Abhidharmadīpa · Verses 521-540

divyamavyākṛtaṃ śrotraṃ netraṃ cānyā śubhā matāḥ /
abhijñāphalatābhijñā manovijñānaprajñayā

tisro vidyā matāstryadhvasaṃmohādivyudastaye /
ekā svabhāvato 'śaikṣī dve tvaśaikṣāśrayodayāt

ṛddhicittakṣayābhijñā pratihāryatrayaṃ smṛtam /
harato dve kuśāstṛbhyo mārebhyo harate param

samādhī ṛddhirityuktā phalamaiśvaryaṣṭadhā /
dvidhaitadgatinirmāṇe trividhā gatiriṣyate

manomayī gatiḥ śāsturicchāmātrapravṛttitaḥ /
adhimokṣakṛtānyeṣāṃ tato dehābhivāhinī

rūpagandharasasparśāḥ kāme nirmāṇamiṣyate /
rūpasparśau matau rūpe sveśarīre 'tha vā bahiḥ

abhijñāphalacittena tattāni tu caturdaśa /
ādyadhyānaphalaṃ dve tairūrdhvabhūmyekavṛddhitaḥ

tallābho dhyānavat jñeyaḥ śuddhakācca svataśca tat /
svabhūmenaiva nirmāṇamadhareṇāpi bhāṣaṇam

nirmātraiva sahaiteṣāṃ bhāṣaṇaṃ sugatādṛte /
ekasya bruvataḥ sarve nirmitā bruvate samam

adhiṣṭhāya tu nirmāṇaṃ bhāṣante 'nyena cetasā /
adhiṣṭhānaṃ mṛtasyāpi sthirasyaiva tu vastunaḥ

ajayyekamanekena jayiṇastadviparyayaḥ /
avyākṛtamabhijñotthaṃ upapattya tvayaṃ tridhā

arhatāṃ daśadhā tvetadaiśvaryamupapadyate /
sarvāsravakṣayajñānavimuktidvayayogataḥ

aiśvaryapi samānesminyathokte śāstṛśiṣyayoḥ /
antaraṃ sumahacchāsturyattatpūrvamudāhṛtam

sāṅgā cittasthitirdhyānaṃ taccaturdhāṅgabhedataḥ /
dhyānoktirāñjasī tatra bhāktī tatsahabhūṣvapi

saṃkṣepādiyamākhyātā dhyānajātiścaturvidhā /
dravyabhedānahaṃ tasyāḥ pravakṣyāmi yathāgamam

sahārūpyacatuṣṭvena samāpattirmatāṣṭadhā /
catuḥ pañceṣu skandheṣu taduktervargavṛttitaḥ

bhedena tu samāpattidravyāṇi daśa sapta ca /
sāmantakaiḥ sahāṣṭābhirdhyānāntarikayāpi ca

tadbhedāḥ khalvime 'nyepi vakṣyante śāstracoditāḥ /
buddhabuddhestu te sarve tattvenāyānti gocaram

tridhā dhyānāni maulāni sāsvādādiprabhedataḥ /
tathaiva traya ārūpyā bhavāgraṃ tu dvidhā matam

sāmantāni dvidhā sapta prathamaṃ tu tridhā matam /
dhyānāntaraṃ tridhā tadvadakliṣṭaṃ tvadharāśrayam