṛśyārthā vimokṣāḥ prathamāstrayaḥ /
anye tvanvayadhīpakṣasvordhvaduḥkhādyavekṣiṇāḥ

sūtre 'bhibhavasaṃjñākhyaṃ proktamāyatanāṣṭakam /
vimokṣādhikavṛttyetaccittaiśvaryapradarśakam