Yoga Vasistha · Verses 6.93-2

trinavatitamaḥ sargaḥ

śrīvasiṣṭha uvāca /
athotthāya dadāhāsau śuṣkaṃ tattṛṇamandiram /
ajñena svena manasā vṛthā saṃkalpakalpitam

śiṣṭaṃ yatkiṃcidabhavattatsarvaṃ sa śikhidhvajaḥ /
asaṃrabdhamanā maunī krameṇa samayā dhiyā

dadāha ca sa cikṣepa tatyāja ca babhañja vā /
bhāṇḍajātaṃ svavasanaṃ bhojanādyapi tuṣṭavat

sa babhūvāśramastasya dṛṣṭanaṣṭajanasthitiḥ /
vīrabhadrabaladhvastadakṣayajñāśramopamaḥ

āśramātte mṛgagaṇāstyaktaromanthamudyayuḥ /
sāgnidāhātpuravarādbhītabhītajanā iva

bhāṇḍajātaṃ dahatyagnau sahaśuṣkendhanena tat /
kevalākṛtirasnehastuṣṭimānāha bhūpatiḥ

śikhidhvaja uvāca /
vāsanāṃ tatra saṃtyajya sarvatyāgī sthito hyaham /
aho nu cirakālena devaputra prabodhitaḥ

saṃpannaḥ kevalaḥ śuddhaḥ sukhenodbodhavānaham /
kiṃ nāma kila vastvetadbhavetsāṃkalpikakramam

yāvadyāvatprahīyante vividhā bandhahetavaḥ /
tāvattāvatsamāyāti paramāṃ nirvṛtiṃ manaḥ

śāmyāmi parinirvāmi sukhito'smi jayāmyaham /
vibandhāḥ prakṣayaṃ yātāḥ sarvatyāgo mayā kṛtaḥ

digambaro diksadano diksamo'yamahaṃ sthitaḥ /
devaputra mahātyāgātkimanyadavaśiṣyate

kumbha uvāca /
sarvameva na saṃtyaktaṃ tvayā rājan śikhidhvaja /
sarvatyāgaparānande mā mudhābhinayaṃ kuru

tavāstyevāparityaktaḥ sarvasmādbhāga uttamaḥ /
yaṃ parityajya niḥśeṣaṃ parāmāyāsyaśokatām

śrīvasiṣṭha uvāca /
iti śrutavatā tena kiṃcitsaṃcintya bhūbhṛtā /
idamuktaṃ mahābāho rāma rājīvalocana

śikhidhvaja uvāca /
indriyavyālasaṃghāto raktamāṃsamayākṛtiḥ /
śiṣyate sarvasaṃtyāge deho me devatātmaja

tadutthāya punardehaṃ bhṛgupātādavighnataḥ /
vināśātmakatāṃ nītvā sarvatyāgī bhavāmyaham

śrīvasiṣṭha uvāca /
ityuktvā dehamagrasthe śvabhre tyaktumasau javāt /
karoti yāvadutthānaṃ tāvatkumbho'pyuvāca ha

kumbha uvāca /
rājankimiti dehaṃ tvaṃ nirāgaskaṃ mahāvaṭe /
tyajasyajño hi vṛṣabhaḥ kupito hanti tarṇakam

jaḍo varāko mūkātmā tapasvī dehako hyayam /
na kaścana tavaitasminmā mudhaiva tanuṃ tyaja

ātmanyevaiṣa mūkātmā dhyānavānavatiṣṭhate /
saṃcālyate pareṇaiva taraṅgeṇaiva kāṣṭhakam

kṣobhayatyanya evainaṃ nigrahārho muhurbalāt /
tapasvinaṃ yathaikāntaṃ saṃsthitaṃ mattataskaraḥ

sukhaduḥkhādibhūtyā hi nāparādhi śarīrakam /
nātmanaḥ phalavānātmaspande vṛkṣo'parādhavān

vātaḥ phalaśiraḥpuṣpapātanaṃ kurute sphuran /
taruṇā sādhunā dhīrāparāddhaṃ kimātmanaḥ

tyaktenāpi śarīreṇa kila tāmarasekṣaṇa /
sarvatyāgo na te yāti niṣpattiṃ viṣamo hi saḥ

bhṛgau kevalametattvaṃ nirāgaskaṃ śarīrakam /
mudhā kṣipasi no dehatyāge tattyāgitā bhavet

yenāyaṃ kṣobhyate deho mattebheneva pādapaḥ /
tatsaṃtyajasi cetpāpaṃ tanmahātyāgavānbhavān

tasmiṃstyakte bhavettyaktaṃ sarvaṃ dehādi bhūpate /
no cennimagnamapyetadbhūyobhūyaḥ prarohati

śikhidhvaja uvāca /
kenāyaṃ cālyate dehaḥ kiṃ bījaṃ janmakarmaṇām /
kasmiṃstyakte parityaktaṃ sarvaṃ bhavati sundara

kumbha uvāca /
sādho na dehatyāgena na rājyatyajanena ca /
na coṭajādiśoṣeṇa sarvatyāgo bhavennṛpa

yatsarvaṃ sarvato yacca tasminsarvaikakāraṇe /
sarvasminsaṃparityakte sarvatyāgaḥ kṛto bhavet

