Abhidharmadīpa · Verses 421-440

etannirvedhabhāgīyaṃ caturdhā bhāvanāmayam /
ṣaḍbhaumaṃ ṣoḍaśākāraṃ pañcaskandhā vināptibhiḥ

paścāttu khalunirvedha āryamārgāhvayastataḥ /
sa yasmānniścito vedhastasmānnirvedha ucyate

dharmajñānarucirduḥkhe nirmalaṃ dharmadarśanam /
tatastatraivāvadhṛtiḥ dharmajñānamanantaram

evaṃ triṣvapi satyeṣu tathaivānvayadhīrdvidhā /
anantyāstatra dṛṅmārgāḥ jñeyāḥ pañcadaśakṣaṇāḥ

kṣaṇo 'ntyo bhāvanāmārgāt phalameṣo 'rthasiddhitaḥ

dhyānāni vyavakīryātaḥ pañcamastvakaniṣṭhagaḥ /
caturdhārūpyagāmyanyo dṛṣṭanirvāyako 'paraḥ

punastridhā tridhā kṛtvā trīnato rūpagā nava /
tadviśeṣaḥ punarjñeyaḥ karmakleśākṣabhedataḥ

ṣaḍdhordhvastrotasā sārdhaṃ saptadhā sadgatirmatā /
sati vṛtteranairyāṇāduktaiṣāmeva sadgatiḥ

parāvṛttabhavo hyāryo neha dhātvantaropagaḥ /
eṣa cordhvagatiścaiva nākṣamaṃ cārahānibhāk

antyakāmīryate pūrvaṃ siddhirdvikṣaṇamiśraṇāt /
udbhavārthaṃ sukhārthaṃ ca kleśāśaṅkārthameva ca

tatpāñcavidhyataḥ pañca śuddhāvāsabhuvaḥ smṛtāḥ /
na jātu dṛṣṭapūrvāstāḥ sarvairapi pṛthagjanaiḥ

yo nirodhasamāpattimaśnute kāyasākṣyasau /
bhavāgrāṣṭāṃśahā yāvadarhattvapratipannakaḥ

yaścānantaryamārge 'ntye vajraupamyāhvayesthitaḥ /
tatphalārthaṃ kṣayajñānaṃ tadekālambanaṃ na vā

tadavāpteraśaikṣo 'sāvarhaṃstrailokyasatkṛtaḥ /
sarvakleśavisaṃyuktaḥ śikṣātritayapāragaḥ

bhāvanākhyo dvidhā mārgaḥ samalāmalabhedataḥ /
darśanākhyastu vijñeyaḥ sarvasyaiva nirāsravaḥ

ānupūrvikayadbhūyovītarāgāvītāvītarāgiṇām /
aśaikṣākhyopi boddhavyo nityamevāmalīmasaḥ

bhavāgraṃ nirmalo 'tyeti........

saviśeṣaṃ yatastyaktvā phalaṃ paramupāśnute /
śaikṣasya tribhirakṣādyairdvābhyāṃ saṃpūrṇaṃtārhataḥ

vijñātavyaḥ samāsena punamārgaścaturvidhaḥ /
ānantaryavimuktyākhyau prārambhotkarṣalakṣaṇau

tīkṣṇendriyasya mauleṣu dhyāneṣu pratipatsukhā /
kṣiprābhijñālpabuddhestu dhandhānyatra viparyayāt