Abhidharmadīpa · Verses 541-560

āsvādavatsatṛṣṇaṃ yacchaddhakaṃ laukikaṃ matam /
ado(dho?)dhvastaṃ tadāsvādyamatilokamanāsravam

aṅgānyādye śubhe pañca vitarkaścittasūkṣmatā /
prītiḥ sukhaṃ samādhānaṃ kliṣṭaṃ sukhavivarjitam

sādhyātmasaprasādāstu sukhaprītisamādhayaḥ /
dvitīye 'ṅgāni catvāri kliṣṭe śraddhā sukhādṛte

tṛtīye pañcame prajñā smṛtyupekṣā sukhaṃ sthitiḥ /
kliṣṭe tvaṅgadvayaṃ jñeyaṃ samādhirvedanāsukham

antye catvāryupekṣe dve samādhiḥ smṛtireva ca /
kliṣṭe dhyāne caturthe tu dve aṅge vedanā sthitiḥ

dravyātmanā daśaikaṃ ca nāmnā tvaṣṭau daśaiva ca /
aṅgānyetāni kathyante catuṣkoṭirataḥ smṛtaḥ

śamathasya ca /
dhyānasāmantakārūpyeṣvaṅgānāmavyavasthitiḥ

vitarkacāravidhvaṃsātpraśvāsāśvāsasaṃkṣayāt /
upekṣāveditābhāvādantyamānejyamucyate

ādye prītisukhopekṣā dvitīye tu sukhādṛte /
sukhopekṣe tṛtīye 'ntye upekṣaiva vidiṣyate

dṛkchrotrakāyavijñānaṃ vijñaptijanakaṃ tathā /
yadbhūmāvavicārāyāmādyādavyākṛtaṃ tu tat

khanimittodgrahākṛṣṭaḥ proktānantamanaskṛtiḥ /
visarvarūpa ārūpya ākāśānantyasaṃjñakaḥ

tadvaccittavibhutvekṣī vijñānānantyalakṣaṇaḥ /
vijñānānantyadveṣī ca akiñcanyāhvayaḥ punaḥ

tadvittūcchedaśaṅkī ca na saṃjñāsaṃjñasaṃjñakaḥ /
ādau tathā prayuktatvāt tatsaṃjñā vyapadiśyate

savitarkavicāraṃ yatsāpekṣaṃ sānuvartakam /
cittamāryetarākāraṃ tadānāgamyamucyate

catvāro dhyāyinaḥ proktāścaturdhyānavidarśanāt /
sampadvipattisaṃjñāyā hānapakṣyādivedinaḥ

dhyātā proktastathā dhyeyaṃ dhyānaṃ dhyānaphalaṃ tathā /
asiddheruktadoṣatvānnāstyātmādicatuṣṭayam

karmānuṣṭhānato mokṣo jñānānuṣṭhānatastathā /
vyāpāre sati sadbhāvādyāthātmyāvagamepi ca

karma tvatra dvidhā jñeyaṃ puṇyāpuṇyakriyākriye /
puṇyakriyā tridhā proktā viratistadvidhoditā

jñānaṃ tu naiṣṭhikaṃ jñeyaṃ yathāpūvaṃmudāhṛtam /
ato 'nyadbhajate yastu khalīnaṃ carvayatyasau

parapīḍāpravṛttatvādvadhalobhānṛtādayaḥ /
apāyahetavo jñeyāḥ śreyodvāravibandhinaḥ