Abhidharmadīpa · Verses 461-480

aṣṭānāṃ nīrajaskānāṃ mārgāṅgānāṃ yathāyatham /
tāsvekasyādhvasu jñeyau lābhālābhau navāśrayau

trisatyādhigame lābhaḥ śīladharmaprasādayoḥ /
mārgasatyekṣaṇe buddhasaṅghagocarayorapi

bauddhātsaṅghādṛte mārgādyā śraddhā satyagocarā /
dharmāvetyaprasādosau saṃpratītyaprabhāvataḥ

mohanidrātamonāśāddhīnetronmīlanāt svayam /
buddho yastadguṇe śraddhā prasādaḥ sa jine mataḥ

śaikṣāśaikṣaguṇāḍhyānāṃ pudgalānāṃ ya ākaraḥ /
tadguṇālambanā śraddhā prasādaḥ saṅkhagocaraḥ

śīlānāṃ yattu vaimalyaṃ tatprasādastathaiva tu /
dravyato dvayamevaitannāmatastu catuṣṭayam

śaikṣasya bandhaśeṣatvādvimuktirnāṅgamiṣyate /
mokṣādhimokṣarūpatvānnityānityatvato dvidhā

pūrvoktaiva hi yā bodhiḥ sā samyagjñānamucyate /
mucyate 'nāgataṃ cittamaśaikṣaṃ kleśarodhataḥ

dharmavyāpārato loke dharmyapi vyāpṛto mataḥ /
mārgastūpāttakāritro nirasyati tadāvṛtim

vimuktiḥ śāśvatī yaiva sā virāgādayastrayaḥ /
ākhyātā dhātavaḥ sūtre tridhā bhedo hyapekṣayā

virāgo rāganirmokṣaḥ prahāṇākhyo 'nyasaṃkṣayaḥ /
nirodhadhāturanyasya sopādānasya vastunaḥ

duḥkhahetvavalambinyā yogī nirvidyate dhiyā /
virajyate tu saṃraktastataḥ koṭicatuṣṭayī

saṃjñā anityasaṃjñādyā daśa tābhyo 'śubhādayaḥ /
tisro mārgavidhirmārgaścatastro 'ntyāstrayī phalam

tritayyaśubhasaṃjñādyā jñeyā tatkhalu sāsravāḥ /
samalā nirmalāstvanyā bodhyā nava bhuvo 'malāḥ

bhūmiṣvekādaśasvantyā dhyānādyāsūpalakṣayet /
caturthī pañcamī ṣaṣṭhī vidyāt saptasu bhūmiṣu

loko 'yaṃ tattvasaṃmugdho jñeyatattve pramuhyati /
tāni jñānāni vakṣyāmi svarūpādiprapañcataḥ

jātidravye nirākṛtya pratipakṣādyapekṣayā /
tadbhedo daśadhā prokto dharmajñānādināmabhiḥ

dharmānvayaviśeṣye dve duḥkhādyaiśca catuṣṭayam /
dve saṃvṛtyanyacittābhyāṃ kṣayeṇājanmanā dvayam

pratipakṣaprayogābhyāṃ svabhāvākāragocaraiḥ /
tadvyavasthā niboddhavyā kṛtyenopacayena vā

dhātusatyārthacitteṣu jātidhvaṃsāprajanmanoḥ /
saṃmohasya nivṛttyarthaṃ tadbhedo daśadhaiva vā