Yoga Vasistha · Verses 6.94-2

caturnavatitamaḥ sargaḥ

śrīvasiṣṭha uvāca /
evaṃ vadati vai kumbhe cittatyāgaṃ muhurmuhuḥ /
antarvicārayansaumyo rājā vacanamabravīt

śikhidhvaja uvāca /
hṛdayākāśavihago hṛdayadrumamarkaṭaḥ /
bhūyobhūyo nirastaṃ hi samabhyetyeva me manaḥ

jānāmi caitadādātuṃ matsyaṃ jāla ivākulam /
tyāgamasya na jānāmi cittaṃ dravya ivottama

cittasyādau svarūpaṃ me yathāvadbhagavanvada /
tataścittaparityāgaṃ yathāvadvada me prabho

kumbha uvāca /
vāsanaiva mahārāja svarūpaṃ viddhi cetasaḥ /
cittaśabdastu paryāyo vāsanāyā udāhṛtaḥ

tyāgastasyātisukaraḥ susādhyaḥ spandanādapi /
rājyādapyadhikānandaḥ kusumādapi sundaraḥ

mūrkhasya tu manastyāgo nūnaṃ duḥsādhyatāṃ gataḥ /
pāmarasyeva sāmrājyaṃ tṛṇasyeva sumerutā

śikhidhvaja uvāca /
svarūpaṃ vedmi cittasya vāsanāmayamākulam /
tyāgaḥ sa manye duḥsādhyo vajranirgilanādapi

saṃsṛtyāmodapuṣpasya duḥkhadāhānalasya ca /
jagadabjamṛṇālasya mohamārutakhasya ca

śarīrayantravāhasya dṛtpadmabhramarasya ca /
ayatnāccetasastyāgo yathā bhavati tadvada

kumbha uvāca /
sarvanāśo'sya yaḥ sādho cetasaḥ saṃsṛtikṣayaḥ /
sa eva cittasaṃtyāga ityuktaṃ dīrghadarśibhiḥ

śikhidhvaja uvāca /
cittatyāgādahaṃ manye cittanāśaḥ susiddhaye /
abhāvaḥ śataśo vyādheḥ kathamasyānubhūyate

kumbha uvāca /
ahaṃbījaścittadrumaḥ saśākhāphalapallavaḥ /
unmūlaya samūlaṃ tamākāśahṛdayo bhava

śikhidhvaja uvāca /
cetasaḥ kiṃ mune mūlaṃ ko'kuṃraḥ ko'sya saṃbhavaḥ /
kāḥśāstrāḥkeca vā skandhāḥ kathamunmūlyate ca saḥ //
kumbha uvāca /
ahamarthodayo yo'yaṃ sa cittāvedanātmakaḥ /
etaccittadrumasyāsya viddhi bījaṃ mahāmate

paramātmapadaṃ kṣetraṃ kṣetraṃ māyāmayasya tat /
etasmātprathamodbhinnādaṃkuro'nubhavākṛtiḥ

niścayātmā nirākāro buddhirityeva socyate /
asya buddhyabhidhānasya yāṅkurasya prapīnatā

saṃkalparūpiṇī tasyāścittanāmamanobhidhā /
jīvo mithyopalambhātmā śūnyātmā hyupalopamaḥ

stambhaḥ kāyo'yametasya snāyvasthirasarañjitaḥ /
deśāntare'ṅkuroddeśe kālaspando'sya vāsanā

śākhāyāścittavṛkṣasya dīrghā dūragatāstatāḥ /
indriyāṇyalpabhogāśca bhāvābhāvātmayonayaḥ

viṭapaughā mahānto'sya śubhāśubhaphalākulāḥ /
īdṛśasyāsya cittasya durvṛkṣasya pratikṣaṇam

