Abhidharmadīpa · Verses 501-520

saptamaṃ ṣoḍaśākāramavibhaktākṛtidvayam /
aṣṭākāraṃ dvitīyaṃ tu navajñānamayaṃ tu yat

tathāgatabalaṃ proktaṃ tajjñeyaṃ dvādaśākṛti /
sarvagocaramatrādyamantyaṃ śāntyavalambi vā

dvidhā hetubhavālambaṃ saptamaṃ satyagocaram /
atītādyaddhi dhātvarthamaṣṭamaṃ samudāhṛtam

navamaṃ khalu rūpārthaṃ saṃskṛtālambyate param /
dvyapekṣo balaśabdo 'yaṃ balaṃ tvapratighātataḥ

sandhau sandhau ca buddhasya kāyenārāyaṇaṃ balam /
spraṣṭavyamadhikaṃ tattu daśa hastyādisaptakāt

svaparārthāntasamprāptervaiśāradyacatuṣṭayam /
ādyantabalarūpe dve dve karma pratipaddhiyoḥ

śrotṛsampattrayāpekṣā trividhā smṛtyupasthitiḥ /
saṃsmārāhitasāmarthyasaṃprajanyasvalakṣaṇā

saṃvṛtijñānarūpatvāddīrghakālānusārataḥ /
sarvatra samavṛttyāderbaddhasyaiva mahākṛpā

araṇā praṇidhijñānaṃ catasraḥ pratisaṃvidaḥ /
arhatsāntānikā hyete pañca tu prāntakoṭikāḥ

itarairapi sāmānyā apramādādayo guṇāḥ /
eṣāṃ yathopadiṣṭānāṃ śṛṇu vakṣyāmi lakṣaṇam

araṇā saṃvṛtijñānaṃ nṛjāntyadhyānaniśrayāt /
āryasantānikā jātā savastukamalekṣiṇī

praṇidhijñānamapyevaṃ sarvadharmāvalambi tu /
akopyadharmaṇo khyāte tathaiva pratisaṃvidaḥ

vivakṣitārthasambandhināmasaṃmohabhedinī /
ādyānyā tadabhivyaṅgyā jñeyā jñānavicāriṇī

tṛtīyā śabdasaṃskārā jñānasaṃmohaghātinī /
turīyā tu prabandhoktirdhyānādyutpādanonmukhī

arthākhyā khalu sarvatra ṣaḍjñānānyathavā nava /
pratibhānāhvayāpyevaṃ daśajñānamayī tvasau

kāme dhyāneṣu dharmākhyā tadanyā tvādyakāmayoḥ /
saṃvṛtijñānamayyau tu dve ete pratisaṃvidau

ṛddhau śrotre 'nyacitte prāgbhāve cyutyudaye kṣaye /
jñānasākṣātkriyābhijñā ṣaḍvā dhīḥ muktivartmani

catasraḥ saṃvṛtijñānaṃ pañca jñānāni cittadhīḥ /
sarvāsravakṣayābhijñā ṣaḍjñānānyathavā daśa

ṣaṣṭhī sarvatra pañcānyā maulīṣu dhyānabhūmiṣu /
yatnavairāgyato labhyāḥ svabhūmyadharagocarāḥ

smṛtyupasthitayastistraścetaḥparyāyadhīrmatā /
ṛddhiśrotrākṣyabhijñāsnu prathamā smṛtyupasthitiḥ