Abhidharmadīpa · Verses 441-460

kṣayajñānaṃ matā bodhistathānutpādadhīrapi /
daśa caikaśca tatpakṣyāḥ saptatriṃśattu nāmataḥ

sopekṣāprītisaṃkalpaṃ śraddhādīndriyapañcakam /
saprasrabdhirdvirūpotthaṃ nāmabhedastvapekṣayā

balānyatrendriyāṇyeva prajñaiva smṛtyupasthitiḥ /
vīryaṃ samyakpradhānākhyaṃ ṛddhipādā manasthitiḥ

doṣahāṇamanutpādaṃ guṇotpādaṃ vivardhanam /
sakṛtkaroti yattaddhi sa prahāṇacatuṣṭayam

chandavyāyāmamīmāṃsā cittākṛṣṭāḥ samādhayaḥ /
ṛddhipādāstu catvāro guṇasampattiyonayaḥ

proktaṃ bodhitrayeśitvācchraddhādīndriyapañcakam /
kathitaṃ balaśabdena tadevānabhibhūtitaḥ

bodhanārthena nirdiṣṭaṃ śāstrā bodhyaṅgasaptakam /
pratītyā paramārthena prajñetyantamanugrahāt

prītiprasrabdhyupekṣāṇāmuktāddhetostadaṅgatā /
saṃkalpādeścatuṣkasya patho jñeyānukūlyataḥ

vidyāprabhaḥ ślakṣṇavikalpabhūmiḥ śīlānuyātraḥ smṛtivīryamitraḥ /
samādhisarvādhisukhopabhogo mārgo vimuktidvayadhiṣṇyago 'yam

prādhānyaṃ saptavargasya prārambhoṣmagatādiṣu /
yathākramaṃ viboddhavyaṃ bhāvanādṛṣṭimārgayoḥ

na cittaṃ rājakalpatvād guṇadoṣānuvartanāt /
vyavahārānukūlyatvāt saṃjñā hyeteṣu neṣyate

vipākaphalanimnatvānmārgokteśca na cetanā /
nāprādhānyānmanaskāro vidyāvidyāpravartanāt

kriyārambhapradhānatvānna cchando vīryabṛṃhaṇāt /
nādhimokṣaḥ samāropānna sparśo daurvibhāvyataḥ

nāryavaṃśa hryapatrāpyā aviśāradavṛttitaḥ /
nāpramādaḥ parāṅgatvānnāvihiṃsāviheṭhanāt

sattvādhiṣṭhānavṛttitvānna maitrīkaruṇādayaḥ /
mārgāṅgākṣaikadeśatvānnāpyavetyaprasattayaḥ

nādveṣaḥ śubhamūlebhyaḥ sattvagocarabhāvataḥ /
audāsīnyānna nirvāṇaṃ daviṣṭhyānna paradhvaniḥ

bodhyaṅgānyarajaskāni bodhernediṣṭabhāvataḥ /
tadanyānyavabodhyāni samalānyamalānyapi

ādye dhyāne 'khilā maule 'nāgamye prītyapākṛtāḥ /
dvitīye 'pyapasaṃkalpā dvayoścāsmāt dvayādṛte

śīlāṅgebhyaśca tābhyāṃ ca draṣṭavyā triṣvarūpiṣu /
bodhyaṅgebhyaśca sarvebhyo kāme bodhyaṅgavarjitāḥ

yastatprathamatāḥ proktāścatasrastatra kovidaiḥ /
nyāmāvakrāntivairāgyaphalāptyakṣavivṛddhiṣu