śāstrāvilavanaṃ kurvanmūlakāṣe bharaṃ kuru /
śikhidhvaja uvāca /
cittadrumasya śākhādeḥ kurvāṇo'haṃ vikartanam

kathaṃ karomi mūlasya niḥśeṣakaṣaṇaṃ mune /
kumbha uvāca /
vāsanā vividhāḥ śākhāḥ phalaspandādinānvitāḥ

abhāvitā bhavantyantarlūnāḥ saṃvidvalena te /
asaṃsaktamanā maunī śāntavādavicāraṇaḥ

saṃprāptakārī yaḥ so'ntarlūnaścittalato bhavet /
cittadrumalatājālaṃ pauruṣeṇa vikartayan

yastiṣṭhati sa mūlasya yogyo nikaṣaṇe bhavet /
gauṇaṃ śākhāvilavanaṃ mukhyaṃ mūlavikartanam

cittavṛkṣasya tena tvaṃ mūlakāṣaparo bhava /
mukhyatvena mahābuddhe mūladāhamalaṃ kuru

cittakaṇṭakakhaṇḍasya bhavatyevamacittatā /
śikhidhvaja uvāca /
ahaṃbhāvātmanaścittadrumabījasya he mune /
ko'nalo dahanākhye'sminkarmaṇyarthakaro bhavet

kumbha uvāca /
rājansvātmavicāro'yaṃ ko'haṃ syāmiti rūpadhṛk /
cittadurdrumabījasya dahane dahanaḥ smṛtaḥ

śikhidhvaja uvāca /
mune mayā svayā buddhyā bahuśaḥ pravicāritam /
yāvannāhaṃ jagannorvīvanamaṇḍalamaṇḍitam

nādrestaṭaṃ na vipinaṃ na parṇaspandanādi ca /
jaḍatvānna ca dehādi na māṃsāsthyasṛgādi ca

karmendriyāṇyapi na ca na ca buddhīndriyāṇi ca /
na mano nāpi ca matirnāhaṃkāraśca jāḍyataḥ

kaṭakatvaṃ yathā hemni tathāhaṃtvaṃ cidātmani /
jaḍaṃ tvasadrūpatayā tena tannāsti he mune

saṃniveśanivāsātmā sarvārthādiḥ pare pade /
vidyate nānyadanyatvānnabhasīva mahādrumaḥ

jānannapīti bhagavannahaṃtvamalamārjanam /
antaryajjñaṃ na jānāmi tena tapye ciraṃ mune

kumbha uvāca /
etāvanmātrakaṃ vṛndaṃ yadi na tvaṃ mahīpate /
jaḍatvāttanmahābuddhe yo'si tadvada me'nagha

śikhidhvaja uvāca /
cinmātramahamacchātmavedanaṃ viduṣāṃ vara /
yatra bhāvāḥ svadante te nirṇīyante ca yena vā

evaṃrūpasya me lagnaṃ nūnaṃ malamakāraṇam /
sakāraṇaṃ vāhamiti yatpadaṃ ca na vedmyaham

asadetadanātmīyaṃ pramārṣṭuṃ malamātmanaḥ /
mune yadā na śaknomi tena tapye sudāruṇam

kumbha uvāca /
brūhi kiṃ tanmahābāho lagnaṃ tava malaṃ mahat /
sthito'si yena saṃsārī satā vāpyathavā'satā

śikhidhvaja uvāca /
cittadrumasya yadbījamahaṃbhāvaśca me malam /
tacca tyaktuṃ na jānāmi tyaktaṃ tyaktamupaiti mām

kumbha uvāca /
kāraṇājjāyate kāryaṃ yattatsarvatra saṃbhavet /
anyattvasaddvicandrābhaṃ dṛṣṭametanna vidyate

kāraṇājjāyate kāryamahaṃbhāvādbhavāṅkuraḥ /
iti kāraṇamanviṣya kathayasva mamādhunā

śikhidhvaja uvāca /
mune'hamiti doṣasya vedanaṃ vedmi kāraṇam /
tadyathopaśamaṃ yāti tanme vada munīśvara

citaścetyonmukhatvena duḥkhāyāyamahaṃsthitaḥ /
cetyopaśamanaṃ brūhi mune tadupaśāntaye

kumbha uvāca /
kāraṇaṃ kāraṇajño'si vedanasya vadāśu me /
tatastvāṃ bodhayiṣyāmi kāraṇākāraṇakramam

vedyavedanarūpasya cetyasaṃcetanasya me /
akāraṇaṃ kāraṇatāṃ yadyātaṃ tava tadvada

