Yoga Vasistha · Chapter 6.99

navanavatitamaḥ sargaḥ

śrīrāma uvāca/
santi duḥkhakṣaye'smākaṃ śāstrasatsaṅgayuktayaḥ /
mantrauṣadhitapodānatīrthapuṇyāśramāśrayāḥ

kṛmikīṭapataṅgādyāstiryaksthāvarajātayaḥ /
kathaṃ sthitāḥ kimārambhāsteṣāṃ duḥkhakṣayaḥ katham

śrīvasiṣṭha uvāca /
sarvāṇyeveha bhūtāni sthāvarāṇi carāṇi ca /
ātmocitāyāṃ sattāyāṃ viśrāntāni sthitānyalam

bhūtānāmaṇumātrāṇāmapyasmākamivaiṣaṇāḥ /
kiṃtvalpāsthā vayaṃ vighnāsteṣāṃ tvacalasaṃnibhāḥ

yathā virāṭ prayatate bālakhilyāstathaiva khe /
bālamuṣṭyalpakāye'pi paśyāhaṃkṛtijṛmbhitam

jāyante ca mriyante ca nirādhāre'mbare khagāḥ /
śūnyaikaviṣayāsteṣāṃ svāsthyaṃ na bhavati kṣaṇam

pipīlikāyāśceṣṭābhirgrāsāvāsātmabandhubhiḥ /
asmaddivasakalpo'pi na paryāptaḥ kṣaṇo yathā

trasareṇupramāṇātmā kṛmyaṇustimināmakaḥ /
gamane vyagratā tasya garuḍasyeva lakṣyate

ayaṃ sohamidaṃ tanma ityākalpitakalpanam /
jagadyathā nṛṇāṃ sphāraṃ tathaivoccairguṇaiḥ kṛmeḥ

deśakālakriyādravyavyagrayā jarjarīkṛtam /
kṣīyate vraṇakīṭānāmasmākamiva jīvitam

pādapāḥ kiṃcidunnidrā ghananidrāḥ khalūpalāḥ /
kṛmikīṭādayaḥ kārye naravatsvapnabodhinaḥ

śarīranāśa evaiṣāṃ sukhaṃ saṃprati duḥkhakṛt /
asmākamiva teṣāṃ tajjīvitaṃ tu sukhāyate

jano dvīpāntaraṃ yādṛgvikrītaḥ paripaśyati /
padārthajālaṃ paśyanti tādṛkpaśumṛgādayaḥ

asmākamiva saṃsārastiraścāṃ sukhaduḥkhadaḥ /
padārthapravibhāgena kevalaṃ te vivarjitāḥ

hṛdayātsukhaduḥkhābhyāṃ nāsāto raśanāguṇaiḥ /
paśavaḥ parikṛṣyante vikrītāḥ pāmarā api

suptānāṃ yādṛgasmākaṃ vedanaṃ spaṣṭasutvacām /
vṛkṣagulmāṅkurādīnāṃ tādṛguddāmavedanam

yādṛgasmākamītyarthakramasaṃsārapātinām /
padārthavedanaṃ tādṛktiraścāṃ bhrāntamabhramam

āhlādamātre saumyatvaṃ sukhataścendrakīṭayoḥ /
samaṃ vikalpavinmuktaṃ vikalpastvanatikramaḥ

rāgadveṣabhayāhāramaithunotthaṃ sukhāsukham /
tiraścāṃ janmamṛtyādikhedaḥ kaścinna bhidyate

ṛte padārthabhūtārthabhaviṣyadvastubodhataḥ /
śeṣaṃ babhrvahigomāyugajādīnāṃ nṛbhiḥ samam

nidrāmayānāṃ vṛkṣāṇāṃ svasattāmacalādayaḥ /
sthitā anubhavanto'nye cidākāśamakhaṇḍitam

āpīnanidrā vṛkṣādyāḥ svasattāsthāstathādrayaḥ /
jaṅgamāni cidākāśaṃ nāma kiṃcitkadācana

akhaṇḍacittā śailādisattā nidrā ca bhūruhām /
dvaitopalambhamuktatvātkhamevaikamato jagat

parijñātaṃ jagadyāvadaparijñānasaṃyutam /
na tvaṃ nāhaṃ na caivāstināstī na ca bhaviṣyati

yathāsthitaṃ sadaivedaṃ maunameva śilāghanam /
anādyantamavicchidramanidraṃ ca sanidrakam

pūrvaṃ sargādyathaivāsīttathaivaikaṃ samasthitam /
bhaviṣyatyadhunānantakālamevaṃ tathaiva ca