śikhidhvaja uvāca /
sarvaṃ sarvagataṃ sarvaheyaṃ tyājyaṃ ca sarvadā /
sarvaṃ kimucyate brūhi sarvatattvavidāṃ vara

kumbha uvāca /
sādho sarvagatākāraṃ jīvaprāṇādināmakam /
na jaḍaṃ nājaḍaṃ bhrāntaṃ cittaṃ sarvamiti smṛtam

cittameva bhramaṃ viddhi viddhi ceto naraṃ nṛpa /
cittaṃ viddhi jagajjālaṃ cittaṃ sarvamiti smṛtam

rājyāderatha dehāderāśramādermahīpate /
sarvasyaiva mano bījaṃ tarubījaṃ taroriva

sarvasya bīje saṃtyakte sarvaṃ tyaktaṃ bhavatyalam /
saṃbhavāsaṃbhavādbhūpa sarvatyāgo bhavediti

sarvadharmādyadharmā vā rājyādi vipinādi vā /
sacittasya paraṃ duḥkhaṃ niścittasya paraṃ sukham

idaṃ vivartate sarvaṃ cittameva jagattayā /
dehādyākārajālena bījaṃ vṛkṣatayā yathā

pādapaḥ pavaneneva bhūkampeneva parvataḥ /
bhastrā bhastrābhareṇāyaṃ dehaścittena cālyate

sarvabhūtopabhogānāṃ jarāmaraṇajanmanām /
mahāmunīnāṃ sudṛḍhaṃ cittaṃ viddhi samudgakam

idaṃ pravartate sarvaṃ cittameva jagattayā /
dehādyākārajālena cittaṃ jīvo manomayam

buddhirmahadahaṃkāraḥ prāṇaścetyādibhirmune /
kriyānurūpairabhidhāvyāpāraiḥ śāntamucyate

cittaṃ sarvamiti prāhustasmiṃstyakte mahīpate /
sarvādhivyādhisīmāntaḥ sarvatyāgaḥ kṛto bhavet

cittatyāgaṃ viduḥ sarvatyāgaṃ tyāgavidāṃ vara /
tasminsiddhe mahābāho satyaṃ kiṃ nānubhūyate

citte tyakte layaṃ yāti dvaitamaikyaṃ ca sarvataḥ /
śiṣyate paramaṃ śāntamacchamekamanāmayam

asyāścittaṃ viduḥ kṣetraṃ saṃsṛteḥ sasyasaṃtateḥ /
kṣetre tvakṣetratāṃ yāte śāleḥ ka iva saṃbhavaḥ

cittameva vicitrehaṃ bhāvābhāvavilāsinā /
vivartate'rthabhāvena jalamūrmitayā yathā

cittotsādanarūpeṇa sarvatyāgena bhūpate /
sarvamāsādyate samyak sāmrājyeneva sarvadā

sarvatyāgasya viṣayo yathaivānyo'sti te tathā /
tvamapyanyasya bhavasi tyāgingṛhṇāsi vai nṛpa

sūtraṃ muktāphaleneva jagajjālaṃ trikālakam /
sarvamantaḥ kṛtaṃ tena yena sarvaṃ samujjhitam

yena sarvaṃ parityaktaṃ tasmiñchūnye'pi saṃsthitam /
jagatsarvaṃ trikālasthaṃ tantau muktāvalī yathā

asneheneva dīpena yena sarvaṃ samujjhitam /
sasneheneva dīpena tena sarvaṃ prakāśitam

sthitaṃ sarvaṃ parityajya yaḥ śete'snehadīpavat /
sa rājate prakāśātmā samaḥ sasnehadīpavat

samastavastuniṣkāse yathā tvamavaśiṣyase /
sarvatyāge kṛte tādṛgvijñānamavaśiṣyate

samastavastudāhe'pi yathā tvaṃ netaro nṛpa /
sarvatyāgata evāṅga tathā nirvāṇamucyate

sarvatyāgo hi śūnyātmā āśrayaḥ sarvasaṃvidām /
anantānāmudārāṇāṃ khamivedaṃ divaukasām

sarvatyāgarasāpāne jarāmaraṇabhītayaḥ /
na kāścana prabādhante khasyeva vyomalekhikāḥ

sarvatyāgo mahattvasya kāraṇaṃ nirmaladyuteḥ /
sarvaṃ tyajasi cedyasmādbuddhisthairyaṃ bṛhattamam

sarvatyāgaḥ parānando duḥkhamanyatsudāruṇam /
ityomityurarīkṛtya yadicchasi tadācara

sarvaṃ tyajati yastasya sarvamevopatiṣṭhate /
yathaivāmbu viśatyagnau tathaivāyāti vāridhau

sarvatyāgāntarevāsti jñānamātmaprasādakam /
yacchūnyaṃ kila bhāṇḍasya tatra ratnādi tiṣṭhati

sarvatyāgavaśādeva hṛtakāle kalāvapi /
śākyena vigatāśaṅkaṃ muninā meruvatsthitam

sarvatyāgo mahārāja sarvasaṃpatsamāśrayaḥ /
na gṛhṇāti hi yatkiṃcitsarvaṃ tasmai pradīyate

kṛtvā sarvaparityāgaṃ śāntaḥ svastho viyatsamaḥ /
saumyo bhavasi yadrūpastadrūpo bhava bhūpate

sarvaṃ parityajya mahāsvabhāva
tyajasyatho yena ca tadvihāya /
tyāgābhimānaṃ ca malaṃ vimucya
vimuktarūpo bhava bhūmipāla

ityārṣe śrīvāsiṣṭhamahārāmā० vālmī० de० mokṣo० nirvāṇaprakaraṇe pū० cū० śikhidhvajāvabodhanaṃ nāma trinavatitamaḥ sargaḥ