śikhidhvaja uvāca /
cetyacetanarūpasya vedyasaṃvedanākṛteḥ /
iyaṃ padārthasatteha dehādi kāraṇaṃ mune

śarīrāditayodeti vedanaṃ vastusattayā /
asatyābhāsayā spando yathā pavanalekhayā

asattā vastusattāyā nāvagacchāmyahaṃ yathā /
ahaṃtvavedanaṃ cittabījaṃ samupaśāmyati

kumbha uvāca /
vidyate yadi dehādivastusattā tadasti te /
abhāvāddehasattādeḥ kiṃniṣṭhaṃ tava vedanam

śikhidhvaja uvāca /
yasyopalabhyate kiṃcitsvarūpaṃ kalanātmakam /
asadrūpaṃ kathaṃ tatsyātprakāśaḥ syātkathaṃ tamaḥ

hastapādādisaṃyuktaḥ kriyāphalavilāsavān /
sadānubhūyamāno'yaṃ deho nāsti kathaṃ mune

kumbha uvāca /
kāraṇaṃ yasya kāryasya bhūmipāla na vidyate /
vidyate neha tatkāryaṃ tatsaṃvittistu vibhramaḥ

kāraṇena vinā kāryaṃ śarīraṃ na kadācana /
vidyate yasya no bījaṃ taddravyaṃ kveva jāyate

akāraṇaṃ tu yatkāryaṃ sadivāgre'nubhūyate /
taddraṣṭurvibhramādviddhi mṛgatṛṣṇājalopamam

avidyamānameva tvaṃ viddhi mithyābhramoditam /
nātiyatnavato'pyetanmṛgatṛṣṇāmbu labhyate

śikhidhvaja uvāca /
asato dvīndubimbāderna yuktaṃ kāraṇekṣaṇam /
vandhyātanayasarvāṅgamaṇḍanaṃ kasya rājate

kumbha uvāca /
kāraṇena vinā kāryaṃ śarīrādyasthipañjaram /
avidyamānamevedaṃ viddhyasaṃbhavato nṛpa

śikhidhvaja uvāca /
hastapādādiyuktasya śarīrasya munīśvara /
nityamālakṣyamāṇasya pitā kasmānna kāraṇam

kumbha uvāca /
kāraṇābhāvato rājanpitā nāma na vidyate /
asato yattu saṃjātamasadeva taducyate

padārthānāṃ ca kāryāṇāṃ kāraṇaṃ bījamucyate /
saṃbhavatyaṅga jagati na bījena vināṅkuraḥ

tasmānna kāraṇaṃ yasya kāryasyehopapadyate /
bījābhāve hi tannāsti tatsaṃvittistu vibhramaḥ

avaśyaṃ khalu yannāsti nirbījaṃ tanmatibhramaḥ /
dvīndutvamarubhūmyambuvandhyāputradaśāsamam

śikhidhvaja uvāca /
pitāmahānāṃ putrāṇāṃ pitṛṇāṃ ca jagattraye /
ādyaḥ pitāmahaḥ kasmātpūrvotpattau na kāraṇam

kumbha uvāca /
ādyaḥ pitāmaho yaḥ syātso'pi nāstyeva bhūpate /
kāraṇābhāvato nityaṃ yadā bhāvo na kasyacit

kāraṇasya svabījasya nityābhāvātpitāmahaḥ /
anyaḥ sa dṛśyamānopi bhramādanyo na vidyate

mṛgatṛṣṇāmbuvadbhrāntirūpa evāvabhāsate /
pitāmahārthakāritvamapi tasya bhramātmakam

pitāmahodare tasya mithyāpratyayataḥ sthitiḥ /
ghanā tava nivṛttaiva mārjayiṣyāmyathetarat

tasmāccidātmakatayātmani cittato'yaṃ
nityaṃ svayaṃ kacati bhūmipa devadevaḥ /
tenaiva padmaja iti svayamātmanātmā
proktaḥ svarūpa iti śāntamidaṃ samastam

ityārṣe śrīvāsiṣṭhamahārāmāyaṇe vālmīkīye de० mokṣopāyeṣu nirvāṇaprakaraṇe pū० śikhidhvajāvabodhanaṃ nāma caturnavatitamaḥ sargaḥ