naivātmatā na paratā na jagattā na śūnyatā /
na maunatā na maunitvaṃ kiṃcinnehopapadyate

tvaṃ yathāsthitamevāsva yathāsthitamahaṃ sthitaḥ /
sukhāsukhe parākāśe śānte nehāsti kiṃcana

paramākāśatāṃ muktvā kiṃ svapnanagare vada /
vidyate kila tacchāntaṃ cidvyomācchamanāmayam

aparijñaptirevaikā tatra saṃbhramakāriṇī /
parijñātamidaṃ yāvadvidyate sāpi na kvacit

parijñāte jagatsvapne yāvatsatyaṃ na kiṃcana /
grahastadenaṃ prati kiṃ sneho vandhyāsute tu kaḥ

svapnakāle parijñāte jagatsvapnamaṇāvaṇau /
kimupādeyatā kāsthā prabodhe'sau na kiṃcana

yanna kiṃcitprabodho'sti nāprabodho'sti tatkvacit /
yastūpalambhastatkāle pūrvāvasthaiva sā tathā

vidyate vartamānatvaṃ bhaviṣyadbhūtatā tathā /
bodhābodhaśca no satyaṃ vastu śāntaṃ kilākhilam

yathormiṇormau nihate na kācitpayasāṃ kṣatiḥ /
tathā dehena nihate dehe nāsti citeḥ kṣatiḥ

citāvākāśa evāhaṃ deha ityupajāyate /
saṃvideva tato dehe naṣṭe kiṃ nāma naśyati

prabuddhasyaiva cidvyomnaḥ svapno jagaditi sthitam /
pṛthvyādirahitaṃ yasmāttasmātsvapnātmakaṃ jagat

sargādau pūrvacitsvapnājjātā pṛthvyādivastudhīḥ /
svapnārthe satyatābhrāntiḥ kalpanāmātrarūpiṇī

pūrvātpūrvatarasyāsya svapnasyāvayavasthitau /
satyevāsatyarūpāyāṃ pṛthvyādikalanā kṛtā

sā ca bhrāntistathā rūḍhā yathāsatyaiva satyatām /
paramāmāgatā tattu satyamatyantanirmalam

vastutastu yathābhūtaṃ cidbabrahmaivātataṃ sthitam /
na ca tatsaṃsthitaṃ kiṃcitsmartā'smartā kimātmakaḥ

evaṃ mātrāparijñānamevātra pratibodhakam /
atraiva tu parijñānaṃ kavāṭapravighāṭanam

pāriśeṣyānna pṛthvyādi kiṃcitsaṃbhavati kvacit /
yo draṣṭā yacca vā dṛśyaṃ vimalaṃ śivameva tat

mukure'ntaryathā bimbādvimbaṃ bhāti jagattathā /
cidvyomani svato bhātamabimbādeva bimbitam

mukure'ntaryathā bimbaṃ na dṛṣṭamapi kiṃcana /
tathā cidvyomagaṃ viśvaṃ na dṛṣṭamapi kiṃcana

labhyate yadvicāreṇa yatsakāraṇakaṃ sthitam /
tatsaccheṣaṃ tu bhāmātramabhūtaṃ satkathaṃ bhavet

bhavedbhramātmakamapi kiṃcidarthakriyākaram /
svapnāṅganāpi kurute satyāmarthakriyāṃ nṛṇām

yattadbhānaṃ tu sā cidbhā paramaṃ taccidambaram /
iti kvāhaṃ kva viśvaśrīḥ kva tvaṃ dṛśyadṛśaśca kāḥ

mṛtvā punarbhavanamasti kimaṅga naṣṭaṃ
mṛtvā na cedbhavanamasti tathāpi śāntiḥ /
vijñānadṛṣṭivaśato'styatha cedvimokṣa-
stanneha kiṃcidapi duḥkhamudārabuddheḥ

mūrkhasya yādṛśamidaṃ tu tadajña eva
jānātyasau na hi vayaṃ kila tatra tajjñāḥ /
matsyo hi yo mṛganadīsalile sa eva
jānāti taccapalavīcivivartanāni

antarbahistvamahamityapi caivamādi
sarvātmakaṃ tapati cinnabha ekameva /
śākhāśikhāviṭapapatraphalaikadehaḥ
saṃkalpavṛkṣa iva bodhakhamātrasāraḥ

ityārṣe śrīvāsiṣṭhamahārāmāyaṇe vā० de० mokṣopāyeṣu nirvāṇaprakaraṇe u० paramārthanirūpaṇaṃ nāma navanavatitamaḥ sargaḥ