Abhidharmadīpa · Verses 481-500

parijñātādyavagamaḥ duḥkhādau kṣayadhī phalam

dhīrākāraḥ sadākāryaṃ sākārāstvavalambinaḥ

paricittamatistrīṇi dharmasaṃjñaṃ nirodhadhīḥ /
catvāri smṛtyupasthānānyato 'nyajjñānamiṣyate

mārgadharmānvayajñānagocaro navaśo dhiyaḥ

pañcadharmāstridhātvāptān mārgarūpān sanātanān /
vyutpattyarthaṃ dvidhā kṛtvā darśayejjñānagocaram

dṛṅmārge prathame jñāne tribhirjñānaiḥ samanvitaḥ /
caturṣvekaikavṛddhyordhvaṃ virakto 'nyamano dhiyā

tridhyānakāmavairāgye paścime muktivartmani /
mauladhyānaprayoge ca jñeyānāgatabhāvanā

bālasya smṛtyupasthānadhyānādyutpādane tathā /
prayogamuktimārgeṣu saṃvṛtyānyamanodhiyaḥ

kṣāntijñānāni bhāvyante svajātīyāni dṛkpathe /
sāṃvṛtaṃ cānvayajñāne duḥkhahetusamāhvaye

samānapratipakṣatvātteṣu mārgāyitatvataḥ /
ato 'bhisamayātyākhyaṃ tattrisatyāntalābhataḥ

mārgākhye tvanvayajñāne ṣaḍ bhāvyante 'tha sapta vā /
ānantaryapathe corddhvaṃ bhāvyate nānyacittadhīḥ

prahāṇamuktimārgeṣu vināntyāyā vimuktitaḥ /
bhavāgrapratipakṣatvātsaṃvṛtasya na bhāvanā

dhyānādīnāṃ svabhāvādāvavyāghātavisāri yat /
dhyānādijñānasaṃjñaṃ tannavajñānamayaṃ balam

yatsattvākṣamṛdutvādau paricchede pravartate /
akṣottamāvarajñānabalaṃ tannavadhīmayam

yatsattvādhirucitraidhe hīnādau sampravartate /
nānādhimuktidhīsaṃjñe balaṃ tacca navātmakam

yannānādhātvapekṣākhyaṃ sattvārthāya pravartate /
navajñānamayaṃ tadvattannānādhātudhībalam

gatidharmāryabhedaṃ yadvetti pratyayabhedataḥ /
taddhiyo daśa sarvatragāminīpratipadbalam

yat svānyātītajanmekṣisaṃvṛtijñānasaṃjñakam /
prāgjātyānusmṛtijñānabalaṃ tatsaphalaṃ matam

sattvānāṃ cyutisambhūtyorjñānamanyādhvavṛtti yat /
taccyutyutpattibuddhyākhyaṃ balaṃ pūrvavaducyate

āsravakṣayadhīsaṃjñaṃ ṣaḍjñānānyathavā daśa /
ṣoḍaśākāramatrādyamanyaiścāpyuttaraṃ bhuvā